22
Lohkiknak Daan
1 “Mi pa khatin, khuicang ahi mata tuu ngu a, thatin, a zuak tale khuicang pa khat ca in, khuicang pa nga loh tuk a, tuu pa khat ca in, tuu pa li loh tuk hi.
2-4 A nguk man cu loh hihim tuk hi. Lohnak a nei ma tale, amah cu salin zuak hi tuk hi. A ngukmi khuicang ahi mata laak, ahi mata tuu cu a lakah a nungin amu haw tale, a nungin loh tuk hi.
“Nguca pa khat cu zanlamin, inn keulet a, mat tawkin a that haw tale, a thattu cu laithat kha ma hi. Mahnaven nisuak sawng ten a that tale laithat hi.
5 “Mi pa khatin, lo ah hihen, sabit huanah hihen, a ngante hampa a eihtik laihin, a khau dukin, midang lo a ei khawng haw tale, ngan neitu pa in, a lo phabel ahi mata, a sabit huan phabel loh tuk hi.
6 “Mi pa khatin, meihalin hampa a kang nungten, an khawlmi an le an kung, ahi mata lo sung a, thingkung cinmi a kang khawng tale, mei haltu in, a siatsuah mi hempoh loh khawng tuk hi.
7 “Mi pa khatin, midang lakah sum hihen, a dang na manpha hihen, keptik mi nguca ten nguksakin, a ngutu a man kha haw tale, a let nihin loh tuk hi.
8 A ngutu a man ngah haw ma tale, a kepsaktu in, a ngualcampa i na la mang tih a langnak tukin Pathian maiah siatcamdun hen hi.
9 “Thuneih nuamnak pa khat sungah khuicang hihen, laak le tuu hihen, puan ahi mata a paimi na pa kha khat kata hi tin, a cuhdun haw tale, Pathian mai ah a thu suahpih hi tuk hi. Pathian i mawh a piakmi cu a let nihin loh tuk hi.
10 “Mi pa khatin, midang pa khat lakah laak, khui, tuu, ahimata ngan dang pa kha khat kemtikin, a ngan cu thi, ahi mata liamsuahdun, ahi mata nguca in taipihin kuamah a muhpihtu a um haw ma tale,
11 Topa i mai ah siatcamnakin, a ngualcam i ngan a lak le lak ngawl ciangtik tuk hi. Nguca i lakmi ahi tale, a keemtu in loh tukma hi.
12 Mahnaven mah ngan cu a ngu haw ahi tale, a kemtu in loh tuk hi.
13 Sahangin man ahi tale, a cik eihbang cu theihpihtu in hunpih tuk hi. Sahang i matmi cu loh kul tukma hi.
14 “Mi pa khatin, midang ngan zawngin, a neitu um ngawl sungin thi, ahimata liamsuahdun ahi tale, a zawngtu in loh tuk hi.
15 Mahnaven a neitu a um tale loh tukma hi. Man nei in zawnmi ngan ahi tale, a zawn man bek kimno in pia tuk hi.
Ziaza le Biaknak Lam Zui Tuk Daan
16 “Khanglai him pa khat, kuamah i dot laih ngawlmi, mi pa khatin zolin, a sualpih tale, a man hempoh pia khawngin, huai tuk hi.Ref 22:16-17 Daan 22:28-29;
17 Mahnaven a huai tuk cu a khanglai i pa in, a lungkim ma tale khanglai man zah cu sumin pia leleng tuk hi.
18 “Mitzial thiam numei cu nungtik pahsuh un.Ref 22:18 Daan 18:10-11;
19 “Ngan a sualpihtu mihing cu thah hi tuk hi.Ref 22:19 Thiam 18:23; 20:15-16; Daan 27:21;
20 “ Topa Pathian nelah sial ngawl, a dang pathian lakah biakpiaknak a bawltu cu thah hi tuk hi.Ref 22:20 Daan 17:2-7;
21 “Ngamdangmi mikhual cu bawlsia pahsuh unna, nuainem pahsuh un hi. Itahim titale nohte vang Izipt ngamah ngamdangmi mikhual hi bok uh ci.Ref 22:21-22 Suah 23:9; Thiam 19:33-34; Daan 24:17-18; 27:19;
22 Meivong hihen, nu le pa nei ngawl, mi ca-ngah hihen, bawlsia pahsuh un hi.
23 Na bawlsiat uh hang, bopnak ngenin ka lakah kapin, a au haw ten, a aw haw za tung a,
24 ka thinuknak ngalnam tuah that tung hi. Na zi uhte cu meivongin suak haw tuk a, na canau uhte cu pa nei ngawl, ca-ngahin suak haw tuk hi.
25 “Noh ten, ka mihing sung a, mi ca-ngah tei lakah sumpai na leicawi uhten, sumpai leicawitu tei a bawl mek haw bangin bawl pahsun unna, sum khang vang la pahsuh un.Ref 22:25 Thiam 25:35-38; Daan 15:7-11; 23:19-20;
26 A lulhlehnak tuk thutepnakin, a puan na laksak uh tale nitum laih ngawlin pia kikleh un.Ref 22:26-27 Daan 24:10-13;
27 Itahim titale a silh tuk hi bek nei a hih haw hangin, iti bangin hihbu thei haw tuk kaw? Bopnak ngenin ka lakah kapin, a au haw ten, a aw haw za tung a, bawm tung; itahim titale kei cu mi hehpihtu ing.
28 “Pathian cu siatson pahsuh un, miphun hotu vang tamsia pahsuh un hi.Ref 22:28 Nung 23:5;
29 “Na an uh, na sabittui uh le na olif thau ka lakah pia tukin cuamduang pahsuh un.
“Na capa upabel uh cu ka lakah pia un hi.
30 Na khui uh hihen na tuu uh hihen, a hin masabel mi cu ka lakah pia un hi. A catawntil haw cu a nui lakah ni salih um henna, ni liat ni-in ka lakah pia un hi.
31 “Nohte cu keima ca in, mithiang hi tuk uh ci, mah hangin ngam lak a, sahang matmi cik cu ei ngawlin uico pia saw un hi.Ref 22:31 Thiam 17:15;