3
Daan Maw Upnak
1 Galati misil honte! Akua kaw nohte a zialtu? Jesuh Khrih thinglamteh humah a thihnak cu na mit uhah ciang zetin cuang si!
2 Hi thu hi hilh teh un: Pathian Hawvang na co uhmi hi Daan i cialmi na bawlnak uh hangin maw, mahma tale Thuthangpha na zak uh le na upnak uh hangin maw na ngah uh?
3 Hi bang lawlawmin maw na sil uh! A taw na pat uh laihin Hawvang tuah pan uh ci; a tawpnak lam ten nangmuh tei ngilnak tuah tawptik maw na nuam uh?
4 Na nunnak uh i tawh sami hempoh imah ngawl thongin maw a can khawng? Imah ngawl hi khawng haw ma hi; nemcuamnak nei haw hi.
5 Pathian in Hawvang pia a, nangmuh tei lak a nalamdang a bawlmi khi Daan zuinak hangin maw? Mah ahimata Thuthangpha zain, na up uh hangin kaw?
6 Abraham i thu khi ngaisung hem un, Lai Thiangtho ah “Abraham in Pathian umin, mah a upnak hangin Pathian in midikin cosang hi,” tin um hi.Ref 3:6 3:6 Pian 15:6; Rom 4:3;
7 Na theih tuk uhmi cu Abraham casuan ngangai cu upnak nei mite haw hi.Ref 3:7 Rom 4:16;
8 Lai Thiangtho in, “A upnak haw i hangin Gentail mite cu Pathian in midikin sang tuk hi,” tin ti zo hi. Mah hangin Abraham lakah Lai Thiangtho in hi. “Nangma hangin mi hempoh Pathian in thupha pia tuk hi,” tin Thuthangpha cu than hi.Ref 3:8 Pian 12:3;
9 Abraham in, a upnak hangin thupha co hi. Mahti bang bokin a umtu hempoh cu thupha co bok haw tuk hi.
10 Daan zuinak a muangtu cu tamsiatnak nuai ah a umte haw hi. Itahim titale Lai Thiangtho in, “A kuakua hei hihen Daan laibu sung a ngat bang loli in, a zui leleng ngawltu cu Pathian i tamsiatnak nuai ah um haw,” ti hi.Ref 3:10 Nung 27:26;
11 Lai Thiangtho in, “Upnak hangin Pathian i dikcangnak cotik mite bek nung haw tuk hi,” a tihnak hangin Daan zuinakin kua mah dikcangnak ngah haw ma tih cu ciang zo hi.Ref 3:11 Hab 2:4;
12 Mah hangin Daan le upnak cu pehdunnak nei haw ma hi. Lai Thiangtho in, “Daan i deih bang loli in, a bawl khawngtu cu nung tuk,” ti hi.Ref 3:12 Thiam 18:5;
13 Mahnaven Khrih cu eimu ca in tamsiatmi a hih hangin Daan i henpihmi tamsiatnak pia in, tanleh zo hi. Itahim titale Lai Thiangtho in, “A kuakua hei hihen thing hum a takmi cu Pathian i tamsiatnak cotu hi,” ti hi.Ref 3:13 Daan 21:23;
14 Khrih in hitih bangin a bawlnak cu Amah Jesuh Khrih i hangin Pathian in Abraham lakah a tepmi thupha cu Gentail miten a conak tukin le upnak hangin Pathian i tepsami Hawvang a conak tukin hi.
Daan le Thutiam
15 U le naute aw, nisialin amuh le a tawh uhmi pen tehkipnak la tung hi, thu pa kha khatah mi pa nih lungkimin, lungkimnak a bawl haw ten kuamah in phiah theih le beet theihmi kha ma hi.
16 Mahti bangin Pathian in Abraham le a casuan tei lakah a thutiamnak bawl hi. Lai Thiangtho in, “Casuante” tih awnkam mang ma hi. “Casuan” tih bekin mang hi, a tih nopmi cu mihing pa khat hi a, Khrih hi.Ref 3:16 Pian 12:7;
17 Ka hilhnuammi cu Pathian in Abraham tuah thutiamnak bawlin mah thutiamnak cu zui suak khawng tukin tiam hi. Kum za li le sawm thum nungten piakmi Daan in, Pathian i thutiamnakte phiat thei ma hi.Ref 3:17 Suah 12:40;
18 Itahim titale Pathian i laksawng cu Daan i hangin tih ahi tale ama thutiamnak hangin kha ma tihnak suak tuk hi. Mahnaven Abraham lakah Pathian i laksawng a piaknak cu Abraham lakah thutiamnak a bawl zo hangin hi.Ref 3:18 Rom 4:14;
19 Mahti bang ahi tale Daan i tuptahmi ngangai cu i kam ni? Sualnak tihmi hi ihim tih langtiknak tukin hi a, Abraham casuan lakah tepsami a hih bangin Abraham casuan i hen tian nung leleng tukin piakmi hi. Daan cu vancungmi ten mihing tei lakah piakmi hi a, vancungmi le mihing tei laklawhah palai pa khat um hi.
20 Mahnaven mi pa khat bek i nadehnakah palai um kulma, Pathian cu pa khat bek hi.
Daan i Tumtahmi
21 Mahti bang ahi tale Daan le Pathian i thutiam cu kalhdun haw maw? Kalhdun hihim ma hi! Itahim titale mihing lakah nunnak pia theitu daan um bangta ahin mahmi daan zuinakin, Pathian mai ah thiancotik hi khawng tuk hi.
22 Mahnaven Lai Thiangtho in, “Leihum buppi hi sualnak huham i nuai ah um,” ti hi. Mah hangin Jesuh Khrih muansannak hang bekin tepsami Pathian i thutepnak laksawng cu a umtu hum bekah piak hi.
23 Mahnaven upnak tuk hun a hen laih ngawlin Daan in thawngtami bangin hantangtik hi; mahmi cu upnak a hen laih ngawl sungin hi.
24 Mah hangin upnak i thawmin Pathian i mai ah thiancotikmi a hihnak tukin Daan cu Khrih i hun laih ngawl sungin mi uktu hi.
25 Atu-in upnak hun a hen zo hangin Daan cu uktu hi lehma toh hi.
26 Upnak hangin na venghawng uhin Pathian i cate hi uh ci a, Khrih Jesuh tuah pehdun zo uh ci.
27 Khrih tuah pehzop dunnak sungah tuiphummi hi zo uh ci.
28 Mah hangin Judah mi le Gentail mi tin deidat dunnak umleh ma toh hi; sal le a luatmi, numei le pano ah hei hihen deidat dunnak umleh ma toh hi. Na venghawng uhin Khrih Jesuh tuah pehzop dunnak sungah pa khat hi uh ci.
29 Khrih i ta na hi uh tale Abraham casuan hi uh ci a, Pathian i thutiammi co tuk uh ci.Ref 3:29 Rom 4:13;