33
Hawhsan Tukin Topa In Thupia
1 Topa in Moses lakah, “Izipt ngam pen na puitul mite tuah hi mun pen Abraham, Isaak, Jakob le na casuan tei lakah pia tukin ka tepsami ngamah na hawh un hi.Ref 33:1 Pian 12:7; 26:3; 28:13;
2 Na mai uhah vancungmi hawhtik tung a, Kanaan mi, Amor mi, Hit mi, Periz mi, Hiv mi le Jebus mite cu hawlvawk khawng tung hi.
3 Khuinawi le khuaitui luannak ngamah hawh tuk uh ci. Mahnaven kei cu na lak uhah hawh tuk mang. Itahim titale mi lungmu ngeng na hih uh hangin lampiah siatsuah khawng sual tung,” ti hi.
4 Mah thusia cu Israel miten a zak haw ten lungsia in kap haw hi, kuamah in, a sui le ngun haw vang bulh nuam haw ma toh.
5 Topa in, Moses lakah, “Israel mi lakah, ‘Nohte cu mi lungmu ngeng hi uh ci. Dawmno sung hei na lak uhah ka hawh a hin, siatsuah khawng tung hi. Mah hangin na, sui le ngun uhte cu duk khawng un. Mahnung ten na hum uhah ikaw ka bawl tuk tih thei tung hi,’ tin hilhin,” ti hi.
6 Mah hangin Sinai Mual a hen nung haw ten Israel miten a sui le ngun haw bun haw ma toh hi.
Topa i Puanbuk
7 Israel miten ngiahnak mun a suumnak haw tihkimah Moses in Puanbuk cu la in ngiahnak mun pen a pualam khawla deuhah sa hi. Mah Puanbuk cu, “ Topa i Umnak Puanbuk,” tin, a minsa hi. Topa a tawk nuam cu ngiahnak mun pen tulin mah Puanbukah hawh mek haw hi.
8 Moses cu mah Puanbukah a hawh sialin, mipi cu a kongka haw tekah dingin Topa i Puanbuk sungah Moses a tum ceng laklawh zo leng haw hi.
9 Mah Puanbuk sungah Moses a tum nungten meingo cu a zialpi in zammekin, Puanbuk kongka cu khuh mek hi; mahten mah meingo sung pen Topa in Moses lakah thu hilh mek hi.
10 Puanbuk kongka a, meingo a um cu mipi ten amuh haw ten dingin, a Puanbuk kongka haw pen a lu haw kuunin bia haw hi.
11 Ngualcam pha otpihdun bangin Topa le Moses cu maitonin otpihdun mek haw hi. Mah nungten Moses cu ngiahnak munah kikleh mek hi. Moses bawmtu tangval Joshua, Nun i capa cu buk sungah tangta mek hi.
Topa In Umpih Tuk Tiam
12 Moses in Topa i lakah, “Hi Israel mite Kanaan ngamah puitik hi tih cu thei ing hi; mahnaven keimah tuah hawh tukin akua hah cim tih cu hilh ma laih ci. Nangmah cu theizet ing a, ka lungdamtikzet tin ti zo ci.
13 Mah hangin ka humah na lungdam ahi tale nangmah thei sesemin, na lungdamtik lelengnak tukin na tup tahmi hilh zal tukin hehpih ngen ing. Hi Israel mite hi na miphun hi tukin na tenmi vang cing zalin,” ti hi.
14 Topa in, “Na lakah hawh tung a, lungmuannak pia tung hi,” ti hi.
15 Moses in, “Ka lak uhah na hawh tuk ngawl ahi tale, hi mun pen hawhtik toh pahsun hi.
16 Itahim titale na hawhpih ma tale na mihingte le keimah in, na mitmai pha ka co daan uh hi itin kaw miten a theih haw tuk? Kohte na umpihnakin, leihum miphun hempoh lak pen ka cuangcungnak langtik tuk hi si,” ti hi.
17 Topa in Moses lakah, “Na ngetmi bangin bawl tung; itahim titale ka theih zetmi hi ci a, na humah ka lungdamzet,” ti hi.
18 Moses in, “ Topa hehpihnakin, na sunloih daan hu lak zalin hi,” tin ngen hi.
19 Topa in, “Ka sunloih daan cu lak tung a, ka min thiangtho cu na mai loliah phuang tung hi: Keimah cu Topa ing. Ka lainat nuammi cu laina tung a, ka hehpih nuam mi cu hehpih tung hi.Ref 33:19 Rom 9:15;
20 Ka mai loli cu mu thei tukma uh ci. Itahim titale ka mai a mutu cu kuamah nung haw tukma,” ti hi.
21 Topa in, “Zo in, suangpi humah dinnak pha ka elah mun um hi.
22 Na elno pen ka sunloihnak a lang ten suanghol sungah sel tung a, ka hawhsan laklawh ka kut tuah hup tung hi.
23 ka khut ka lakleh ten ka nunglam bek mu tuk ci; ka mai cu mu ngah tukma ci,” ti hi.