4
Mordekai In Esther Bopnak Ngen
1 Mordekai in hitih bang thu vaihawmnakte a zak ten a lungbingin, a puante botkek khawng a, thangkhau puan silhin, a lu ah vutzakin kapthah le tau thahin khuapi sungah hawh hi.
2 Kumpi inn kongka ah heng naven a sungah tum ma hi, itahim titale van phano silh ngawlin, kuamah tum dan ma hi.
3 Persia ngamsung khua hempoh ah kumpi thupiakmi thu a thatnak haw tihkim pen Judah mite cu kap le tau in, um khawng haw hi. An cangin, kap le au le kio haw a, thangkhau puan silhin, vut lakah zau haw hi.
4 Mordekai in mahti bangin a um cu, Esther i numei umlawhte le amah cingtu tilngehmi ten Esther cu a hilh haw ten, a lungnop viang ma. Mordekai lakah puansilh theknak tuk Esther in kuat naven Mordekai in la nuam ma hi.
5 Kumpipa in amah cingtu tukin a koihmi tilngehpa Hathach cu Esther in samin, Mordekai mahti bangin a umnak thu la dong tukin hah hi.
6 Hathach cu kumpi inn kongka mai inntual a, Mordekai lakah hawh hi.
7 Mordekai in thula hempoh hilhin, Judah mi hempoh thah khawng ahi haw tale kumpi sumpai innah Hamanin sumpai pia tukin, a tepmi zah vang hilh khawng.
8 Judah mi siatsuah khawng tukin Susa khuapi ah lai pia in, a suahmi thupiaknak lai vang Ha Thak lakah pa khat pia hi. Mahlai cu Esther pia in, thula umdante hilhciang tukin le kumpipa i lakah hawhin, a minam tei ca hehpihnak kun tukin Mordekai in, Esther thucah hi.
9 Mordekai i thucahmi bangin Hathach in bawl khawng hi.
10 Esther in Hathach cu Mordekai lakah hawhtik lehin,
11 “Mi pa kha khat, numei hihen, pano hihen, kumpipa i sam ngawlin kumpipa i umnak khansungah a tum tale, thah hi tuk hi, tih cu a daan hi. Kumpipa in ngaihsutnak piatute pepanin ngam khen sung a, mi hempoh ten mah daan cu thei khawng haw hi. Hih daan pen luat theihnak tuk lampi umma hi; kumpipa in, a sui thiangkhut a zak bek ten mahpa, ahimata mah nu cu thihnak pen luat thei hi. Keimah vang kumpipa in, a sap ngawlnak ha khat bang kim zo,” tih thu hilhtik hi.
12 Mordekai in, Esther i thucahmi a zak ten,
13 Esther lakah hi bangin ngallinnak pia hi. “Kumpi innah na um hangin Judah mi dangte sangin, him saw deuh tung hi tin ngaisung nuam pahsun.
14 Hiti bang hunah mengdenin, na umthong tale van pen Judah mitei bopnak cu hung tuk a, pan tuk naven nang cu thi tuk ci a, na pa i innkua cu bo tuk hi. Kumpinu na hihnak cu hi bang hun ca tukin na hihlam hei cu akua kaw a thei?” tin ti hi.
15 Esther in, Mordekai lakah thucah lehin,
16 “Hawh inna, Susa khuapi a, Judah mi hempoh samkhawmin hi, ancang unna, keima ca in thungen un. A sun a zan ti ngawlin, ni thum sung imah ei ngawl le in ngawlin, thungen un. Keimah le ka umlawh numeite vang mahti bangin um bok tuk ung. Mahnung ten a daan kha ma naven kumpipa i lakah hawh tung. Hi bangin ka thi ahi tale thi poh nang,” ti hi.
17 Mordekai cu hawhin, Esther i thucahmi bangin bawl khawng hi.