6
Kumpipa In Mordekai Upatnak Pia
1 Mah zanin, kumpipa hihbu thei ma; mah hangin a ngam uksung a, nadektute sialsiahnak Khang Tangthu Laibu cu sialtik hi.
2 A sial haw mi sungah kumpi inndat cingtu tilngehmi pa nih Bigthana le Teresh ten kumpipa cu suamin, that tum haw hi. Mahnaven mah thu cu Mordekai in zain phuang hi, tih thute tel hi.Ref 6:2 Est 2:21-22;
3 kumpipa in, “Hiti bangin thilpha a bawl hangin Mordekai cu minphatnak laksawng pia hung maw?” tin dong hi.
A umlawh ten, “A ca in bawlmi imah umma hi,” tin ti haw hi.
4 Kumpipa in, “Atu-in, ka innah ka khutnuai bawi pa khat bek um haw a maw?” tin dong hi. Mahlai in Haman cu kumpi lak pen Mordekai thahnak tuk thungen tukin kumpipa i inntualah na heng bok hi; Mordekai khai hupnak tukin thingte bawl khawng zo.
5 A umlawh ten, “Haman cu um; nangmah tawk nuam hi,” tin kumpipa cu ti haw hi. Kumpipa in, “Luttum hen,” ti hi.
6 Haman cu tumin, kumpipa in, a lakah, “Upatnak ka piak nuam zetmi pa khat um. A ca in ikaw ka bawl tuk?” tin dong hi.
Hamanin kumpipa in hitihzahin upatnak a piak nuammi cu akua nen tim? “Keimah sial ngawl akua dang um haw tuk heng?” tin, a lungmu sungno in ngaisungdun hi.
7-8 Mah hangin kumpipa i lakah, “Bawipa upatnak na piak nuamzetpa i ca in, na kumpi thuam le na khun mekmi cipuh le na sui lukhuh latikin hi.
9 na khutnuai bawi tei lak pen upabel pa khatin, mahpa cu na thil thuamte tuah thuamtik henna, na cipuh humah khungtikin, khuasung pen cipuh cu kai tul hen. Na khutnuai bawipa in, a hawh thahin, ‘Kumpi bawipa in upatnak a piak nuammi humah upatnak a piak dan hi zo hem un,’ tin au thah hen,” ti hi.
10 Kumpipa in, Haman lakah, “Manlangin hawh inna, ka ngalthuam le ka cipuh cu la inna, Judah mi Mordekai pia in hi. Tu a, na hilh bangin Mordekai humah bawl khawngin hi. Kumpipa i inn kongka elah Mordekai cu um tuk hi,” ti hi.
11 Hamanin, kumpi thuam le cipuh cu la in, Mordekai silhtik hi. Cipuh humah Mordekai cu khungtikin, Hamanin khuasungah cipuh cu kaihsakin, a hawh thah haw in, “Kumpipa in upatnak a piak nuammi humah upatnak a piak dan hi zo hem un,” tin au pepel hi.
12 Mordekai cu kumpi inn kongka ah kikleh a, Haman cu zakca le a mai hup thahin innah pinta.
13 Mah thula hempoh cu a zi le a ngualcam tei lakah hilh khawng hi. A zi le micipzet a ngualcam ten a lakah, “Mordekai in nehpek zo hei! Amah cu Judah mi hi a, ituk mah hei in, tithei tukma toh ci. Neh loli tuk hi,” tin ti haw hi.
14 Mahti bangin a otlih laihtak haw in, kumpipa i inn a tilngeh mite hungin, Haman cu Esther i takeih donakah manlang zetin hawhpih hawta hi.