6
Vanngit Puak Bawmdun Un
1 U le naute aw, nangmu lak pen pa kha khatin sualnak bawl na mu kha pang uh tale nangmu sung pen a hawvang mi deuh ten lamdikah pui kikleh un hi. Mahtin na bawl uhten thinnemnak tuah bawl un. Mahten nangmuh lala vangin mah sualnakah cak bok tuk ngawlin ngalling un hi.
2 Pa khat le pa khat bawmngit dawndun unna, mahten Khrih i daan cu kimtik tuk uh ci.
3 Mi pa kha khatin imah ngawl napi in, mi thupi bangin a ngaisung duncoptu cu amah le amah zoldun cop hi.
4 A kuakua hei hihen a nadeh haw dan amuhno in, a sia le pha khen thiam tukmi haw hi. A pha ahi tale midang tei nadeh tuah tehdun lih kul ngawlin amahno a lungnop tuk hi.
5 Itahim titale mai nadehnakah lungtho tek tukmi hung hi.
6 Khristian Thuthangpha zilh sa mi in, thilpha a co mite cu amah a zilhtu khi a kawm bok tukmi hi.
7 Nangmah le mah zolduncop pahsun hi. Kua hei hihen Pathian cu zawnsak thei haw ma hi. Mihingin amu cinmi bangkekin cawmleh haw tuk hi.
8 A taksa deihnak huanah a cingtu in thihnak cawm tuk hi. Hawvang anci a cing tale cu mah Hawvang i lak pen kumkhua nunnak cawm tuk hi.
9 Mah hangin a phami bawl cu colhsan pahsuh un. A colhsan uh ma tale ancop hun hengleh tuk hi.
10 Mah hangin hun pha a tawh uh hempoh ah kuakua i humah hei hihen a phami cu bawl nung inna, Khristian a upnak uh lam pen a innkua tei lakah a cuangin bawl tuk hung hi.
Thukhupnak le Nuksatnak
11 Hi laikuat hi nangmu lakah keimah in ka khut loli tuah laimal ngengpi tuah ka ngatmi hi zo hem un!
12 Vunceptan un tin, a titute cu akua kaw ti ahin a pualam thil humah a sunsaktu le a tuangkhawngtu haw hi. Mahti bangin a tihnak haw cu thudang hang hei hi ngawlin Khrih i thinglamteh hangin bawlsiatnak a thuak ngam ngawl haw hangin hi.
13 Vunceptalhtu amuh lala vangin Daan cu zui cuang haw ma hi. Vuncep talhtik a nuamnak haw cu vuncep na tannak uh i hangin taksa lam pen amuh zuitu na can uh hangin a tuangkhawn theih hawnak tukin hi.
14 Mahnaven kei ca in, a Topa uh Jesuh Khrih i thinglamteh sial ngawl tuangkhawn tuk a dang imah nei mang. Itahim titale Khrih cu thinglamtehah a thih zo hangin hi leihum pi hi kei ca in thi zo a, kei vang hi leihumpi i ca in, a nungmi hileh bokma toh ing.
15 Mi pa kha khat vunceptalhmi a hih le hih ngawl cu imah thupi ma hi; a thupimi cu hinthak hihnak khi hi.
16 Mah thuman cu a nunnak hawah a nisialin, a zuitute cu Pathian i lemdaihnak le hehpihnak co zazal haw tahen. Pathian i mihing hempoh tei nunah vangin um zal tahen.
17 Ka thu tawpnakah ka hilhnuammi cu; Kuamah in thubuai pialeh haw ma toh hen; Itahim titale ka taksa hum a, meima pawn a ummi in, Jesuh i sal ka hihnak langtik zo hi.
18 U le naute aw, Topa Jesuh Khrih i hehpihnak cu nohtei lakah um zal tahen. Amen.