4
Topa In Israel Humah Lungkim Ma
1 Topa in, hi ngamsung a ummi tei humah lungkim ngawlnak nei hi. Israel a hilhmi hi ngai in “Hi ngam sungah itnak um ngawlin le muantak hihnak hei umma hi. Mihing ten a Pathian in koih haw ma.
2 Thutiamnak a bawl haw vang pheleh haw a, zolthusonin, mi that haw, nguca in, zi le pasal ten lawm dang neihsan khawng haw hi. Thisan luannak tam dedeuhin, mi thahnak pa khat nung pa khat um pepel hi.
3 Mah hangin hi ngam cu ko in, a sung ummi nunnak nei hempoh thi haw tuk hi. Ngamsa, vano le ngasate vang thi khawng haw tuk,” ti hi.
Topa In Thiampite Liat
4 Topa in, kuamah in mipite cu siat pahsuh un, liat hei liat pahsuh uh. Ka liat tukmi cu nangmuh thiampite uh ci.
5 A sun a zanin sualnak bawl pawpawh uh ci a, profet vang nangmuh sangin pha saw cuang haw ma. Na nu uh Israel cu siatsuah tung.
6 Ka mihing ten keimah a theih haw ngawl hangin bo khawng haw tuk, noh thiampite vangin ka thu zilhmi lawl uh ci. Nohte cu lawl tung a, na cate uh vang ka thiampi cangthei haw tukma toh hi.
7 “Thiampi na tam dedeuh uhten ka lakah sual dedeuh bok uh ci. Upat tak na hihnak uh cu mualphonakin cangtik tung.
8 Ka miphun tei sualnak hangin mihau cang uh ci a, sualtik nuam sesem uh ci.
9 Ka miphunte bang bokin, dantat tawk bok tuk uh ci. Thilpha ngawl na bawl uh hangin bawlsia in dantat tung hi.
10 Biakpiaknakah na piakmi sung pen na covo uhte cu ei tuk nave uhcin, ngilkial leleng tuk uh ci. Numei pha ngawl dekin, pungzaitik thei pathian na bia li uh hei in, ca nei cuang tukma uh ci. Itahim titale pathian dang bia in, ka nel pen pial khawng uh ci tin hilh hi.”
Topa In Dawi Biak Deih ma
11 Topa in, “Sabittui, a lun le thakin, ka mihing tei lungmu siatsuahtik khawng tuk hi!
12 Thing khuam tuah aisanin, thu dong haw si, a thingmung haw in, a deih haw mi thu hilh thei ti haw hi. Mah hangin kei cu zam san haw hi. Numei pha ngawl bangin amuhte cu pathian dang lakah piadun zo haw hi.
13 Muallekah biakpiaknak bawlin, mualhum thingkung sang nuai ah namtui haal uh ci.
“Na canu uhte cu numei pha ngawlah cangin, na monu uhte vang pasal dang tuah sual haw hi.
14 Mahnaven hi hangin dantat hih tukma laih ing. Itahim titale nangmuh nangawn hei in biakinn a, numei pha ngawl tei lakah hawhin, amuh tuah biakpiaknak bawl kawm uh ci. Thupaucap sung a, um bangin ngaihsutnak nei ngawl miphun cu cimit tuk hi.
15 “Israel mite cu numei pha ngawl bangin keimah taisan zo naven uhcin, nangmuh bangin Judah mi cu sual bok haw pahsuh hen. Gilgal ahimata Bethavennote 4:15 Bethaven tih cu sualnak inn, ahimata milim biaknak inn tihnak hi. khua pen keimah bia haw pahsuh hen. Mah mun pen a nungmi Topa i minin, thutiam hei bawl haw pahsuh hen.
16 Israel mite cu laak lunglian bangin a lungmu haw khoh hi. Iti bangin kaw tuunote bangin hamhing munah ka cawm thei tuk?
17 Israel mite cu milim ten ham khawng zo haw a, amu nuamnak munah hawh haw tahen.
18 Misil ten zu tampi a in haw ten numei pha ngawl a hihnak nopsa zetin, min phatnak sangin min siatnak deih saw haw hi.
19 Simpei muhvawk bangin cuan vawk khawngin, pathian dang a biaknak haw cu zahcak pih haw tuk hi.