22
Pathian In Isaak Pia Tukin Abraham Thupia
1 Ngeican umngawlin Pathian in, Abraham cu thiatha zo in, a lakah, “Abraham,” tin sam hi. Abraham in, “ Topa, hi laiah um ing,” ti hi.Ref 22:1-13 Heb 11:17-19;
2 Pathian in, “Na ih zetmi na capa neihcalam Isaak cu pui inna, Moriah ngamah hawhpihin hi. Mahlai ngam a ummi, ka lak tukmi mualhumah Isaak cu biakpiaknakah pia in,” ti hi.Ref 22:2 2Khang 3:1;
3 Abraham cu a zingten zingtungno tho in, biakpiaknak a, man tuk thingkang la in, a capa Isaak le a umlawhpa nihte tuah a laakkung bawlin hawhpih hi. Pathian i a hilh hamsa mi ngamah hawh pan haw hi.
4 A ni thumnak ten mah mun cu khawlapi pen mu hi.
5 a umlawh tei lakah, “Laak tuah hilai munah na um un. Kei le ka capa cu Pathian bia tuk ung. Ka biak celh uhten na lak uhah kikleh tuk ung,” ti hi.
6 Abraham in, biakpiaknak tuk thingkang cu a capa puatik hi; meisah le naam keng thahin, a paca haw in hawh haw hi.
7 Isaak in, “Pa aw,” tin sam hi.
A pa in “Ikaw, Ka capa?” tin ti hi.
Isaak in, “Meisah le thingkang keng nave hung a, biakpiaknak tuk tuuno ilai ah heng?” tin dong hi.
8 Abraham in, “Amah Pathian in pa kha khat ngaihsutsak tuk poh hi,” ti thahin, a paca haw in, langkhat ngut haw hi.
9 Pathian i hilhsa mi mun a hen haw ten, Abraham in biaklan dawhin, a humah thingkang cu koih hi. A capa Isaak cu keenin biaklandawh hum a, thingkang humah sial hi.Ref 22:9 James 2:21;
10 a capa that tukin a naam cu dawktul hi.
11 Mah laih takin, Topa i vancungmi in vancung pen, “Abraham, Abraham!” tin sam hi.
Abraham in, “ Topa hilai hah um ing,” tin don hi.
12 Vancungmi in, “Na capa that pahsun; a humah imah bawl pahsun. Na capa neihcalam ka ca tukin na phal hangin, Pathian kihcazet ci tih cu thei zo ing,” ti hi.
13 Abraham in, a elkim a zoh ten, tuucang pa khat khau ngui lakah a ki pen awkin mu hi. Mah tuu cu la in, a capa ai-in, halkang biakpiaknakin mang hi.
14 Mah mun cu Abraham in, “Jehovah Jireh,”note 22:14 Jehovah Jireh tih cu Topa in pia hi tihnak hi. tin minsa hi. Mah hangin tutianin, “ Topa i mualah Topa in pia hi,” tin miten sam vawk hawta hi.
15 Topa i vancungmi in, Abraham cu vancung pen samlehin,
16 “Ka minin thutiam ing. Topa in hilh hi. Itahim titale capa neihcalam keima ca in, na phal hangin, thiamting zetin muicu pia tung.Ref 22:16-17 Heb 6:13-14;
17 Na casuante cu pungzaitik tung a, van aksi zah le tuipi philnel zahin tam haw tuk hi. Na casuan ten a ngal haw neh khawng haw tuk hi.Ref 22:17 Heb 11:12;
18 Ka thupiak na ngaih hangin, na casuante muicu ka piak bangin, leihum hinnam hempoh ten muicu ngen haw tuk,” ti hi.Ref 22:18 Nung 3:25;
19 Abraham cu a umlawh tei lakah kiklehin, a venghawng haw in, a umnak haw Beersheba ah pinleh haw hi.
Nahor Casuante
20 Ngeican um ngawlin, Abraham in, a unau pa Nahor le Milkah ten capa liat hing haw tih cu za hi.
21 Upabel cu Uz hi, a naupa cu Buz hi a, Aram i pa Kemuel le
22 Khesed, Ha zo, Pildash, Jidlaf le Bethuel hi.
23 Bethuel cu Rebekah i pa hi. Abraham i nau, Nahor i zi Milkah in capa liat hing hi.
24 Nahor i zineu Reumah in Tebah, Gaham, Tahash le Maakah hing hi.