HABAKKUK
Laibu
(The Book of Habakkuk)
Thulamsial
Profet \pn Habakkuk \pn* in hi thu cu 600 BC bo kuanlam a hilhmi thu hi in, Babilon tei phat laih hun hi. Babilon mite a nuncan ziaza haw pha ngawl leita in mahmi in, a lungmu natikin, Topa i nelah, “Amuh sangin a dikcang saw a siatsuah lih haw hi, ita mengdenin um cim!” tin thu dong hi (1:13). Pathian in “Amu hun a hen ten tileh tung hi. A dik le a fel cu Pathian a muansannak haw hangin nung haw tuk,” ti hi. (2:4). A dik ngawlte haksatnak a thuak haw tuk hilhhamnak le Pathian i thawm ngengnak la le Pathian a muansannak thu cu laibu tawpnak lamah mu thei hung hi.
1
1 Profet Habakkuk nelah Topa i thu a hengmi cu hi bangin hi.
Thu Dikcang Ngawl Hangin Habakkuk Phuciak
2 Maw Topa bopnak ngenin ka aunak hi ituk tian ngai ngawlin um tuk nge cim? Siatnak sung pen na patsuah laih ngawlin vei izah sam tung kaw?
3 Ita hi bang haksatnak tawktik nge cim? Hi bang siatnak a bawl haw hi iti bang zo leng thei laih nge cim? Siatsuahnak le haksatnak ngeh ka elkim uhah dim haw a, sualnak le hauhdunnak cu khua tihkimah um hi.
4 Daan hei thunei zo ngawltohin, nemcuamnak hei neileh zo ma toh hi. Thudik tihmi hi bawlsuak hi kha awng ma hi.
Topa i Donlehnak
5 Topa in, a mihing tei lakah, “Na elkim uh a, miphunte hi phano in, na zo un; na muh uhten amzet tuk uh ci. Na pa khat bawl tung a, noh ten um zo tukma uh ci.Ref 1:5 Nung 13:41;
6 Mi pualthau le mi copik thei Babilon cu thuneitu in bawl tung hi. Amuh cu ngamdang neh tukin leihum mun tihkimah hawh haw hi.Ref 1:6 2Kum 24:2;
7 Khua tihkimah lauthawngnak le mullinghah ngeh dimtik haw hi. A ngilo leita haw hangin amu thu bek hi daanin, nei haw hi.
8 “A cipuhte cu tavang sangin zuanzang saw haw; cingne ngilkial sangin lauhuai saw haw hi. Ngam khawlapi pen a cipuh ngalkapte, cipuh khungin hung haw hi. A cipuh haw cu a ketin tuah leikuat thathah haw hi. Mupi in, a samat tukmi a dawk bangin a ngalte dawk li haw hi.
9 “A ngalkap ten ngam nawk pepel haw in; a khaktan theitu kuamah um haw ma hi. A hen haw tuk thawm a zak haw ten akua hei in launak tuah dim haw hi. A ngalmat haw mi cu philnel zahin tam haw hi.
10 Kumpite zawnsakin, bawi upate nuihsan thong haw hi. Iti bang ngal kulhtian hei in kham zo ma hi. A pualeu pen lei tiangto haw naven simtum thei leng haw hi.
11 huih bang theu in paileh hawta hi. A ngilnak haw cu pathian bangin ngaisung haw!”
Habakkuk Phuciak Lehleu
12 Topa aw, a pat pepan nang cu Pathian hi ci. Nang cu ka Pathian hi ci, a thiangthomi le kumkhua in, a khomi hi ci. Topa ka Pathian le belhnak suangpi, nangmah in Babilon teng zo ci a, keimu dantat theitu tianin ngiltik ci.
13 Mahnaven itakaw hitih bang mipha ngawl le mi huaisante a zawi theih? Thilpha ngawl zohnakin, na mit cu thiangthozet naven sualnak a bawltute mu kha ma lehcet ci. Itakaw amuhte sangin midik sawte a bawlsiat lih haw ten daidenno in umsan thong nge cim?
14 Itin kaw mihing cu uktu nei ngawl ngasa bang le lungsivai bang thongin, na bawl?
15 Babilon ten midangte cu ngasa bangin sio tuah a siah lih haw hi. Suuk tuah awkin, a mat haw mi a kaih suah haw ten lungdamin au leilui haw hi.
16 A suuk haw tuah thilphabel a ngah thei haw hangin a suuk haw i lakah biakpiaknakte pia in, bia haw hi.
17 Kumkhua in maw na ngalnam mangin, miphunte cu hehpihnak nei ngawlin a bawlsiat lih tuk?