2
Nunpatnak Sunglawi
1 Mah hangin a zaksa uhmi thutak cu hahsuah tuk ngawlin kho zetin a letkhim uh kul tuk hi.
2 Vanmi ten a pu le pa tei lakah a piakmi haw mi thu khi man hi tih langtikin, mah thuhilh a ngai ngawltu le a zui ngawltu cu dantat tak a hih haw bangin bawlsiatnak thuak haw hi.
3 Mahtibang ahi tale oh ten a thupi zetmi nunpatnak hi imah simsial ngawlin a um uh tale itin kaw bawlsiatnak a luat theih tuk uh? Topa amah loli in, hi nunpatnak thu cu than masabelin, a zatu hempoh ten a dikzia langtik zo haw toh hi.
4 Mah hun lengah Pathian in thasiahhuai le nalamdang a phuphunte bawlin, ama deihnak bangin Hawvang Thiangtho i laksawng khi sem ten hi.
Nunpatnakah Lamhuaitu
5 Pathian in, a heng tuk laihmi tin, a son lih uhmi lei thak uktu tukin vancungmite koih awng ma hi.
6 Mah sangin Lai Thiangtho in mun kha khatah:
“Pathian aw, mihingte hi
na mahel tak tukin
i hi haw peng kaw?
Mihing thawthong hi
ita cingkhawi li nge cim?
7 Vancungmite sangin
niam saw deuh bawlin;
sunloihnak le upnak lukhu
na khuktik,
8 ihempoh uktu in, na bawl,”
ti hi.
Pathian in mihing cu, “ihempoh uktu tukin bawl,” ti hi. Ref 2:6-8 Saam 8:4-6 Ihempoh tihmi sungah thil hempohin tel khawng hi. Mahnaven atu-in ihempoh uktu tih cu mu ma laih hung.
9 Mahnaven Jesuh cu Pathian i hehpihnak hangin mi hempoh ca tukin a thihnak tukin hun comno sung vancungmite sangin niam saw deuhin, bawl hi tih mu hung. Mahti bang thihnak a thuak hangin atu-in sunloihnak le upatnak lukhu khu in mu hung hi.
10 Mi tampi ten Pathian sunloihnak co theihnak tukin, ihempoh bawltu le a nungtiktu Pathian in haksat thuaknak sung pen Jesuh cu mi cangkimin, a bawl cu a manmi hi. Itahim titale Jesuh amah cu nunpatnakah amuhte lamhuaitu hi.
11 Mihing tei sualnak somciangin, a somciang sak mitei Pa cu pa khat hi. Mah hangin Jesuh in amuhte cu “ka unaupih” tin sam tukin zakca ma hi.
12 Amah in Pathian nelah,
“Na min cu ka unau pih tei lakah
hilh tung hi,
a khawmdunnak hawah
nang thangphat tung,”
ti hi.Ref 2:12 Saam 22:22;
13 Mah humah, “Pathian cu muang tung hi,” tin ti in, “Hilai a Pathian i piakmi naupang tei lakah um ing,” tin ti bok hi.Ref 2:13 Isa 8:17, 18;
14 Mahten “Naupangte” tin a sammi a mihingte cu thi le sa a neimi a hih haw hangin Jesuh hei cu amuh bangin thi le sa nei in mihing nunah nung bok hi. Hi tin, a bawlnakin, a tuptahmi cu ama thihnak pen thihnak hum a, thuneitu Satan khi siatsuahin,
15 a nunsung haw hempoh thihnak lau in, sal bangin can tawtok lite luattiknak tukin hi.
16 Itahim titale a bopmite cu vancungmite hi haw ma tih cu ciang hi. Lai Thiangtho in, a hilh bangin,Ref 2.16 Isa 41:8-9;
17 “Abraham casuante bawm hi,” tih hi saw hi. Mahti bang a hih hangin ihempoh ah unaupih bangbok kul hi. Mahtin a hihnak cu mihing ten sual ngaihdamnak a ngah theihnak tukin Pathian nadehnakah muantak le hehpihnak neitu Thiampi Sang hih theihnak tukin hi.
18 Amah loli in sualsohnak le haksatnak thuak zo a hih hangin atu-in, sualsoh a thuakmite bawm thei hi.