2
Topa In Habakkuk A Donlehnak
1 Ka ngalpannak inn humah kaito tung a, Topa in ka son tuk ithu hilh tuk him tihmi le ka phuk lihnak hi iti bang donleh tuk hum tihmi ngak tung hi.
2 Topa in hitin hilh hi, “Na nel a, ka lakmi cu vei khat zoh bek a, sial theih tukin suangpeek humah ciang zetin nganin hi.
3 Ngan ciangin, a hun heng ma laih hi. Mahnaven mah hun cu manlang zetin heng tukin ka lakmi cu kim ngangai tuk hi. A kimnak hun cu khuanuzet bang tuk naven thinsau in ngakin; kim ngangai tuk a, khuanuleh tukma toh hi.Ref 2:3 Heb 10:37;
4 Mahmi thu cu; ‘Mipha ngawlte suakca haw tukma hi, mahnaven midikte cu Pathian i muantak a hih haw hangin nung haw tuk tin,’ ” ti hi.Ref 2:4 Rom 1:17; Gal 3:11; Heb 10:38;
Midikcang Ngawl Tei Kiamnak
5 Hauhnak cu zolthu poh hi. Mi hampumte cu pualthau haw in, mengdenin um thei haw ma hi; thihnak bangin kham tih nei haw ma. Mithi khua bang kek haw hi: tawk zo tih nei haw ma hi. Mah hangin hi, miphun pa khat nung pa khat amu ca bebekin neh li haw hi.
6 Nehmi ten nehtute cu nimnawl haw tukin a nautatnak langtik haw tuk hi. “Nangmuta hi ngawlmi na lak uh hangin boleh bok tuk uh ci. Leibatute leibat piak tuk cawh vikvekin, hau dedeuh uh ci. Ituk tiang kaw mahti bangin na um tuk laih uh?” tin ti haw tuk hi.
7 Mahnaven na theihman laih ngawl uhin, noh mi nehtu cu leibat neitu in cangleh bokin, midang ten sum khang pia tukin cawhleh bok haw tuk hi. Ngalte heng haw tuk a, cantawtokin bawl haw tuk a, na thil uhte lonsak haw tuk hi.
8 Miphun tampi cu nangmah in simtum ci. Mahnaven a nung calam ten, mi tampi na thah zo hang le lei buppi, khuapi le a mithiang ten a bawlsiat khawng hangin lonsakleh bok haw tuk hi.
9 A bo toh ci! Midang siatsuahnak tuah na innkua cu hautik ci; na umnak inn cu siatnak le launak pen luat hen tin ngaisung li ci.
10 Mahnaven na ngaihsutnak cu a thawnthong hi, na innkua ah zahcaknak a hentu saw hi tuk ci. Miphun tampi na siatsuahnak hangin nangma humah siatnak hengtik zo hi ci.
11 Kulhtian suangtum hei in, nangmah dodalin au haw tuk a, innsun vangin aupih bok haw tuk hi.
12 A bo toh ci! Khuapi cu mi siatsuahnak tuah tohin, mithahnak tuah sa ci.
13 Na nehmi miphun ten a tha haw kiamvo in, thil nemcuam ngawl na a deh haw cu mei in, kang khawng hi. Mahmi cu Cungnungbel Topa i nadehnak hi.
14 Mahnaven tuipi thuanthum cu tui a dim bangin leipi cu Topa i sunloihnak theihnak tuah dim tuk hi.Ref 2:14 Isa 11:9;
15 A bo toh ci! Na thinuk hangin na inn nelte zakcak seltumin mualphotik ci, zukham misil bangin lumtik ci.
16 Mah hangin nang vang upatnak cotu hi ngawlin zahcaknak tuah dim tuk ci. Nangmah loli zu intuk ci a, hoi kawkawi in, lum tuk ci. Topa in nangmah dantatnak hai intik tuk a, upatnak na neihmi cu mualphonakin cang tuk hi.
17 Lebanon tupi sung a, thingte phuk khawng ci; atu-in nangmah phuh tawk tuk ci. A ngamsate thatin, a tuu ten ngamsate launak tuah dim tuk hi. Leihum buppi mihing le a khuapi haw a siatsuah hangin le mihing tampi na thah hangin hi bangin na humah heng tuk hi.
18 Milim in, nemcuamnak nei a maw? Mihing i bawlcopmi na pa khat thong hi a, zolthu tih ngawl a hilh theihmi imah umma hi. Milim bawltu in, a bawlmi cu a muansan ten ama ca in, i nemcuam kaw? A awn thei ngawlmi pathian cu!
19 A bothal zo ci! Thingtum lakah, “Khanglo toh in!” ti ci; suangpeek lakah, “Tho in!” ti ci. Milim in, na nelah a lak theihmi i nei kaw? Sui le ngun tuah tuammi hi naven a sungah nunnak umma hi.
20 Topa cu a Biakinn thiangtho sungah um hi. A mai ah leihummi hempoh cu dapno in um haw hen.