GALATI
Khua Khristian Tei Lakah Paul i Laikuat
(Paul’s Letter to the Galatians)
Thulamsial
Judah miphun kha ngawlmi Gentail tei lakah Jesuh thu cu hilh pan haw in muangtu a tam dedeuh haw ten Khristian tatak a hih theihnak haw tukin Moses Daan a zui bok haw kul maw, tihmi thudotnak piang hi.
Paul in kulma ti hi. Thungai titale Khrih sung a nunnak uhah upnak hi a thupibel hi, tin ti hi. Mahmi upnakin eimuh le Pathian laklawhah lemdunnak umtik hi, tin ti hi. Mahnaven Galati ngamsung pawlpi khenkhatah Paul dodaltute hungin Pathian tuah lemnak na deih uh tale Moses thukham zui un, tin ti haw hi. Galati ngam hi Rom Acozah i ukmi ngam Asia Minor ngamsung ummi hi.
Galati ngam a Khristian tei lakah Paul i laikuat a ngatmi hi zilhsualnakah a hawhmite upnak man le bawlnak dikah pui kikleh theihnak tukin a ngatmi hi. Paul in kei cu Jesuh Khrih tiikmi diktak ing hi tin nanglo hi. Mihing tei thuneihnakin sammi kha mang, Pathian i sammi ing, ka nadehmi vang Judah mi ahi kha ngawl tei lakah hi, tin ti hi. Pathian le mihing a pehzopdunnakbel uh cu upnak pa khat bek hi, tih khi a thupibelin, a ngatmi hi. Mah i humah Khristian tei ngamtat dan tihmi hi Khrih a upnak uh pen a suakmi itdunnak i ngah hi tih thu Paul in, a dawltabelin hilh hi.
1
1 Paul in mihing tei samnak le cial thong hangin a dektu hi ngawlin, Jesuh Khrih thihnak pen a tholehtiktu Pa Pathian le Jesuh Khrih i tenmi le tiikmi ing ti hi.
2 Galati ngam a um pawlpimi hempoh tei lakah keimah tuah a um langkhattu Khristian unaupih ten nuksat ung hi.
3 A Pa Pathian uh le Topa Jesuh Khrih in hehpihnak le lemdaihnak cu nohte pia tahen.
4 Tuhun hi hunsia sung pen ohte luattik tukin Khrih in Pa Pathian i deihnak zui in, ohtei sualnak hangin a nunnak pia zo hi.
5 Pa Pathian nelah sunloihnak cu a kumkhua in um leleng tahen! Amen.
Thuthangpha Pa khat
6 Khrih i hehpihnak tuah a samtu cu nunghekin Thuthangpha dang na pompaih zen uh ka muh ten lamdang sa mahtak ing.
7 Thuthangpha a dang, a um ngangai hangin ka tihnak hi kha ma hi; na lungmu uh a nautiktu le Khrih i Thuthangpha thek tum litu mihing a um haw hangin ka tihmi hi.
8 Eimuh hihen, vancungmi hei hihen nangmu lakah ka phuan lih sa uhmi Thuthangpha hi ngawlin thuthangpha a dang hilhtu a um haw tale bawlsiatnak munah heng haw tahen!
9 Hilh zo naveng hilh lehleu poh nang inna, na pom sa uhmi Thuthangpha sial ngawl thuthangpha a dang a hilhtu cu bawlsiatnak hellah heng haw hen!
10 Hitih bangin ka tih ten mihing tei lungkimnak a zei li bang ing maw? Ka tupmi cu mihing tei lungkimpihnak hi ma hi, Pathian i lungkim pihnak saw hi. Mihing tei thangphat tuk zei ing maw? Mihing tei mai ah minphatnak zei ka hi tale Khrih i nadektu hi tuk mang hi.
Khrih i Tiikmi A Cannak
11 U le naute aw, Thuthangpha ka phuanmi hi mihing tei lak pen a piangmi kha ma, tih hi nangmu lakah ka langtik nuammi hi.
12 Mihing tei lak pen ka ngahmi hi kha ma hi; Mihing kuamah i zilhmi hei kha ma hi. Jesuh Khrih amah in kei ma lakah a phuanmi hi.
13 Ka nundan cu thei khawng zo uh ci. Judah biaknak ka zui laihin, Pathian i pawlpi bawlsia i le a cimit tukin heh tin zuam ing.Ref 1:13 Nung 8:3; 22:4-5; 26:9-11;
14 Judah biaknak zui lamah ka khuk pih lak pen a manbel ing. Ka pu le pa tei daan zui lamah vang a cuangin muantak mi ing hi.Ref 1:14 Nung 22:3;
15 Mahnaven Pathian in, a hehpihnak hangin ka hin laih ngawlin teng zo in, ama nadektu tukin sam hi.Ref 1:15 Nung 9:3-6; 22:6-10; 26:13-18;
16 A Thuthangpha cu miphun dang tei lakah phuang thei tukin, a Capa ka lakah a langtik ten mihing kuamah i lakah thu siampih tukin zuan mang hi.
17 Keima laih ngawlin Jerusalem a um nungzuitu tei lakah hei zuan mang hi. Thakhatin Arabia ngam saw ah hawhin, Damaskas ah kikleh ing.
18 Kum thum nungten Peter tawk tukin Jerusalem ah hawh ing a, a nelah nipi nih sung cam ing.Ref 1:18 Nung 9:26-30;
19 A Topa uh i nau James sial ngawl nungzuitu dang kuamah tawk mang hi.
20 Hi tin ka ngatmi hi thuman hi; zolthu kha ma tih cu Pathian amah in thei hi.
21 Mah nungten Siria le Silisia ngamah hawh ing.
22 Mahlai takin Judah ngam a, Khristian ten bulpakin thei haw ma laih hi.
23 “Eimuh a bawlsia litu ten atu-in siatsuah a tummi a upnak uh thu phuang li haw hi,” tin sonmi thei haw hi.
24 Mahten keima hangin Pathian thangphat haw hi.