3
Moses Sangin Jesuh Cuangcung Saw
1 Pathian i sambokmi Khristian unaupihte, eimu upnak ca in, Thiampi Sang hi tukin Pathian i tiikmi Jesuh i thu hi ngaisung hem un!
2 Moses cu Pathian i inn sungah nadektu muantak a hih bangin Jesuh hei cu nadektu tukin a tengtu Pathian nelah muantak hi.Ref 3:2 Mipum 12:7;
3 Inn satu pa in, a sakmi inn sangin upatnak tam saw ngah hi. Mahti bang bokin Jesuh hei cu Moses sangin upatnak tam saw ngah tak hi.
4 Inn hempoh cu mi pa kha khat i sakmi hi: mahnaven ihempoh a satu cu Pathian hi.
5 Moses cu Pathian i nadektu a hih bangin, Pathian i innkua sungah muantak nadektu hi a, Pathian in mailam hun ten a hilhleh tukmite vang hilh thei hi.
6 Mahnaven Jesuh cu Pathian i innkua ah muantak, Pathian i Capa hi. Oh ten a ngaihsut san uhmi khi khohkhahzet le ngalpha zetin, a lenkhim uh tale, a innkua hi hung hi.
Pathian i Mitei Colhnak Tuk
7 Mah hangin Hawvang Thiangtho in,
“Tuni Pathian i aw na za tale,
8 lungmu ngoltolmi hi pahsuh un!
Na pu le pa uh ten
Pathian a langpang haw bangin
um bok pahsuh un.
Ngunphil ngamkhing sung pen
Pathian a khingkhai ni
haw bangin um pahsuh un.
9 Pathian in, “Mahlai ah na pu le
pa uhten dodalin
khingkhai haw hi;
kum sawm li sung
amuh tei ca in, ka bawlmi nate
mu haw naven,” ti hi.
10 Mah hangin a hum hawah
ka thinukin,
‘Amuhte cu muantak ngawl
hi leleng haw,
ka thupiakmi zui nuam haw ma,’
tin ti hi.
11 Ka thinukzet hangin,
‘A colhnak haw tukin
ka tihmi ngamah tum hihim
tukma uh ci, tin thutepnak
thukzet bawl ing,’ ti hi.”Ref 3:7-11 Saam 95:7-11;
12 Thu umtu u le naute, a nungmi Pathian zamsan a nuamtu, lungmu pha ngawl le umngawltu na hih ngawlnak tukin ngalling un hi.
13 Mah sangin sualnak i zolmi na hih ngawlnak tukin le lungmu ngoltol na neih ngawlnak tukin, Lai Thiangtho in, “Atu ni” a tihmi awnkam hi eimu ca in sullam nei a hih bangin, nisial pa khat le khat bawmdun saw un hi.
14 Itahim titale a pattungin, a co uhmi lungmuannak khi a tawpnak tian a lenkhim thei uh tale, a venghawng uhin Khrih i ngualcam hi tuk hung hi.
15 Lai Thiangtho in, “Tuni in
Pathian i aw na za tale
lungmu ngoltolmi hi pahsuh un.
Na pu le pa uh ten
Pathian a langpang haw bangin
um pahsuh un,” ti hi.Ref 3:15 Saam 95:7-8;
16 A kuate kaw Pathian aw zain, a dodaltu cu? Izipt ngam pen Moses i puitul mite haw hi.Ref 3:16 Mipum 14:1-35;
17 A koi humah kaw kum sawm li sung Pathian thinuk kaw? Ngunphil ngamkhing pen a sualin, a thi mitei humah hi.
18 Pathian in thutiamin, “A colhnak haw tukin ka tihmi ngamah heng thei hihim haw tukma hi,” a tih ten a tih nuammi cu akua kaw?
19 Amah Pathian a dodaltute khi hi. Mah ahi tale, a tepmi ngamsung a tum theih ngawlnak cu a up haw ngawl hangin hi, tih mu hung hi.