5
Topa i Hunleh Tuk Ngalling Ham Un
1 U le naute, Topa i hunlehnak tuk hi a ni le hun ituk ten him tih thu ah noh lakah laikuat kulma hi.
2 Itahim titale nangmuh loli in Topa i hunlehnak tuk Ni cu zanlam a nguca bangin hung tuk tih ciang zetin thei uh ci.Ref 5:2 Mt 24:43; Lk 12:39; 2Pet 3:10;
3 Miten, “Ihempoh dai in himnak a um laihtak hi,” a tih haw laih takin numei tei nauhing tuk vonnat a tawh haw bangin ngallin ngawlpi in, siatsuahnak a hum hawah heng tuk a, kuamah luat haw tukma hi.
4 Mahnaven, u le nau nohte cu khuathim sung ummi na hih uh ngawl hangin mah Ni cu zan a nguca bangin na ngaihsut khak uh ngawl laih takin heng ma hen.
5 Nohte cu na venghawng uhin khuavaknak sungah a ummite uh ci. Sunlam i mihing hi uh ci. Thim sung ummi hi ma hung, zanlam mi hei hi ma hung hi.
6 Mah hangin midang bangin hihbuh tuk hi ma hi. Hihbu ngawlin cingcai zetin, a nung tuk mite hung hi.
7 Mihing cu zanlamin hihbu in, zanlam ten zukham misil haw hi.
8 Mahnaven ohte cu sunlam i mihingte hung hi ama, cip liklekin um tukmi hung hi. Mah hangin upnak le itnak cu lumphaw ai-in mangin, a muansan uhmi nunpatnak cu thik lukhu ai-in mang tuk hung hi.Ref 5:8 Isa 59:17; Efe 6:13-17;
9 Pathian in, a thinuknak thuaktik tukin ohte teng ma hi; mahnaven a Topa uh Jesuh Khrih sung pen patnak ngah tukin teng hi.
10 A Topa uh cu a hunleh ten a nung uh hei in hihen, a thi zo toh uh hei in hihen, amah tuah um langkhat tukin eimu ca thi hi.
11 Mah hangin atu na bawl lih uh zo bangin pa khat le pa khat thazaang piadunin bawmdun un hi.
Thukhupnak le Nuksatnak
12 U le nau Khristian mite nisial na nunnak uhah a hotu le a zilhtu, nangmu lakah na a dektute khi upat maizahnak pia un tin sosuah ing.
13 Nangmu ca nadek haw a hih hangin, maizahnak sangbel le itdunnak pia un hi. Nangmu lakah mengdenno in le lemdunno in um un hi.
14 U le naute, thazawng mite khi ngallinnak pia un, ngalnawm mite ngalhannak pia un, a nawmtam mite bawm unna, mi hempoh humah thinsau in um un tin so ing.
15 Kuamah in phatngawlnak cu phatngawlnak tuah lulhleh tuk hi ma hi, mahnaven pa khat le pa khat humah hihen, mi hempoh humah hihen, phatnak bawl tum leleng un hi.
16 Catngawlin, na lung uh dam un;
17 thungen leleng un.
18 Na hum uhah ithu bang thu a heng hei in lungdam thu hilh un. Khrih Jesuh tuah a pehzommi na nunnak uhah mahtih bangin nung tukin Pathian in deih hi.
19 Hawvang Thiangtho cu kham pahsuh un;
20 Profet thuhilh thiamnak khi nautat pahsuh un.
21 Ihempoh khingkhai masa un hi, a phami ahi tale pom unna,
22 a pha ngawlmi hempoh cu lawl un.
23 Lemdaihnak a piatu Pathian amah in cangkim zetin thiangthotik henna, a Topa uh Jesuh Khrih a hunleh ten na hawvang, na lungmu uh le na taksa, na ihempoh uh mawhsiatnak nei ngawlin bawl tahen.
24 Nangmuh a samtu cu muantak a hih hangin mahti bang bawlsuak tuk hi.
25 U le nau, keimu ca vangin thunget sak un.
26 Umtu unau khi itnak tuah nuksatdunin kawidun un
27 A Topa uh i thupiaknakin hi laikuat hi a umtu Khristian hempoh tei lakah sial un tin so ing.
28 A Topa uh Jesuh Khrih i hehpihnak cu nangmu humah um zal tahen.