5
1 Noh thiampite hi thu hi ngai un. Noh Israel mite phano in ngai un. Kumpipa i unaute ngai un! Thudik tuah thukhentu tuk nave uhcin na hum uhah thukhennak heng tuk hi. Mizpah mual a thangin cang uh ci. Tabor mual a mi awktu sukin cang uh ci. Akhesia khua ah mitei caksuknak tuk khuk bangin cang uh ci.
2 Na venghawng uhin dantat tung hi.
3 Israel I thu la cu thei zo ing a, ka mai pen ngelh kuh thei tukma hi. Ka humah muantak ngawlin a mihingte cu keimah bia tuk hei tak haw ma zo ti hi.
Hosea In Milim Biak Ngallinnak Pia
4 Mipi ten thilpha ngawl a bawl haw hangin Pathian nelah a kihlehnak haw tuk khak hi. Milim biak nuamnak lungmu tuah dim haw in, Topa hei theileh haw ma toh.
5 Israel tei pualthaunak cu amuh le muh sualtiktubel tuk hi. A sualnak haw in bahtikin lum haw hi. Judah vang ama nelah tu bok hi.
6 A tuu le khuite cu Topa nelah biakpiaknakin, a pia haw hei in nemcuam tukma. Topa cu mu thei haw ma, a nel pen tai zo haw hi.
7 Topa mai ah muantak ngawlmi cang zo haw in, a cate vang Topa ta hileh haw ma toh hi. Mah hangin a ngam haw cu siatsuah paih tuk hi.
Judah le Israel Dodun
8 Gibeah pen ngaldonak pengkul tum un! Ramah pen ngallinnak pengkul tum un! Bethaven pen ngaldo aunak tuah au leilui un! Benjamin mite ngaldonakah hawh un!
9 Dantatnak tuk a ni heng awn toh, Israel cu siatsuah tawk haw tuk hi. Israel mite lakah a heng loli tukmi son ing.
10 Topa in hi bangin ti hi, “Judah hotu ten Israel ngam a lon hangin ka thinukzet ing. Mah hangin a hum hawah dantatnak cu tuihautung bangin leihsuk tung hi.
11 Israel cu nuainepnak thuak hi, piak tuk imah a nei ngawltu tei lakah bopnak a nget leleng hangin ama neihsa ngam nangawn bo zo hi.
12 Israel humah siatnak hengtik tung a, Judah humah cimihnak hengtik tung hi.
13 “Israel in, a natnak a luai dante amuh ten le Judah in, a meima nase dante amuh ten Israel cu a ngil zetmi Assiria kumpipa i lakah bopnak ngenin hawh naven a natnakte le a meimate damtik thei ma hi.
14 Israel le Judah cu kiosa i sa a mat bangin keimah in man tung. Keimah loli in, balkek khawngin, zamsan tung. Ka kaih kawkawi ten kuamah in pan thei haw tukma hi.
15 “A sualnak haw hangin thuak hih haw tuk a, keimah a zei kikleh haw laklawh, ka miphunte cu nunghek hih tung. A thuaknak haw hangin keimah cu zeileh kha haw ma na maw,” ti hi.