4
Pathian Lungdamtiktu Nun
1 A dawlbelin, ka u le ka naute aw, Pathian i deihdanin, na nun theihnak tuk uhin, itin nuntuk tih cu keimu lak pen cung zo toh uh ci. Mahtin na nun sesem theihnak tuk uhin, Topa Jesuh i minin sosuah ung hi.
2 Itahim titale Topa Jesuh i thupiaknak bangin ka zilh uhmi thu cu thei uh ci.
3 Pathian in nohte cu a thiangthomi le nupa sualnak bawl tuk ngawlin deih hi.
4 Pasalte, na zi uh tuah thiangtho le zoh mawi in um tuk tih cu thei un hi.
5 Pathian thei ngawl bangin tisa i deihnak zui in nung pahsuh un.
6 Hi thu ah Khristian na unau pih uhte zawnsakin nautat pahsuh un hi. Hi bangte cu bawl kha tuk ngawlin hilh zo toh ung a, atu-in ngallinnak nasezet pia ung hi: mah tih bang a bawltute cu Topa in bawlsia tuk hi.
7 Pathian in nupa sualnak bawl tukin sam ma hi, a thiangtho tukin sam saw hi.
8 Mah hangin hiti bang thuzilhnak a zui nuam ngawltu cu mihing i thu a el hi ngawlin Hawvang Thiangtho piatu Pathian i thu el hi.
9 Thu umtu, u le naute aw, itdunnak thu ah laingat hei kul lehma toh hi. Pa khat le pa khat itdun un hi.
10 Pathian in nangmuh loli zilh zo in, Macedonia ngamah a ummi na u naupih tei humah mahtih bangin nung zo toh uh ci. U le naute, mah sangin a pha saw nung tukin nangmuhte sosuah nuam ung hi.
11 Ka hilh zo toh uh bangin cingdenno in nuntuk khi tumtah un, nangmuhno in, nadek tek unna, pumcawmnak tukin zuam tek un hi.
12 Mahten Pathian a umngawltu tei upat maizahnak co in, na kulnak uhah midangte muan lih kul tukma hi.
Topa i Hunlehnak
13 U le naute aw, muansannak imah nei ngawl thasia in, a ummite bangin na um ngawlnak tuk uhin, a thisa tei thu ah thuman na theih tuk uh khi deih ung hi.
14 Jesuh cu thi in tholeh tih khi um hung hi, mah hangin Jesuh umin, a thi mite amah tuah munkhatah Pathian in thotik tuk hi tih cu um hung hi.
15 Atu ka zilh uhmi hi, a Topa uh i zilhmi hi, a Topa uh a hunleh ten oh a nungmite cu a thisa mitei hawh laih ngawlin hawh masa cuang tukma hung hi.Ref 4:15 1Kor 15:51-52;
16 Van pen Topa i thupiaknak authawm thang tuk a, vancungmi lak pen a upabel aunak aw hi tuk hi; Pathian i pengkul tummi aw thang tuk a, Topa cu vancung pen tolh tuk hi. Khrih umtu a thisa mite tho masa haw tuk.
17 Mahten oh a nunglaih mite cu vanah Topa tawk tukin a tho masate tuah meingo humah cawi toh khawng hi tuk hung. Mahten Topa tuah kumkhua in um langkhat tuk hung.
18 Mah hangin hi thu tuah pa khat le pa khat hehnemdun un hi.