31
Puanbuk Nadektute
(Suah 35:30-36:1)
1 Topa in Moses lakah,
2 “Judah phun sung pen Hur i tupa Bezalel, Uri i capa, cu teng zo ing.
3 Amah cu ka hawvanginnote 31:3 Ka hawvangin tihmi hi Hebru awnin ‘ruach” ti haw a ‘ngilnak’ tihvang hi thei. Hawvang Thiangtho tihnak hi ma hi. dimtik zo ing a, thil tihtheihnak, cihthiamnak le khutzung thiamnak a phunkim nei hi.
4 Innluang pungsan a phunkim suai thiamnak le mah cu sui, ngun le daal tuah suai theihnak nei hi.
5 Suang manpha tah thiamnak, thingtuah na phunkim bawl theihnak le khutzung thiam zetin, na phun dadang bawl theihnak nei hi.
6 Amah tuah nadek tukin Dan phun sung pen Ahisamak i capa Oholiab cu teng zo ing. Bawl tukin ka thupiakmi hempoh a bawl theihnak haw tukin a dang khutzung thiam tei lak heiah thil tihtheihnak tamzet pia zo ing.
7 Bawl tuk mite cu: Keima umnak Puanbuk, Thutiam Kuang le a sin, Puanbuk sung a, na hempoh,
8 Cabuai le sui tuah bawlmi meivaknak khuam le a nate, zimui namtui halnak tukin biaklandawh,
9 halkang biakpiaknak tukin biaklandawh le a na, khut somnak kuang le a tawdam,
10 Aaron le a capa ten thiampi na a deh haw ten a silh haw tuk puan manpha,
11 sathau thihnak tukin manmi situi le Mun Thiangtho a man tukmi zimui namtui hi. Hi na a bawl haw ten na lak a, thu ka piakmi bang cikcekin bawl khawng un,” ti hi.
Colhnak Ni
12 Topa in Moses lakah,
13 Israel tei lakah, “Ka sabbath ni cu cang un hi, itahim titale mah ni cu keimah le nangmuh le na casuan tei laklawhah Topa Keimah in nohte cu ka mihing ngangai in bawl zo ing hi, tih langtiknakin sialsiahnak hi.
14 Sabbath ni cu cang un hi, itahim titale nohtei ca in thiantikmi hi zo hi. Akua hei hihen sabbath ni a palcattu cu thah hi tuk hi, akua hei hihen sabbath ni cang ngawlin, na a dek tale, a mihing tei lak pen hawlvawk hi tuk hi.
15 Ni luk sung nadehnak hun nei uh ci; mahnaven ni salih ni cu a thiangthomi sabbath ni hi a, Topa i ca in ni thiangtho hi. Akua hei hihen mah ni-in, nadektu cu thah loli hi tuk hi.Ref 31:15 Suah 20:8-11; 23:12; 34:21; 35:2; Thiam 23:3; Daan 5:12-14;
16 Kumkhua phat thutiam, sialsiahnak a hih bangin Israel miten Sabbath ni cu cang haw tuk a, a casuan tei khan heiah cang leleng haw hen hi.
17 Himi cu keimah le Israel mi laklawh a, kumkhua melciknak hi. Itahim titale Topa keimah in van le lei cu ni luk sungin bawl khawng ing a, ni salih ni-in nadek ngawlin ka colh hangin hi, tin hilhin hi,” ti hi.Ref 31:17 Suah 20:11;
18 Topa in, Sinai Mualhum a, Moses lakah thu a hilhmi a celh ten Pathian ama khut loli tuah thukham a ngatnak suangpeek pa nih cu Topa in Moses lakah pia hi.