20
Abraham le Abimelek
1 Abraham cu Mamre pen Negev ngamah thawnin, Kadesh le Shur laklawhah um hi. Mahnung Gerar a umlaihin,
2 Abraham in, a zi Sarah cu ka celnu hi, a tih hangin Gerar kumpi Abimelek in, a zi tukin la hi.Ref 20:2 Pian 12:13; 26:7;
3 Mah zan cu Abimelek i mangah Pathian lang a, Pathian in, “Thi tuk ci, itahim titale Sarah hi mi zi,” ti hi.
4 Mahnaven Sarah cu Abimelek in, a zaupih laih ngawl hangin, “ Topa, midik pa vang that leleng tuk cim?
5 Abraham in ka celnu hi tin, Sarah vangin Abraham cu ka upa hi ti bok hi. Mah hangin hi ka bawlmi hi, lungmu thiangno in ka bawlmi hi, sualnak bawl mang,” tin Abimelek in ti hi.
6 A mang lelengah Pathian in, “Hi zuh hi, lungmu thiangthono in, na bawlmi hi tih cu thei ing, mah hangin ka maiah misual pa na hih ngawlnak tukin Sarah ka zen khaktik ngawlnak hi.
7 Mahnaven atu-in, Sarah cu a pasal lakah hawhtikin hi. A pasal cu profet hi a, na thih ngawlnak tukin, thunget sak tuk hi. Mahnaven na kiktik ma tale nangmah le na innkua hawng uhin thi tatak tuk uh ci; ngallinnak atu-in pia ing,” ti hi.
8 A zingten zingtungno in Abimelek cu tho in, a umlawh a sam khawng ceng ten mah thu cu ciangno in hilh hi. A umlawhte cu thinsuzet haw hi.
9 Abimelek in, Abraham cu samin, a lakah, “Ka hum uh a, na bawlmi hi iti bang thu kaw? I sualnak na humah ka bawl hangin kaw hitih bang lauhuai hi keimah le ka ngam humah na hentik? Ka hum a, na bawlmi bang hi kuamah in bawl awng haw tukma hi.
10 Ita hitih bangin bawl cim?” tin dong hi.
11 Abraham in, “Pathian a kihcatu hi ngamah um haw tukma a hih tak ka zi co nuamin, keimah that thong haw kawn, tih ka ngaihsut hangin hi.
12 Mah bek tham ngawlin Sarah hi ka celnu tatak hi. Amah cu ka pa i canu hi; mahnaven ka nui hin mi a hih ngawl hangin huai ing.
13 Pathian in, ka pa i inn zamsanin, ka hen awng ngawlnak ngamah a hah ten, ‘Ka hum a, muantak ngangai na hihnak langtik tukin, ka ningpa hi tin a hawhnak hempoh uhah ti in hi;’ tin Sarah cu ka tepsa mi ti hi.”
14 Abimelek in, Sarah cu Abraham lakah pialeh hi; mah hum pen tuu, khui le sila tampi pia cih hi.
15 Abraham lakah, “Hi ngam hempoh hi keimata hi; na nuamnak pawpohah umin,” ti hi.
16 Sarah lakah, “Na ningpa i lakah ngun tangka thawng khat pia ing. Hi cu na elkim a, ummi hempoh lakah sualnak nei ngawl na hihnak langtiknak tuk hi. Mi hempohin sualnak na bawl ngawllam thei haw tuk,” ti hi.
17 Itahim titale Abraham zi Sarah hum a, thil mawi ngawl a bawl haw hangin, Topa in, Abimelek innsung a, um numei hempoh cu ca cawi thei tuk ngawlin bawl hi.
18 Mahnaven Abraham in, Abimelek ca in thungen a, Pathian in, Abimelek le a zi le a sila numei cu damtik khawngin, ca vang cawileh thei haw hi.