2
Paul le Nungzuitu Dangte
1 Kum sawm le kum li nungten Barnabas tuah Jerusalem ah hawhleh ing. Titus vang hawhpih bok ing.Ref 2:1 Nung 11:30; 15:2;
2 Pathian in, a tiik hangin hawh ing. Bulpakin Khristian puitute tawk ing a, Gentail mitei lakah Thuthangpha ka phuan thu amu lakah son ing. Ka deh sami hihen atu ka deh lih laihmi hei hihen thawn thong a can khawng tuk cu awi mang hi.
3 Ka nadehpih Titus cu Grik mi hi naven vunceptan tukin kuamah in tiklo ma ung hi;
4 Vunceptan hen a titu hei um haw hi. Mi khenkhat thu umtu ngangai bang um hemin, eimu bu sungah tum kuhin Khrih Jesuh tuah a pehzop dunnak uh i hangin zalennak a conak uh thu a zawldawttu um haw hi. Eimuhte salah cangleh tukin a deih haw mi hi.
5 Mahnaven nangmu ca in Thuthangpha humhim ka nuam uh tak mah mitei lakah dawm hei nungkik ma ung hi.
6 Hotu bang a ngaihsut haw ten ngaihsutnak thak imah pia haw ma hi. Pathian in, a pualam thil zo ma a hih hangin mah hotute cu iti bang ahi haw hei in, kei ca in lamdang cuang haw ma hi.Ref 2:6 Daan 10:17;
7 Ngaihsutnak thak piatu lam hi ngawlin Judah mitei lakah Thuthangpha phuang tukin Peter cu Pathian in dehvo a piakmi amuh haw bangin, kei hei Gentail mitei lakah Thuthangpha phuang tukin Pathian dehvo a piakmi khi a mutu na hi haw hi.
8 Itin kaw titale Pathian huham hangin Judah mitei lakah Peter cu palai a hih bangin kei vang Gentail mitei lakah palai hi bok ing.
9 Hotu tin ngaihsutmi James, Peter le Johan ten hi nadeh sunglawi hi Pathian i piak hi, tih thei haw hi. Mah hangin nadek langkhat mi hung hi, tih langtiknakin Barabbas tuah ka khut uh len haw hi. Mahten keimah le Barabbas cu Gentail mitei lakah nadek tukin le amuhte cu Judah mitei lakah nadek tukin lungkimnak nei ung.
10 A nget haw mi pa khat cu amu lak a, mizawngte khi phawkngil thong tuk ngawl, tihmi hi a, mahmi cu thatui zetin ka deh lih uhmi hi.
Antiok Pen Paul In Peter Liat
11 Mahten Antiok khua pen Peter i zin ten mipi mai pen cangcian zetin mawhsiat ing. Itahim titale sual ngai hi tih ciangzet hi.
12 James i hahmi a hen haw laih ngawlin Gentail unaute tuah an ei langkhat mek haw; mahnaven mah tei hen nungten vunceptan pha a titu a lau hangin Gentail mite cu nunghekin amu lakah an eileh nuam ma hi.
13 Judah mi unaupihte hei Peter bangin ngalnawmin nungkik haw hi. Barnabas nangawn a ngal nawmnak haw cu sun kha bok hi.
14 Thuthangpha i lamcam a lakmi bangin zui haw ma tih ka muhten Peter cu mipi tei mai pen, “Nang cu Judah mi hi navecin, Judah nundanin nung ngawlin, Gentail mi bangin nung ci. Mah ahi tale itin kaw Gentail mite cu, Judah mite bangin nung tukin, na tih lo theih tuk?” tin ti ing.
Judah le Gentail Ten Upnak Hangin Nunpatnak Ngah
15 Kohte cu ka hinsuk bek uhten Judah mi toh ung hi. “Gentail misualte,” tihmi hi kha hihim ma ung.
16 Mahnaven mihingte cu Jesuh Khrih upnak bek hangin Pathian mai ah thiancotiknak ngah hi. Daan zuinakin hi awng ma tih thei hung hi. Mah hangin kote vang cu Khrih ka upnak uh hangin Pathian mai ah thiancotikmi a hih theihnak tukin, Khrih Jesuh um hung hi. Itahim titale Daan zuinak hangin mihingte kuamah Pathian mai ah dikcangnak ngah haw ma hi.Ref 2:16 Saam 143:2; Rom 3:20, 22;
17 Jesuh Khrih tuah a pehdunnak uh i hangin Pathian mai ah diknak cotikmi hi tukin a zuam lih uhten Gentail mite bangin “Misualte” tin sam co ahi uh tale Khrih cu sualnakah a hawhpihtu hi, tih theih a ni maw? Tih theih hihim tukma!
18 Ka siatsuah zo mi Daan khi ka zuileh tale Daan a palcattu cu keimah ing, tih a langtik hi tung hi.
19 Daan i cungcangah kei cu mithi ing hi; Pathian ca nung tukin Daan in kei thitik zo hi. A thinglamteh humah kei cu Khrih tuah thahcih mi hi zo ing.
20 Mah hangin a nungmi cu kei hi lehma toh ing. Ka sung a nungmi cu Khrih saw na hi. Atu nung ing ka tihmi cu keimah it in, keima ca nun a piatu Pathian Capa upnak tuah nung ing.
21 Pathian i hehpihnak cu zamsan thei mang. Mihingte cu Daan zuinak hangin thiancotik ahi tale Khrih thihnak cu man nei ngawl thawnthongin cang tuk hi!