12
Ohtei Pa Pathian
1 Ohte vang hitihzah takin, a tammi tetti a elkim uhah a neih uh hangin a hawhnak lampi uh khamtu le a khaktu thil cu vawkin, a sualnak uh bawmngit cu zamsanin le eimu mai ah a ummi, tai zuamdunnakah teimak suahin tai nung hi.
2 A upnak uh a patnak pen a tawpnak tian a sihsan uhmi Jesuh khi tawp ngawlin zo leng poh nung. Mailam ten a co tuk uhmi lungdamnak khi a tuptahmi a hih hangin thinglamteh hum a, zahcaknak tuah thih tuk hei poi sa ngawl thuakin, atu-in Pathian khunnak taklamahb 12:2 Taklamah: tihmi cu ‘upatnak mun’ tihnak hi khung hi.Ref 12:2 Heb 1:3, 8:1, 10:12;
3 A thuaknak khi ngaisung un! Misual tei huatnak a thuak theih zia khi! Mah hangin nangmuh vang cu thinnau le lungbingin um kha sual pahsuh un hi.
4 Itahim titale sual na donak uhah thihnak tham tian do ma laih uh ci.
5 Pathian i ca nangmu lakah thapiaknak thu a hilhmi khi phawkngil zo uh cim?
“Ka capa, Topa in
nun a hilh ten,
imah simsial ngawlin
um pahsuh un.
A liat ten thinnau in
um pahsuh un.Ref 12:5-6 Job 5:17; Thup 3:11-12;
6 Itahim titale Topa in,
a ih mite nun hilhin,
ca tatakin a lakmite cu
dantat mek hi.”
7 Haksatnak cu na pa uh i nunhilhnak hi tin ngaisung zazal un hi; itahim titale haksatnak na tawh uhmi cu Pathian in, a ca in ngaisung hi tih langtik hi.
8 Ama cate thuhilhin, noh thu a hilh ngawl tale, a cate ngangai hi ngawlin casawn hi uh ci tih hi tuk hi.
9 Leihum a pa uhte khi ngaisung un; dantat haw naven oh ten upat hung. Nunnak a ngah theihnak tukin hawvang lam pen a pa uh i thu cu itih zahin kaw a zui sesem tuk uh?
10 A pa uhten pha tin, a ngaihsut haw hangin hun comno sung dantat hih haw hi; mahnaven Pathian in eimu phatnak tukin le ama thianthohnak a kawm thei boknak tuk uhin nun hilh hi.
11 Dantatnak a thuak laihtak uhin, a lung uh damtiktu hi ngawlin thasiatiktu hi. Mahnaven dawllam ten mahtih bangin dantatnakin nunhilhnak a tawktute cu a nunnak hawah diknak le lemdaihnak laksawng ngah haw tuk hi.
Nunhilhnak le Ngallin Piaknak
12 A kha zetmi na khut uh zak unna, a can tetekmi na khuk uh khohtik un hi.Ref 12:12 Isa 35:3;
13 A lampi cam zui ngut unna, na ke uh bai vawk ngawlin damleh tuk hi.Ref 12:13 Thup 4:26;
14 Mi hempoh tuah lem dimdiamno in, um tuk zuam unna, nun thiangtho in, nuntuk tum un hi; itahim titale nunnak thiang nei ngawl cu kuamah in Pathian mu thei haw tukma hi.
15 Pathian i hehpihnak khi kuamah in nungheksan tuk ngawlin ngalling un hi. A sia le a kha mi thingkung khangto in, a ngu pha ngawlin mi tampi cimnak a piak bang hi kha pahsuh un hi.Ref 12:15 Daan 29:18;
16 Kuamah in nupa sualnak bawl pahsuh un; Hawvang lam thu a simsial ngawltu Esau bangin hi pahsuh un; amah cu ca upa lo le lam luahtu a hihnak khi an vei khat eih tuah zuak thong hi.Ref 12:16 Pian 25:29-34;
17 Na theih uh bangin a nungten a pa i lak pen thupha ngahleh nuam naven ngahleh thei ma toh hi; mit hitui tuah a ngenleh li vangin a bawlsa mi cu khelhleh theih ma hi.Ref 12:17 Pian 27:30-40;
18 Nohte na hennak uh mual cu Israel tei hennak Sinai Mual bang hi kha ma hi. Sinai Mual cu zen theihmi hi; mei alh dudum le meingo nimpi huihsia le pengkul tummi,Ref 12:18 Suah 19:16-22; 20:18-21; Daan 4:11-12; 5:22-27;
19 a ngingzet mi aw khi muhtheih le zaktheihin um hi, Israel miten aw a zak haw ten mah aw cu zaleh tuk ngawltohin ngen haw hi.
20 Itahim titale Pathian i thupiakmi cu, “Kua hei hihen mual a tawngkhatu cu ngannung ahi vangin, suang tuah seh hup tuk,” tihmi aw khi za ngam haw ma hi.Ref 12:20 Suah 19:12-13;
21 muh haw mi cu a lauhuai mullingsuak a hih tak Moses hei in, “Lau leita in can tawtok ing,” ti hi.Ref 12:21; Daan 9:19;
22 Mahnaven noh tei hennak mual cu Zion mual le a nungmi Pathian i khuapi, vancungmi a thawng athawngin, a umnak haw van Jerusalem hi.
23 Vancungah a min haw ngatsa in, a ummi Pathian i catawntil tei lungdam thatui in, a umnak haw heng zo uh ci. Mi hempoh tei thu a khentu Pathian le midik tei hawvang lakah heng zo uh ci.
24 Abel thisan sangin a thupha saw in, a sontu, Jesuh thehmi thisanah heng zo uh ci.Ref 12:24 Pian 4:10;
25 Mah hangin nangmu lakah thu a hilhtu i thu el tuk ngawlin ngalling un. Pathian Thuthang lei humah a hilh haw mi a eltu hei khi luat haw ma hi. Vancung pen a hilhtu i thu a ngai uh ma tale itih zahin kaw a luat ngawl sesem tuk uh!Ref 12:25 Suah 20:22;
26 Mah hun laihin, a aw tuah leipi khi hing khawng hi; atu-in “leipi bek hi ngawlin, vancung tianin hing tung,” tin thutiam hi.Ref 12:26 Hag 2:6;
27 “Hingleh khawng tung” tihmi awnkamin leihum pen bawlmi hempoh hin khawng le thawn khawng hi haw tuk a, hin a theih ngawlmi cu tang tuk tih a langtiknak hi.
28 Mahti bang a hih hangin lungdam thatui in um nung. Itahim titale hin theih ngawlmi uknak co hung hi. Pathian nelah a lungdamnak uh langtik nung inna, a lungdamtu zongin, amah cu upatnak tuah bia tuk hung.
29 Itahim titale a Pathian uh cu mi a kangtum theitu mei tuah bangve hi.Ref 12:29 Daan 4:24;