5
Na Luatnak Uh Pha No In Kem Un
1 Khrih in, a luattik zo hangin ohte cu a luatmi hi zo hung hi. Mah hangin miluat na hihnak uhah khohkhah zetin ding unna, salah cangleh toh pahsuh un hi.
2 Ka hilhmi ngai hem un; vuncep na tanduntik uh ahi tale Khrih cu nohtei ca in nemcuamnak imah nei hihim ma tihnak hi.
3 Ngallinnak thupialeh hih tung, kua hei in, vuncep na tanduntik uh tale, Daan cu a venghawngin, a zui khawng kul tuk hi.
4 Noh tei lak pen Daan zui in, Pathian mai ah thiancotiknak a nei nuamtu cu Khrih tuah na pehzopnak khau cu satcat zo uh ci. Mahbek tham ngawlin, Pathian hehpihnak i pualamah heng zo uh ci.
5 Mahnaven ohtei a muansan uhmi cu Pathian amah in thiancotik tuk tihmi hi. Mahmi cu eimu upnak i hangin Pathian i Hawvangin bawlsuak tuk hi tih a ngahhelhzet uhmi hi.
6 Itahim titale Khrih Jesuh tuah a pehzomdun uh tale vunceptalhnak hihen, tan ngawlnak hei hihen, dangdunnak umma hi. A thupimi cu itdunnak sung pen na a dektu upnak bek khi hi.
7 Na hawhdan uh cu phazet leng hi. Thutak na zui zo uhmi khi a koi thu in kaw na colhleh thong uh? Itin zoldiak kaw?
8 A cawltiktu cu Pathian kha ma si! Amah cu nangmuhte a samtu saw hi.
9 Thupaucapnakah, “Naman neuno in cangho phil a venghawngin thotik khawng,” a tihmek haw mi kim khawng ngangai si!Ref 5:9 1Kor 5:6;
10 Mahnaven nohtei humah muansannak nei leng laih ung. A Topa uh sung pen a pehzopnak uh i hangin na lungmu uh lamdang tukma tih cu muangzet poh ing. A nawngkaitiktu, kua hei hi tahen, Pathian i thukhennak tawk tuk poh hi.
11 U le naute aw, ka dinmun hi ngaisung teh hem un. Vunceptan kul hi tin, thu ka hilh ngai bang ahin, i hangin kaw bawlsiatnak ka thuak lih laih? Mahti bangin thu ka hilh ngai bang ahin, Khrih i thinglamteh thu ka son lihmi hi mitei lupbahnakah cang tukma hi.
12 A nawngkai litiktu hite hi a tawp tian a lampi haw zui vanglakin tilnget vanglak hawleh awi ing.
13 Mahnaven u le naute aw, nohte cu miluat hi tukin sam mite uh ci. Mahmi luatnak cu na taksa nopsaknakin cangtik pahsuh un. Mah sangin itnak tuah pa khat le pa khat nadek tondunin bawmdun saw un hi.
14 Itahim titale Daan hempoh cu, “Nangmah na ihdun bangin na inn nelte it in hi,” tihmi thukham pa khat sungah hin kim khawng hi.Ref 5:14 Thiam 19:18;
15 Mahnaven hampa lak a ngamsate bang nungca in, pa khat le khat khuatdun le sikdunin, na um uh tale ngalling un, bolal thongleh khawng tuk uh ci.
Hawvang Nunnak le Mihing Tisa
16 Ka hilh nuammi cu hitih bangin hi; Hawvangin, na nundan uh a uk tale mihing i tisa deihnak cu a thin kimtik tukma uh ci.
17 Itahim titale mihing tisa i deihmi cu Hawvangin hua in, Hawvang i deihmi cu mihing tisa vangin hua bok hi. Mahpa nihte cu a ngaldun haw hi. Mah hangin na nuammi khi bawl thei ma ci. Ref 5:17 Rom 7:15-23;
18 Pathian Hawvangin lam a huai tale Daan nuai ah a nungmi hi lehma toh uh ci.
19 Mahten mihing tisa i bawlmite cu langciang hi. Nupa sualnak, a ninmi ziaza, a mawingawlmi nadehnak, milim zuk biaknak le pol sesuakte khi hi.
20 Mi pa khat le pa khat ngaldunin haudun haw, iksikdunin, thinuk haw, hampumin, ahon ahonin khendun haw hi.
21 Iksiknak nei in, zukham misil haw, zoh mawi ngawlin awnin au haw; mahtih bangin a dang tampi bawl pepel haw hi. Ngallinnak thu masa in hilh zo naveng atu-in hilh not leleu tung. Mahti bang a bawltute cu Pathian Uknak co thei haw tukma hi.
22 Mahnaven Hawvang i ngah a ngahtikmi cu itdunnak, lungdamnak, thinnopnak, lungmuannak, hehpihnak, phatnak, muantakmi hihnak,
23 niamkhiatnak le lungmu sup theihnakte hi. Mahti bang a ngah umnakah daan cu kul lehma toh hi.
24 Jesuh Khrih i ta a himi in, mihing tei taksa deihnak le tisa nopnak cu thinglamtehah khencih zo haw toh hi.
25 Hawvangin nunnak a piak zo hangin a nunnak uh vang cu Hawvangin uk tuk hi.
26 Pualthau tukmi hi ma hung; pa khat le pa khat thinna tikdun tukmi hi ma hung hi; pa khat le pa khat iksikdun tukmi hei hi ma hung hi.