5
Esther In Kumpipa le Haman An Eih Sam
1 Ni thum sung, an a can nungten Esther cu kumpinu thuam tuah kumpi inn sungta khanah hawh a, kumpipa i khunnak lam hekin ding hi. Kumpipa cu kongka lam hekin, a kumpi khunnak humah khung hi.
2 Kumpipa in, kumpinu Esther kongka pualeu lam a din amuh ten mitmai pha pia in, a sui thiangkhut cu zakto hi. Esther in nekin, a thiangkhut lek cu zen hi.
3 Kumpipa in, “I deih kam, kumpinu Esther? Na deihmi cu hilh inna, ka ukmi ngam a khenkhat ahi hei in, pia tuk poh sing,” ti hi.
4 Esther in, “Kumpipa na lungkim ahi tale, an huan ing, tuni tak nangmah le Haman cu keima lakah takeih ei tukin sam ing,” ti hi.
5 Esther i deihnak a kimtiknak tukin kumpipa in, Haman cu manlangin samtik hi. Mah zan cu Esther lakah takeih ei haw hi.
6 Sabittui in haw a, kumpipa in, “Na deihmi cu hilhin hi, pia tung titoh sing. Na ngetmi cu ka ukmi ngam a lang ahi hei in pia tuk poh ing,” tin Esther cu ti hi.
7 Esther in,
8 “Kumpipa, na lungkimin, ka ngetmi na pia tuk ahi tale, zingtak ten Haman tuah ka lakah takeih eileh tukin sawm ing. Ka nget nuammi cu hilhleh tuk poh veng,” ti hi.
Haman In Mordekai Thah Tum
9 Haman cu takeih a eihnak pen lungdam le lungnop zetin, innah pin hi. Kumpipa i inn kongka elah Mordekai mu in, a elah a hawh ten Mordekai in, upatnak pia ngawlin a ding hei a din ngawl hangin Haman a thinukzet hi.
10 Mahnaven a thinsup lo in, innah pinta hi. A innah a ngualcamte zawmin, a zi Zeresh vang samin,
11 a hauhnak le capa tampi a neihnak, kumpipa in bawi upabelin, a bawlnak le bawi dangte sangin amah a thupi dante sonin, tuangkhawng het hi.
12 “Hi hempoh humah kumpinu Esther in, kumpipa le keimah bek takeih do, zingtak hei ten takeih ei tuk laih ung.
13 Mahnaven Judah pa Mordekai kumpi kongka elah a khun ka muh sung cu, hi ka sonmite vang hi ka ca in, a thawnthongin suak khawng,” ti hi.
14 A zi le a ngualcam ten, “Ita mihing khai hupnak pi sawm salih le pi nga sangmi na bawl ngawl? Zingten Mordekai khai tukin kumpipa hilh inna, taklam ten thinnopno in, an sim leh saw in,” tin ti haw hi.
Mah a hilh haw cu Hamanin ngaihsutnak phazet hei, tin ngaisungin, khai hupnak cu bawl hi.