23
Dikcangnak le Thumannak
1 “A dik ngawlmi thu son pahsun hi. A khialmi na bop nuam uh hangin, a dik ngawlin thu son pahsun hi.Ref 23:1 Suah 20:16; Thiam 19:11-12; Daan 5:20;
2 Thil sual bawl tukin, a dik ngawlin mi i thu son pahsuh un. Tazacuai thusonnak pen mi tam saw lungkimnak bawl nuamin, a dik ngawlin thu na son pahsun hi.
3 Mi ca-ngah pa i thu na son uhten a ca-ngah hangin pan peng pahsun hi.Ref 23:3 Thiam 19:15;
4 “Na ngal i khuicang ahi mata, laak a taimi na muleh tale, a lakah henkiklehin hi.Ref 23:4-5 Daan 22:1-4;
5 A cipuh vang a vanngit hangin a bok tale zamsanin, kaltan thong ngawlin a cipuh phot bawmin hi.
6 “Nangmu lakah ca-ngah nauta i thu na sonsak uhten namnuai thong pahsuh un hi.Ref 23:6-8 Thiam 19:15; Daan 16:19;
7 A dik ngawlin midang sual not cu pial unna, mawhnak a nei ngawlmi cu that pahsuh un hi. A thattu a um haw tale khawih hihim tuk mang hi.
8 Nawhthuh la pahsuh un; itahim titale nawhthuh a ei tu cu a nawhthuh eihmi in, a mit cawtik tuk a, thudik mu thei ngawltohin, mawhnak a nei ngawlmi i lampi tian bingtik khawng hi.
9 “Ngamdangmi mikhual bawlsia pahsuh un; nohte vang Izipt ngamah ngamdangmi, mikhual hi zo toh uh ci a, mikhual hih cu iti bang him tih thei uh ci.Ref 23:9 Suah 22:21; Thiam 19:33-34; Daan 24:17-18; 27:19;
Kum Salih le Ni Salihnak
10 “Kum luk sung na lo uhah anci cing unna, a suakmi cu cawm um hi.Ref 23:10-11 Thiam 25:1-7;
11 Mahnaven kum salihnak cu cawltik unna, lo sung a, a po mi imah cawm pahsuh un hi. Lo sungah a po mi a um ahi tale nangmu lak a, mi ca-ngah ten cawm haw tuk a, a tangmi cu ngamsa ten ei poh haw hen hi. Mahti bang lelengin na sabit huan uh le na olif huan hei na bawl un hi.
12 “Ni luk sung na dek unna, ni salih ni cu nadek pahsuh un. Na khui uh le na cipuh uhte vang cawl bok haw tuk a, na umlawh uh le na mikhual uh hei in tha thak ngah haw tuk hi.Ref 23:12 Suah 20:9-11; 31:15; 34:21; 35:2; Thiam 23:3; Daan 5:13-14;
13 “Na lak uhah ka hilhmi hempoh ngai unna pathian dang tei min a sal hei sal kha pahsuh un; a lak hawah thu hei ngen pahsuh un hi.
Puaipi Pa Thumte
(Suah 34:18-26; Daan 16:1-17)
14 “Keimah upatnakin kum khat sungah puaipi pa thum bawl un.
15 Naman hel ngawl Cangho Puai bawl un. Thu ka piak bangin, ni ka tekmi Abib ha, in ni salih sung naman hel ngawl cangho ei un hi; itahim titale mah ha, in Izipt ngam pen tul uh ci. Ituk mahten ka lakah khut thacangin kuamah hung ngawlin, khut ken tuah keimah bia tukin hung un hi.Ref 23:15 Suah 12:14-20; Thiam 23:6-8; Mipum 28:17-25;
16 “An thak Puai cu lo sung a, na cin uhmi ankung lak hunin, a masabel na laak uhten bawl un hi.
“Ancop Puai note 23:16 Ancop puai tihmi hi Deubuk Puai tih vangin sam haw cu na Sabit huan le na lo uh pen thingngah na cop uh kum bo ten bawl un hi.Ref 23:16 Thiam 23:15-21, 39-43; Mipum 28:26-31;
17 Nangmu lak a, pano hempoh cu kum khatah vei thum hi puai hunin, keimah Topa na Pathian uh maiah heng un hi.
18 “Ka lakah biakpiaknak bawlin ngan na piak uhten, naman helmi cangho mang pahsuh un. Ka ca in, na bawl uhmi puai a, na ngawh uhmi ngan tei thau cu a zingleh tian tangtik pahsuh un.
19 “ Topa na Pathian uh i inn sungah, na lo uh pen na lak uhmi anthak a phabel hunpih un hi.
“Tuuno cu a nui nawitui in huan pahsuh un hi.Ref 23:19 Suah 34:26; Daan 14:21; 26:2;
Thutepnak le Thuzilhnak
20 “Nangmu ca in ka bawlsa ngamah a puitu tukin, na lam tuan uhah nangmuh cingtu tukin, na mai uhah vancungmi pa khat hah tung hi.
21 A hilhmi thu cu ngai unna, upat un hi. Amah cu deihma ung tin, langpang pahsuh un, itahim titale ka minin nadek tukin ka hahmi hi a, na langpang kha uh ahi tale ngaithiam hihim tukma hi.
22 Mahnaven ka hilhmi hempoh bawlin, a thu na ngai uh tale, na ngal uhte cu do tung a, nangmuh a ngaltu cu ngal bok tung hi.
23 Ka vancungmi cu na mai uhah hawh tuk a, Amor mi, Hit mi, Perez mi, Kanaan mi, Hiv mi le Jebus mitei ngamah pui tuk hi. Mahmi cu keimah in siatsuah khawng tung hi.
24 Mahmi tei pathian cu bia pahsuh unna, a maiah na lu uh kun pahsuh un. Amu bawl bang bawl pahsuh un. A pathian haw cu siatsuah khawng unna, a pathian suangphut cu sukeh khawng un hi.
25 Noh ten Topa na Pathian uh keimah na bia uh tale an le tui muicu pia tung a, na lak uh pen natnak hempoh laksak khawng tung hi.
26 Na ngam uhah, numei in nausia tih le nucing tihvang um tuk ngawlin, na san uh sautik tung.
27 “Keimah a kihcaknak haw tukin, nangmuh a langpangtu tei humah nadek tung a, a dotu tei lakah buainak hengtikin, na ngal cu nunglamah kikin, taitik khawng tung hi.
28 Na mai uhah a lauhuai khuai-ngal hah tung a, Hiv mi, Kanaan mi le Hit mite cu na hen uh laih ngawlin hawlvawk khawng haw tuk hi.
29 Kum khat sungin hawlvawk khawng tuk mang, mahtih bangin ka bawl tale, a ngam hawah ngamsa tuangin, phillawnin suak kha tuk hi.
30 Mihing pungzai in, ngam hempoh na lak khawng theih uh laklawh, dem nawno in, hawlvawk tung hi.
31 Na ngamngi uh cu Tuipi San pen Mediterranean tuipi tian zaltik tung a, hanglam phillawn pen Eufrates ngun tian sautik tung hi. Mah ngamsung a, ummi mihing tei humah huham neitik tung a, hawlvawk khawng tuk uh ci.
32 Amuh tuah hihen, a pathian tuah hihen, lungkimnak bawl pahsuh un.
33 Na ngamsung uhah umtik pahsuh un, na umtik uh tale ka humah sualnak bawltik haw tuk hi. A pathian na bia uh tale, a thang sung hawah awk tuk uh ci,” ti hi.