21
Sal Neih Daan
(Daan 15:12-18)
1 “Israel tei lakah a nuailam a, daante pia in hi.
2 Hebru mi salin, na lei tale kum luk sung sal hi tuk a, kum salihnak ten imah piak kul ngawlin luat tuk hi. Ref 21:2-6 Thiam 25:39-46;
3 Zi nei laih ngawl ahi tale zi nei ngawlin luat tuk hi. Zi nei sa ahi tale, a zi tuah luat langkhat haw hen.
4 Mahnaven sal a hih sungin a bawipa in zihuai sakin, canu capa a nei tale, a zi le a cano cu a bawipa ta hi haw tuk a, amah bek luat tuk hi.
5 Mahnaven a salpa in, ‘Ka bawipa, ka zi le ka cano deih ing hi, luat nuam mang,’ a ti tale,
6 a bawipa in biakpiaknak munah hawhpih henna kongka ah, ahimata kongka khuam pa nih tian a hawhpih nungten a beng vit tuk hi. A nunsung cu a salin um tuk hi.
7 “Mi pa khatin, a canu salin, a zuak tale pano bangin numei cu luat thei tukma hi.
8 Zi in, a bawl tumtu a bawipa i lung a noptik ma tale, a pa in tanleh thei tuk hi. A bawipa in miphun dang tei lakah zuak thei tukma, itahim titale a mawi ngawlmi hi.
9 Mi pa khatin, a capa ca tukin sal numei a lei tale, a canu bangin ngaisung hen hi.
10 Mi pa khatin, a zi in, a neih nungten zi dang a huaileh ahi hei in, a zi lun cu masa laih bang lelengin an le puansilh le zi a hihnak covo cu ngah leleng tuk hi.
11 Hi thu pa thum a pia thei ngawl ahi tale loh kul ngawlin luat tuk hi.
Liamsuahnak Tuah Pehdunmi Daan
12 “Midang a thattu cu thah hi bok haw tuk hi. Ref 21:12 Thiam 24:17;
13 Mahnaven thah him hi ngawlin that khak sualmi ahi tale nangmu ca tukin ka tenmi munah tai hen a, mahlaiah ngelh thei tuk hi. Ref 21:13 Mipum 35:10-34; Daan 19:1-13; Josh 20:1-9;
14 Mahnaven mi pa khatin thinukin midang a that him tale ka biaklandawhah him nuamin, a ngelh hei in doktul unna, that un hi.
15 “A pa ahimata, a nu a vattu cu thah hi tuk hi.
16 “Mi pa khatin midang pa khat cu zuak tukin hihen, sal tukin hihen, nuam ngawl zal ngu in, a taipih tale mahpa cu thah hi tuk hi. Ref 21:16 Daan 24:7;
17 “A pa ahimata, a nu a tamtu cu thah hi tuk hi. Ref 21:17 Thiam 20:9; Mt 15:4; Mk 7:10;
18 “Mi pa nih sualdunin, pa khatin adang pa khat cu suangtum pa khat, ahimata a khuttum tuah sawhin, liamsuah naven, a thi ma tale, a vattu pa cu dantatnak thuak tukma hi. Mahnaven a vah mipa cu tho thei ngawl mun khungin,
19 a dam hei in, thiangkhut man a kul tale, a mun khun sung a, nilawh loh tuk a, a dam ngah laklawh cingkhawi in bawm tuk hi.
20 “Mi pa khatin, a salnu ahimata, a salpa cu ngolhkang tuah vatin, a thi vut tale, a vattu cu dantatnak thuak tuk hi.
21 Mahnaven a sal cu ni khat ni nih a nung tale, a bawipa cu dantat tawk tukma hi. Itahim titale a sal cu a thil neihmi hi a, thil neihmi a sun cu a mawi tawkin cawh hi zo hi.
22 “Haudunin, numei naupai liamsuah a, thi ma naven nau a sia tale, a liamsuahtu pa in, numei nu i pasal nget zah loh tuk hi.
23 Mahnaven numei nu cu liamsuahin, a thi tale, a nunnak cu nunnak tuah lohleh hi tuk hi.
24 Mit cu mitin, ha cu ha in, khut cu khutin, ke cu ke in, Ref 21:24 Thiam 24:19-20; Daan 19:21; Mt 5:38;
25 halkang cu halkangin, liamma cu liamma in, vunkok cu vunkokin loh hi tuk hi.
26 “Mi pa khatin, a salnu, ahimata a salpa cu a mitah vatin, a mit a siatsuah tale, a mit manin, a sal cu suakcatik tuk hi.
27 A ha a hongtik tale, a ha manin, a sal cu suakcatik tuk hi.
Ngan Neitu Tei Zui Tuk Daan
28 “Khuicangin numei ahi mata pano pa khat a khiihum tale, khuicang cu suang tuah seh hup hi tuk a, a cik cu eih hi tukma hi. Mahnaven khui neitu pa cu dantatnak thuak tukma hi.
29 Mahnaven mah khui cu hang zetin mi a hil mek hangin, a neitu pa cu hilh hamsa zo haw a, khum ngawl hahzau in, numei ahimata pano a khiihum tale, mah khui cu suang tuah sep humin, a neitu vang thah hi bok tuk hi.
30 That ngawlin dantat tuk saw a son haw tale, a nunnak tanleh tukin a cawh zahin loh khawng hen hi.
31 Khuicangin pano hihen, numei hei hihen a khiihum tale, a hum a, daan leng hi zui hi tuk hi.
32 Salnu ahi mata salpa a khiihum tale, khui neitu in sal neitu i lakah ngun tangka sawm thum loh tuk a, khuicang cu suang tuah seh hup hi tuk hi.
33 Mi pa khatin khuk co in, a khuh bawl ngawlin a zam leng hangin, khuicang maw, laak maw a cak kha tale,
34 mah ngan man cu loh tuk hi. Ngan neitu lakah sumpai pia tuk a, a thi mi ngancik cu amah in co tuk hi.
35 Mi pa khat i khuicangin midang khuicang a khiihum tale, a pa nihin zuak haw tuk a, a man sem haw tuk hi. A thi mi khuicang i cik cu sem haw hen hi.
36 Mahnaven khuicang cu hangsan zetin, mi hil mek hi tih, theihleng na pin, a neitu pa in, a khum ma tale loh tuk hi; a nungmi khuicang cu a thi mi khuicang ai-in pia tuk a, a thi mi khuicang cu amah in co tuk hi.