32
Sui Khuino
(Daan 9:6-29)
1 Moses cu mualhumah ngeipi umin hungsukleh ma tih Israel miten a theih haw ten Aaron lakah khawmdun haw in, a lakah, “Izipt ngam pen oh a puitultu hi mihing pa Moses cu i cang him tih, thei ma si hung; mah hangin eimuh puitu tukin pathian pa khat bawlsakin hi,” tin ngen haw hi.Ref 32:1 Nung 7:40;
2 Aaron in “Na zi uhte, na capa uhte le na canu tei sui bengbet cu duk khawng unna, ka lakah hunpih un,” ti hi.
3 Mah hangin mipi ten a sui bengbet cu duk khawng haw in, Aaron cu pia haw hi.
4 Aaron in bengbet cu la in, mei ah tuitik a, sui khuino milim bawl hi.
Mipi ten, “Maw Israel mite, Izipt ngam pen nohte a puitultu na pathian uh cu hi,” tin ti li haw hi.Ref 32:4 1Kum 12:28; Nung 7:41;
5 Mahti bangin a au lih haw cu Aaron in, amuh ten khui milim maiah biaklandawh bawlin, “Zingten Topa i sunloihnak tukin an eih puai bawl tuk hung hi,” tin thuthan hi.
6 A zingten zingtungno in Israel miten halkang biakpiaknak tukin ngan ngo haw a, pawlkom biakpiaknak tuk vangin ngan keng haw hi. Mipi cu khungthah, puai an ei in, zoh mawi ngawl tian nopdun haw hi.Ref 32:6 1Kor 10:7;
7 Topa in Moses lakah, “Manlangin tolhsukin hi, itahim titale Izipt ngam pen na puitulmi na mihing ten amu mualphonak bawl copdun zo haw hi.
8 A zui haw tukin ka piakmi lampi pen pial zo haw; amu ca in sui tuah khui milim bawlin, bia haw a, a lakah biakpiaknak bawl li zo haw hi. Izipt ngam pen a puitultu pathian cu hi, tin ti li zo haw hi.
9 Hi mihingte cu ka theihmi hi haw in, a lungmu haw ngengzet hi.
10 Mah hangin a kham tuk tum pahsun hi; ka thin a uk leita hangin siatsuah khawng tung hi. Nangmah le na casuante cu miphun ngengpi in bawl tung,” ti hi.
11 Mahnaven Moses in, Topa a Pathian nelah hehpihnak ngenin, “ Topa aw, cahnak le huham tuah Izipt ngam pen na luattikmi na mihing tei humah itakaw na thin a uk tuk?Ref 32:11-14 Mipum 14:13-19;
12 Israel mite mualhumah thitik nuamin le siatsuah khawng nuamin, a Pathian haw in Izipt ngam pen tultik hi,” tin Izipt miten ti haw tukma maw? Na thinuknak cu daitik inna, na lungmu khelleh zalin hi, mahti bangin siatsuahnak cu na mihing tei humah hengtik zal pahsun hi.
13 Na sal Abraham, Isaak le Jakob cu hu theileh zal inna, iti bang takin a lak hawah na min loli in thutiamin, “Van a ummi aksi zahin, na casuante cu tam haw tuk hi. Ka tepsa bangin hi ngam hempoh cu na casuan tei lakah pia tung a, kumkhua in amuta hi tuk hi, na tihmi khi phawkleh zalin,” ti hi.Ref 32:13 Pian 17:8; 22:16-17;
14 Mah hangin Topa cu a lungmu khellehin, a hilhsa mi siatsuahnak cu a mihing tei lakah hengtik ma hi.
15 Moses cu mualhum pen tolhsukin, thukham suangpeek nih a ngatmi pa nih cu cawi hi.
16 Hi suangpeek cu Pathian i bawlmi, a hum a, lai ngatmi cu Pathian thukham, Pathian amah loli i kuat a ngatmi hi.
17 Mipi authawm cu Joshua in, a zak ten, “A ngiahnak uh munah ngaldonak thawm thei ing hi,” tin Moses lakah ti hi.
18 Moses in, “Mah thawmnging cu ngalneh pahcoihnak la hi ma hi; ngallelin, a kahnak haw thawm hei hi kha sih ma hi. Kei ka zakmi cu lasak thawm,” ti hi.
19 Moses cu a ngiahnak mun nek dedeuhin khui milim le mipi a lam tawtok haw amuh ten a thinuk ngangai hi. A kenmi suangpeekte cu vawkin mah mual bulah sepkeh khawng hi.
20 A bawl haw mi khuizuk cu la in, a haal nungten ngawivamin, a vam cu tui humah zak hi. Mah tui cu Israel mi intik hi.
21 Aaron lakah, “Iti bangin na humah a bawl haw hangin kaw ti lawlawm sualnak na bawltik hi?” tin Moses in dong hi.
22 Aaron in, “Ka bawipa, ka lakah na thinuk zal pahsun hi. Himi hi thilpha ngawl bawl tukin iti bang zahta tuptahnak nei haw hum tih cu thei leng ci.
23 Ka lakah hungin, ‘Keimuh puitu tukin pathian pa khat bawlsakin; itahim titale Izipt ngam pen a puitultu, hi mihing pa Moses cu i cang hum tih thei ma ung hi,’ tin ti haw hi.
24 Akua in sui nei haw kaw, tin ka dot ten sui manpha nei hempoh ten dukin, pia haw hi. Mah sui cu mei sungah ka hah ten khui zuk na suak hi,” tin ti hi.
25 Mipite cu cinkhawi theih tuk hileh haw ma toh, tih cu Moses in mu hi; itahim titale a elkim hawah ngal tampi lak pen Israel mite cu Aaron in milim bia tukin hahzau khawng zo hi.
26 Mah hangin a ngiahnak haw i kongkhahah Moses cu dingin, “ Topa i ca in akua kaw a tang tuk? Topa i lam a tang nuam hempoh ka lakah hung un, tin nase zetin au hi.” Levi mite cu a lakah hung haw a, Moses in, a lak hawah,
27 Topa Israel i Pathian in, “Noh Levi mite ngalnam pa khat ten na la unna, hilai lam mawk pen ngiahnak langkhat lam mawk tian hawh un hi, na unau uh hihen, na ngualcampih uh le na innnel hihen, that khawng un hi, tin ti hi,” tin hilh hi.
28 Levi miten Moses i thupiakmi bangin bawlin, mah ni nguakcangin mihing thawng thum that haw hi.
29 Moses in Levi mitei lakah, “ Topa i ca in thiampi nadektu tukin na pum uh pia zo uh ci. Mah hangin Topa in tuni in muicu pia,” ti hi.
30 A zingten Israel tei lakah Moses in, “Sualnak ngengpi bawl zo uh ci. Mahnaven Topa i lakah mualhumah hawh nang inna, na sualnak uh ngaihdamnak tukin a lakah kun teh nang ngei,” ti hi.
31 Moses cu Topa i lakah hawhin, “Maw Pathian aw, itizah sualnak ngeng hum mipi ten a bawl haw tih cu thei leng ci. Amu ca in sui tuah pathian bawl zo haw hi.
32 A sualnak haw cu ngaidam zalin hi. Na ngaihdam tuk ngawl sangin na mihingte a min haw na khumnak na laibu pen ka min phiat saw in hi,” tin kun hi.Ref 32:32 Saam 69:28; Mang 3:5;
33 Topa in Moses lakah, “Ka hum a, a sualtu bek ka laibu sung pen a min phiat tung.
34 Mah hangin tu cu ka lak tukmi munah Israel mite hawhpihin hi. Zo in, ka vancungmi pui tung a, ni kha khat a hun kim ten a sualnak haw hangin dantat tung hi, tih cu ciing lelengin,” ti hi.
35 Topa in Israel mi humah natsia hengtik hi, itahim titale khuizuk bawl tukin Aaron a bawltik haw hangin hi.