6
1 Mah hangin mailamah not tuk hung; Khristian thuthang a tawpatnak a, zilhdunnak cu zamsanin, piting hilhdunnakah hawh tuk toh hung. Nemcuamnak imah nei ngawlmi nadeh a zamsa zo uhmi cu a taw pepanleh tukma toh hung. Pathian a upnak uh vang a taw pen panleh tukma toh hung hi.
2 Tuiphumnak thu le khutsuannak thu, mithi thawhlehnak thu le kumkhua thukhennak thu, a bul pepan kikleh li tukma toh hung.
3 Mailam saw ah not tuk hung! Pathian i lungkimnak ahi tale mahmi saw cu bawl tuk hung.
4 Thu upnak a zamsanmi ten itin kaw sualsihnakah a kihleh theih haw tuk? Amuh cu Pathian khuavaknak sungah a um awngmite haw hi. Vanhum laksawng teptu le Hawvang Thiangtho cotu hei na hi haw hi.
5 Pathian awnkam a phadan thei ngahtu vang hi haw in, a heng tuk laihmi hun i huham vang a teptu le a thei ngahtute haw hi.
6 Mahti bang hi napi in, a upnak haw zamsan haw hi! Mahti bang mite cu sualsihnakah kihpihleh tukin, a cangthei ngawlmi hi; itahim titale Pathian Capa thinglamtehah khencih lehin mipi mai ah zahcak mualphonak bawlleh haw hi.
7 Nguahtui a dongtu le lobungtu tei ca in, a nemcuammi ankung a pototiktu lei cu Pathian i thupha piakmi lei hi.
8 Mahnaven ling le hampa bek a pototiktu lei cu nemcuamnak imah nei ma hi; Pathian i tamsiat thuakin, mei tuah haal khawngmi hileh tuk hi.Ref 6:8 Pian 3:17-18;
9 Ka ihmi u le naute aw, hitih bangin hilh nave ung, noh tei cungcangah thinnopzetnak nei ung hi. Noh ten muicu thupha saw a himi nunpatnak nei uh ci tih khi thei ung hi.
10 Pathian in mi deidan ma hi. Na nadeh uhmi ah Pathian na itnak uh langtikin, Khristian unaupihte na bopnak uh le atu na bop lih laih uhte khi Pathian in sialsiah sak leleng hi.
11 Na muansannak uh a cangsuak theihnak tukin a tawp tian zuam ten un, tih hi ka deihsaknak uh a ngengbelmi hi.
12 Thazawngmi na hih tuk uh cu awi mang hi; mahnaven Pathian i tepsami a cotu tukin upnak le thinsaunak a neitu bangin hi un, tih deih ung hi.
A Cangcianmi Pathian Thutiamnak
13 Pathian in ama min sangin ngeng saw min dang sal tuk a um ngawl hangin amah le mah i min salin Abraham lakah thutiamnak bawl hi.
14 “Na lakah thutiam ing hi; thupha pia tung a, ca tampi nei tuk ci,” ti hi.Ref 6:14 Pian 22:16-17;
15 Abraham cu thinsau zetin, a ngah kiukeu leng hangin Pathian thutiam co ngah hi.
16 Mi pa kha khatin thutiamnak a bawl ten amah sangin a ngeng saw i min salin a bawl tale thu eldunnak um thei ma toh hi.
17 Pathian in, a tuptahmi khelleh awng ma hi, a thutepmi a cotu tuk tei lakah ciang zetin theihtik a nuam hangin a tepmi i humah ama min salin thutepnak tuah bet nawm laih hi.
18 Hi thu pa nih hi thek thong theih ngawlmi a hih hangin Pathian hei in hi thu humah zolthu sonnuam ma hi. Mahti bang a hih hangin ama lak pen humhimnak a ngahtu cu ngalphatnak le thathonak ngengpi nei in, a mai uhah a koihsami muansannak cu khimzet pom hung hi.
19 Hi muansannak cu a nunnak uh ca in timbaw colhtiknak thik kawnpi bang hi. Eimu ca in, a cangcian zetmi huhimnak a hih hangin vancung biakinn thiangtho sungah hengtum hi.Ref 6:19 Thiam 16:2;
20 Mah munah Jesuh cu eimu masuanah eimu ai-awh tukin tum zo hi. Melkhizedek i thiampi ngui zui in, a kumkhua thiampi sangah cang zo hi.Ref 6:20 Saam 110:4;