21
Isaak Hinnak
1 Topa in, Sarah cu a tepsa bangin muicu pia hi.
2 Sarah cu naupai in, Pathian i hilh hun, Abraham i teklam ten capa hing hi.Ref 21:2 Heb 11:11;
3 Abraham in, a capa cu Isaak tin, a minsa hi.
4 Pathian i thupiak bangin, Abraham in, Isaak cu ni liat a kim ten vunceptan hi.Ref 21:4 Pian 17:12; Nung 7:8;
5 Isaak a hin ten Abraham cu kum za khat hi.
6 Sarah in, “Pathian in lungdamnak le nuihnak pia hi. Hi thu a za hempoh ten lungdam pih haw tuk,” ti hi.
7 Mah ceng ten, “Sarah in capano nawipia tuk hi tin, Abraham lakah a hilhtu kua poh um haw nen ti maw? Mahnaven a tek nungten amata tukin capa hing zo ing,” tin hilh hi.
8 A capa cu khang dedeuh a, nawi-in a tawp ni-in, Abraham in an eih puaipi bawl hi.
Hagar le Ishmael Hawlvawk
9 Ni khat cu Izipt mi Hagar tuah a neih haw mi a capa Ishmael le Sarah i capa Isaak cu ummai langkhat haw hi.
10 Mahmi cu Sarah in, amuh ten Abraham lakah, “Hi silanu le a capa hi hawlvawkin hi. Ka capa Isaak i co tukmi na lo le lam hi hih silanu i capa in demno hei zen kha pahsuh hen,” ti hi.Ref 21:10 Gal 4:29-30;
11 Abraham cu a capate hangin a lungmu tamzet hi, itahim titale Ishmael vang cu a capa leleng hi.
12 Mahnaven Pathian in, Abraham lakah, “Hi na capa le a nu Hagar humah thinkham pahsun. Sarah i hilh bangin bawlin, itahim titale ka tepsami sialcelh ngawl na casuante cu Isaak sung pen piang haw tuk hi.Ref 21:12 Rom 9:7; Heb 11:18;
13 Na silanu uh i capa lak heiah casuan tampi pia tung a, hinnam ngengpi in suak haw tuk hi. Itahim titale amah vang na capa hi bok,” ti hi.
14 A zingten zingtungno in, Abraham cu tho a, Hagar lakah an le tuithawl pia hi. A capa Ishmael cu pua thahin, Hagar cu tultik hi. Hagar cu hawhin, Beersheba ngamkhing sungah vakvai hi.
15 A tui ken haw a bo ten a capano cu hampa cam sungah koihin,
16 “Ka cano thih laih zo ngam tuk mang,” ti a, hawhin, kaih za khat khawlanak munah khung hi. Mahlai pen a khungthahin kap hi.
17 Pathian in, nauno kah nging a zak ten, Pathian i vancungmi in, vancung pen a lakah, “Hagar, ita lungkham nge cim? Na thinsu pahsun. Pathian in nauno kahnak aw za zo hi.
18 Tho in, na nauno la inna, ngimtikin hi. A casuante cu hinnam ngengpi in bawl tung,” ti hi.
19 Pathian in, Hagar mit cu vaktikin, tuikhuk pa khat mu hi. Hawhin tui thawl dimin, tui a than nungten a capa cu tui pia hi.
20 Pathian in, umpihin, a capa cu khangto hi. Paran ngamkhing lakah umin, amah cu sa ngah theizet pa in suak hi.
21 A nu in, a zi tukin Izipt nu huaisak hi.
Abraham le Abimelek Lungkimnak
22 Mahlai in, Abimelek cu a ngalkap uktu bawi Fikol tuah Abraham lakah hungin, “Na thil bawlmi hempoh ah Pathian in umpih hi.Ref 21:22 Pian 26:26;
23 Mah a hih hangin keimah le ka cate le ka casuante na zol ngawlnak tukin Pathian mai ah thutiamin hi. Na lakah muantakin um zo ing, nang vang keima humah le hi na umnak ngam humah muantakmi na hihnak tukin thutepnak bawlin,” ti hi.
24 Abraham in, “Tiamdun ing,” ti hi.
25 Abimelek i umlawh tei a lon haw mi tuikhuk thu cu Abraham in Abimelek lakah saalleh hi.
26 Abimelek in, “Hi thu hi thei awng mang hi. Nang vangin hilh awng ma ci; tu hi masabel ka theihnak,” ti hi.
27 Abraham in, Abimelek cu tuu le khui dawm khenin, a pa nih haw in lungkimnak bawl haw hi.
28 Mah bek sial ngawlin Abraham in, a tuuhon sung pen tuuno salih cu mundangah koih hi.
29 Abimelek in, “Ita hi bangin bawl nge cim?” tin dong hi.
30 Abraham in, “Hi tuikhuk kuattu hi ci, tin na tih theihnak tukin hi tuuno salih hi na san kul hi,” tin don hi.
31 Mah hangin mah laih mun cu Beershebanote 21:31 Beersheba tih cu Hebru awnin Thutepnak Tuikhuk, ahimata Salih Tuikhuk tihnak hi. tin sam haw hi. Itahim titale a pa nih haw in thu a tepdunnak haw mun hi.
32 Mah nungten Beersheba ah lungkimnak a bawl nung haw ten Abimelek le a ngalkap uktu bawi Fikol cu Filistia ngamah kikleh haw hi.
33 Beersheba ah Abraham in makeng kung khat phut a, kumkhua in, a nungmi Pathian Topa cu bia hi.
34 Filistia ngam sungah Abraham cu kum ngeipi um hi.