24
Thutepnak Khohtik
1 Topa in Moses lakah, “Mualhum kaito in, Aaron, Nadab, Abihu le Israel mi puitu sawm salih tuah ka lakah hung unna, a khawla thim pen na lu uh kunin, Keimah bia un hi.
2 Moses nangmah bek ka elah hung inna, midang cu nek haw pahsuh hen; mipi cu mualhum heiah kai haw pahsuh hen,” ti hi.
3 Moses cu mipi tei lakah hawhin Topa i thupiakmi le daan piakmi hempoh hilh hi. Mipi ten, “ Topa i hilhmi hempoh bawl khawng tuk ung hi,” tin ti haw hi.
4 Topa i thupiakmi Moses in ngan khawng hi. A zingten zingtungno in mah mual bulah, Moses in biaklandawh bawlin Israel miphun sawm le pa nih ca in sialsiahnak suang sawm le pa nih phut hi.
5 halkang biakpiaknak bawlin Topa i lakah biakpiaknak khuicang a ngo tu Israel tangval cu pawlkom biakpiaknak bawl tukin Moses in hawhtik hi.
6 Moses in khui thisan khenkhat cu la in, kuang sungah koih a, khenkhat cu biaklandawh humah theh hi.
7 thutiam laibu cu la in, zapi zakten tukin ngingzet sial hi. Mipi ten, “ Topa i thupiakmi hempoh bawl khawngin, a thu ngai tuk ung hi,” tin ti haw hi.
8 Moses in kuang sung a, thisan cu la in, mipi tei humah theh a, “Hi thisan cu Topa in nangmuh tuah thutepnak bawlin, a thupiakmi hempoh khohtiknak thisan,” ti hi.Ref 24:8 Mt 26:28; Mk 14:24; Lk 22:20; 1Kor 11:25; Heb 9:19-20; 10:29;
9 Moses, Aaron, Nadab, Abihu le Israel puitu sawm salih cu mualhumah hawhin,
10 Israel tei Pathian mu haw hi. A ke nuaiah, a thiangtho zetmi, vancai kilkel bang, mepian suangval tuah phahmi suang phah um hi.
11 Israel puitu ten Pathian mu haw naven lalthongnak tawk haw ma hi; mahten ei le in langkhat ten haw hi.
Moses Sinai Mualhumah
12 Topa in Moses lakah, “Keima lak mual humah kaito inna, Israel mite thuzilhnak tukin ka ngatsa thukham le daan cu hi laiah na um sung, suangpeekin pia tung,” ti hi.
13 Moses le a bawmtu Joshua cu a mansa leng haw in, Moses cu mual thiangtho humah kai hi.
14 Moses in, “Ka kikleh laklawh uh hilai pen na ngak un. Aaron le Hur cu nangmu lakah um haw a, thu poi a um tale amuh na tawk un hi,” tin Israel puitu tei lakah cahta hi.
15 Moses cu mualhumah kaito in, mual cu meingo in tuam khawng hi.
16 Topa i sunloihnak cu mualhumah hengin meingo in mual cu ni luk sung khuh hi. Ni salih ni-in, Pathian in meingo sung pen Moses sam hi.
17 Topa i sunloihnak cu Israel tei ca in, mualhum a, meikang alh dudum li mi bang hi.
18 Moses cu mualhum meingo sungah sun sawm li le zan sawm li um hi.Ref 24:18 Daan 9:9;