4
1 Ka hilh nuammi cu hi tin hi; ca pa khat cu a pa i lo le lam co khawng tuk le ihempoh nei khawngtu tuk ahi hei in, sal bangin dek hi
2 Naupang a hih laih sungah a pa i huntep a kim laihngawl sungzong cu a cingkhawitu le a nate a sonsaktu um haw hi.
3 Mahti bangin eimuhte vang cu hawvang lam pen a piting uh laih ngawl sungin lei le van laklawh a thuneitu hawvang tei sal hung hi.
4 Mahnaven hun thiahmi a hen hun ten Pathian in, a Capa hah hi. Numei sung pen hingin Judah tei Daan nuai ah nung hi.
5 Mahmi cu Daan nuai a umtute tan tukin le Pathian i cate a cantheihnak tukin hi.Ref 4:5 Rom 8:15-17;
6 Mahten a cate na hihnak uh langtiknakin Pathian in, a capa i Hawvang cu eimu lungmu sungah pia hi. Eimu lungmu sung pen, “Ka Pa, Ka Pa,” tin, a autu cu mah Hawvang hi.
7 Mahti bang a hih hangin sal hi lehma toh uh ci; ca hi zo uh ci. Mahten a ca na hih zo uh hangin Pathian in, a ca tei ca in, a koihmi thil hempoh cu pia tuk hi.
Paul In Galati Tei Ca Ngaihsutsak
8 Tanglaihin Pathian thei ma uh ci; mah hangin Pathian ahi ngangai ngawlmi i sila uh ci.
9 Mahnaven atu-in Pathian thei ngah zo uh ci. Mah ahimata Pathian in nohte thei ngah zo hi, mah nungten itin kaw mahtih bang hawvang nawmtam le nemcuamnak nei ngawl tei lakah na kihleh nuam lih uh? A sila haw hileh tukin itin kaw na nuamleh uh?
10 Noh ten ni cuampeng, ha cuampeng, hun cuampeng, kum cuampeng nei in mang uh ci.
11 Nangmuh ka ngaihsutnakin ka lungmu cawl ing. Nangmu ca cim zetin na ka deh uhmi hempoh cu imah ngawlthongin cang kha kawn tih lauzet ing.
12 U le naute aw, nangmuh bangin um bok zo ing; nangmuh hei Daan thu ah keimah bangin um bok un hi tin ngen ing. Tu tianin ka humah siatnak bawl ma laih uh ci.
13 Nangmu lakah masabel Thuthangpha ka phuan ten i hangin kaw tih cu cing tuk laih uh ci; ka dam ngawlnak hangin hi!
14 Ka dam ngawlnak cu nangmu ca in ngitzet naven zohneu in, nunghek cuang ma uh ci. Mah sangin vancungmite na cosan uh bang khin keimah sang uh ci. Khrih na cosan uh bangin keimah sang uh ci.
15 Mah hun laihin, lungdamzet nave uhcin atu-in ni dang laih bang ma uh ci. I cang khawng uh cim? A cangthei ahin na mit saizang cawm pholhin, piak phal tuk uh ci tih cu keimah loli in, ka hilh ngammi hi.
16 Tu hi cu thudik ka hilh taktoh cu na ngal uhin cang lehlam bang um sing maw?
17 Midang ten nangmu ca ngaisungzet bang haw naven a tuptah ngangai haw mi cu sia hi. A tuptah haw mi cu nangmuh le keimah khenduntikin, nangmu ca ngaihsaknak a neih haw bangin nangmuh vang amu ca in ngaihsaknak nei in amu lam tangtu hi le uh ci tih a deihnak haw hi.
18 Mahti bang ngaihsak dunnak neih hi cu tuptahnak a pha tale phazet hi. Nangmu lakah ka um sung bek hi ngawlin i hun bang hunah ahi hei in, a pha lelengmi hi.
19 Ka itmi ka cate aw, numei ten naukei a thuak bangin Khrih i mel nangmu sungah a pian laklawh thuakleh hih tuk bangin um sing.
20 Atu-in nangmuhte tuah um langkhat thei ahin nuamzet sing; mahten ka ngaihsutnak vang dang deuh tuk naven! Nangmu ca in helhkamzet pohpah ing.
Hagar le Sarah Tehkipnak
21 Nangmu lakah Daan nuai a um hih nuam tei thu dong hih tung. Daan i tihmi hi thei ngah ngangai uh cim?
22 Daan laibu ah Abraham in capa pa nih nei in; pa khat cu a sal nu i hinmi hi a, a dang pa khat cu a luatmi numei i hinmi hi, tin ti hi.Ref 4:22 Pian 16:15; 21:2;
23 Salnu i hinmi pa cu ca dang hindan bangin hinmi hi; mahnaven a luatmi nu i hinmi capa cu Pathian thutiamnak hangin hinmi hi.
24 Hi pa nih tei thu hi tehkipnakin man theihmi hi. Numei pa nihte hi thutiam pa nih tei ai-in hi haw hi. Saltannak pen ca a hingtu Hagar cu Sinai Mual pen piakmi thutiamnak hi.
25 Arabia ngam Sinai Mual ai-in, a dingtu Hagar cu Jerusalem khuapi i hi, a cate cu saltannak sung ummi hi khawng haw hi.
26 Mahnaven vancung Jerusalem cu a luatmi nu hi a, amah cu a nu uh hei hi.
27 Lai Thiangtho in;
“Ca nei thei ngawl nu aw,
na lungdamin hi!
Naukei nat a thuak
awng ngawl nu,
lungdam thatui zetin
au in hi!
Itahim titale zamsanmi nu in,
a pasal tuah a um langkhat
lelengmi nu sang pen
ca tam saw nei tuk,” ti hi.Ref 4:27 Isa 54:1;
28 U le naute aw, atu cu Isaak bangin Pathian thutiamnak hangin hinmi Pathian i cano hi uh ci.
29 Mah hun laih takin, mihing dan bangin hinmi capa in Pathian i Hawvang i hangin hinmi capa cu bawlsia hi. Tu hei in mahti bang leleng hi.Ref 4:29 Pian 21:9;
30 Mahnaven Lai Thiangtho sungah itin kaw a um? “Salnu le a capa cu hawlvawkin; itahim titale salnu i capa le a luatmi nu i capa cu a pa haw i lo le lam co kawmtu hi thei haw tukma hi,” tin um hi.Ref 4:30 Pian 21:10;
31 Mah hangin u le naute aw, ohte cu salnu i ca hi ma hung hi. A luatmi nu i cate hung hi.