7
Thiampi Melkhizedek
1 Melkhizedek cu Salem khua kumpipa hi a, Cungnungbel Pathian i thiampi hi. Abraham cu ngaldo in kumpi pa li a nehnak mun pen a pinleh ten Melkhizedek in muak a, thupha pia hi.Ref 7:1-2 Pian 14:17-20;
2 Mahten Abraham in, a ngal tei khut sung pen a lonmi thil cu Melkhizedek lakah seh sawm seh khat pia hi. (Melkhizedek min a sullam pa khatnak cu “Dikcangnak, Kumpipa,” tihnak hi. Amah cu Salem Kumpipa a hih bangin “Lemdaihnak kumpipa,” tih vangin hi.)
3 Melkhizedek tih hi a nu le pa, a pi le pu tei cikhaih thu ngatnak le a suahnak le thihnak tangthu imah lai ah umma hi. Pathian Capa bang hi; Mahten kumkhua in thiampi pa hi.
4 Mah hangin itih zahin mi ngeng him tih cu thei uh ci. Mi minthang le eimuh cikhaihtu Abraham in ngal lak pen a lonmi thil hempoh seh sawm seh khat pia hi.
5 Mahten Levi miphun tei casuan thiampi a dektu cu Israel mipi lak pen seh sawm seh khat la tukin a Daan haw i thupiakmi hi. Israel mipite cu Levi mite bangin Abraham casuan hi haw naven seh sawm seh khat pia leleng bok haw hi.Ref 7:5 Mipum 18:21;
6 Melkhizedek cu Levi casuan hi kha ma hi; mahnaven Abraham lak pen seh sawm seh khat la in, Pathian thutepnak a cotu Abraham cu thupha pia hi.
7 Thupha a piatu cu a piakmi pa sangin ngeng saw tih cu ciang hi.
8 Levi casuan thiampi tei thu ah seh sawm seh khat cu a thileh tukmi mihing ten co haw hi, mahnaven Melkhizedek i thu ah Lai Thiangtho hilhnak bangin, seh sawm seh khat cu a nungmi in co hi.
9 Mahten seh sawm seh khat a piak ten (Levi casuante vang a piatu hi bok haw) Levi vangin pia bok hi tih theih hi.
10 Itahim titale Levi cu hing ma laih naven amah a hingtu Abraham khi Melkhizedek in, a tawh ten Abraham i pum sungah um zo tih thei hi.
11 Israel ten Levi casuan thiampi tei hum tawnin, Daan cu ngah haw hi. Mahten Levi mi thiampi tei nadeh khi a cangkim bang ahin, thiampi phundang, Aaron casuan kha ngawl, thiampi Melkhizedek casuan hin kul tukma hi.
12 Thiampi hihnakah phundangin, a thek ten daan vang cu a thek kul bok hi.
13 Hi thu hempoh i sullam cu a Topa uh cu a hinnam vang dang, a phunpih sung pen kuamah in biaklandawhah thiampi dek awng haw ma hi.
14 Amah cu Judah hinnam sung pen hinmi tih cu akua hempoh theihmi hi; mahten Moses in thiampi tei thu a son hei ten Judah hinnam tei thu telh awng ma hi.
Melkhizedek Bang Thiampi Dang
15 Hi thu cu a ciang sesemmi hi; Melkhizedek bang thiampi a dang pa khat suak zo hi.
16 Amah cu hi leihum mitei bawlmi, daan le nunphung zui in thiampi a suakmi kha ma hi; asia thei ngawl nunnak i huham hangin a piangmi hi.
17 Itahim titale Lai Thiangtho in, “Nang cu Melkhizedek thiampi ngui zui in kumkhua thiampi hi tuk ci,” ti hi.Ref 7:17 Saam 110:4;
18 Mah hangin daan lun cu nemcuamnak a umleh ngawl toh hangin vawk haw hi.
19 Itahim titale Moses Daan in cangkimin imah a bawl theihmi umma hi; mahnaven atu-in Pathian a nek theihnak tukin a pha sesem mi muansannak pia zo hi.
20 Mah humah Pathian i thutiamnak um nawm laih hi. Midang tei thiampi deh laihin, mahtih bang thutiamnak um awng ma hi.
21 Mahnaven Jesuh cu thutiamnak tuah thiampi suakin, a lakah Pathian in,
“ Topa in thutiamnak
khohzet bawlin,
a thu cu khinleh tukma toh hi;
Nang cu a kumkhua in
thiampi hi tuk ci,” ti hi.Ref 7:21 Saam 110:4;
22 Hitih bangin a dangdunnak haw in, Jesuh cu a pha saw mi thutiamnak amahkhan in cang hi.
23 Adangdunnak haw pa khat a um lehleu mi cu; ikaw titale, thiampi dang tampi um haw naven a thih haw hangin nadeh pehleh thei haw ma hi.
24 Mahnaven Jesuh cu kumkhua nungin, thiampi hi leleng hi.
25 Mah hangin atu le kumkhua in ama sung pen Pathian a zuantu hempoh cu a nun haw pan thei hi; itahim titale kumkhua in, a nun hangin Pathian nelah ngetsak leleng hi.
26 Mahti bang a hih hangin Jesuh cu a kul uhmi a kimtik theitu Thiampi Sangbel hi. Amah cu a thiangthomi hi; sualnak nei ngawlmi le sonbang ngawlmi hi. Misual lak pen khenkhuaimi hi a, vanhumah cawi toh hi zo hi.
27 Amah cu thiampi dangte bang kha ma hi. Thiampi dang bangin nisialin ama ca sualhah biakpiaknak pia masabelin, mahceng ten mipi tei ca sualhah biakpiaknak piak masa kulma hi. Amah in biakpiaknak vei khat bek pia a, kumkhua phaatin, a nunnak a piakmi khi hi.Ref 7:27 Thiam 9:7;
28 Moses daanah mi cangkim ngawlmi khi thiampi sangin bawl hi. Mahnaven Moses Daan nungten a hengmi thutiamnak tuah bawlmi Pathian thutiamnak cu kumkhua cangkimin, bawlmi a Capa khi Thiampi Sang in teng hi.