3
Haman In Judah Mi Bawlsia Tum
1 Hun a ngeideuh nungten, kumpi Xerxes in, Haman a tih haw mipa cu a khutnuai bawi hempoh lak pen upabel bawl hi. Haman cu Hammedatha i capa hi. Agagnote 3:1 Agag cu Amalek kumpi hi in, Amalek mite cu Israel mite tuah ngaldunzet haw hi. i casuan hi.
2 Kumpipa in, a khutnuai a, nadektu hempoh lakah, “Haman cu upat unna, a mai ah khukdinin, na lu uh kun un,” tin thupia hi. Mah hangin a venghawng haw in, kumpi i thupiak bangin bawl haw hi. Mahnaven Mordekai in bawl nuam ma hi.
3 Kumpi nadek bawi dang ten, “Itakaw kumpipa i thu na zui nuam ngawlnak?” tin ti haw hi.
4 Ni khat nung ni khat hilh leleng haw naven a thu haw cu ngai nuam ma leng hi. Mordekai in, “Kei cu Judah mi ing, Haman mai ah ka lu kun thei tuk mang,” ti hi. Mordekai i nundan cu Hamanin thuak zo ngai a ni maw tin, lamdang sa in, Haman lakah hilh haw hi.
5 Haman mai ah Mordekai cu khukdinin, a lu kun tukma tih a zak ten Haman a thinukzet hi.
6 Mah i hum pen Mordekai cu Judah mi hi tih a zak thuah lalaih ten Mordekai bek bawlsia tuk cu a lungkim thei ma toh. Persia ngamsung a, Judah mi hempoh thah khawng tum hi.
7 Kumpi Xerxes in, kumpi a deh kum sawm le kum nihnak, ha khat ha in, mi a bawlsiatnak tuk ni le ha thei nuamin, Haman in, “Purim,” a tih haw mi aisannak ngolh dok tukin thupia hi. A dawh haw ten ha sawm le ha nihnak, Adar ha, ni sawm le ni thumnak cu dok ngah haw hi.
8 Hamanin Kumpipa i lakah, “Bawipa na uksung le na ngam khen hempoh ah miphun khat um haw in, a umdan haw cu miphun dang tei umdan tuah bangten ma hi. Mah hum pen na ukmi ngamsung a, daan vang zui nuam haw ma. Mah a hih hangin hi ti bangin zoh thong tuk cu nangma ca in pha tukma hi.
9 Kumpipa, na lungkim ahi tale hi mite hi, thah khawng tukin thupia in hi. Mahti bangin na bawl ahi tale na ngam uknak ca man tukin na sumpai inn sungah ngun sumpai cuai thawng za nih le thawng sawm li cu keimah hihimin pia thei tung tin tiam ing,” ti hi.
10 Kumpipa in, a thupiakmi mual nei tukin a min khetnak khutbut cu dukin, Judah mite huatu Agag i casuan Hammedatha i capa Haman lakah pia hi.
11 Kumpipa in Haman cu, “Mah sumpai le mihingte vang na khut sungah pia ing, pha na tih babangin bawlin,” ti hi.
12 Mah hangin ha khat ha, ni sawm le ni thumnakin, Hamanin kumpipa i laitate cu samin, thuthan tukmi cu auh hi. Ngamsung ngamkhen tihkim tei a man haw mi lai in hihen, miphun tihkim tei lakah amu awn tekin hihen, laikuatin ngamkhen uktu bawi le bawi dadang tei lakah vang kuat khawng haw hi. Mahlai cu kumpi Xerxes min tuah nganin, a khutbut tuah tacik khen haw hi.
13 A mi hah haw ten kumpi uknak ngamsung hempoh ah hawhpih haw hi. Ha sawm le ha nihnak, Adar ha, ni sawm le ni thum ni, ni khat sungin Judah mi hempoh cu numei, pano tih um ngawlin le upa, naupang ti ngawlin thah khawng hi haw tuk hi. Hehpihnak umngawlin, a ci haw mittik khawng tuk na hi; a thil neihmi hempoh vang lon khawng hi tuk hi.
14 Mi hempoh ten zain, mah ni-in, a tuangtim tek theihnak tukin mahlai cu ngamkhen tihkimah than khawng tukmi hi toh hi.
15 Kumpi i thupiak bangin, a mi hah haw ten manlang zetin khua tihkimah mah thu cu than haw hi. Susa khuapi hei ah than bok haw hi. Kumpipa le Haman cu zuthahin, a khunkawm haw laih takin, Susa khuasung mite cu buaizet haw hi.