2
Esther Cu Kumpinu In Suak
1 Hi thute cengin, a thinuknak a daileh ten, kumpipa cu Vashti i umdan le a hum a, thu a piakmi cu ngaisungleh hi.
2 Ngaihsutnak piatu khenkhat ten, “Itakaw na zi tukin khanglai mawi pa kha khat a zei uh ngawl?
3 Na uksung ngam khen tihkimah na khutnuai bawite hah inna, khanglai mawi hempoh cu hi kumpi umnak Susa khuapi a, kumpipa i zineu tei umnak munah hunpih haw henna, numei cingtu tilngehmi Hegai zotik inna, paallelin thuamdun haw hen.
4 na deihbelmi khanglai cu la inna, Vashti ai-in, kumpinu in bawlin,” tin ti haw hi.
Kumpipa i lungkim zawng a hih hangin, a tih haw bangin bawl hi.
5 Mah Susa khuapi ah Mordekai a tih haw, Judah mi pa khat um hi. Mordekai cu Jair i capa hi a, Benjamin hinnam Kish le Shimei tei casuan hi.
6 Kumpi Nebuchadnezzar in, Judah kumpi Jehoiakhin le a mihingte Babilon ah salin, a pui ten Mordekai vang tel bok hi. Mordekai lakah a pasel i canu Esther a tih haw mi cu um hi. Esther i Hebru min cu Hadassah hi. A nu le pa a thih haw ten Esther cu Mordekai in cawmin, a canu ngangai bangin zo hi.Ref 2:6 2Kum 24:10-16; 2Khang 36:10;
7 Esther cu khanglai mawizet hi, a thuang vang phazet.
8 Kumpi thupiakmi thanin, khanglai tampi Susa khuapi ah a hawhpih haw ten Esther vang cu pui bok haw hi. Esther cu kumpi inn a, numei tei umnak khanah koih haw a, Hegai in zo hi.
9 Hegai in Esther a deihzet taktoh cu phadeuhin zo hi. Paallelnak a phunkim pia in, a timeh sakin, an vang pha cuangin pia hi. Esther zotu tukin kumpi inn pen a tenmi khanglai salih koih hi.
10 Esther in Judah mi ing tih phuang awng ma. Mordekai in phuang tuk ngawlin a tep hangin Esther in im leleng.
11 Nisialin Mordekai cu Esther iti bangin um him tih le iti bangin umleh tuk nen tim, tih thei nuamin kumpipa i zineu tei umnak inntual mai ah hawh lelem hi.
12 Khanglai tei paallelnak tukin kum khat ngei hi. Ha luk sung mura zimui tuah a ti haw mehsakin, adang ha luk sung cu balsam zimui tuah a ti haw meh sak haw hi. Mahnung ten khanglaite cu pa khat nawno in, kumpi Xerxes mai ah hawhpih hi haw tuk hi.
13 A umnak inn pen kumpi innah a hawh haw ten amu deihmi pawpoh silh theih hi.
14 Kumpi innah, taklam ten hawh haw in, a zingten adang numei tei umnak innah hawh haw tuk hi. Mahlai ah kumpipa i zineute zotu tilngehmi Shaashgaz in zo tuk hi. Kumpipa in, deihin, a min tuah a samleh ngawlmi cu akua khanglai hei hihen kumpipa i lakah hawhleh haw tukma toh hi.
15 Ni khat cu Esther i hawh tuk hun heng. Esther, Mordekai pasel Abihail i canu, Mordekai in ama canu bangkekin, a cawmmi cu, amutu hempoh tei sunsakmi hi. Kumpipa i lakah a hawh ten kumpipa i zineu tei umnak inn zotu Hegai i hilhmi puan cu silh hi.
16 Xerxes kumpi a deh sawng kum salihnak, ha sawm ha, Tebeth ha in, kumpi innsung, kumpi Xerxes mai ah Esther cu hawhpih bok haw hi.
17 Kumpipa in khanglai dangte sangin Esther cu na deih cuang hi; mitmai a piakmi le a deihmi khanglai dangte sangin Esther cu deih saw in, a thin sung cam leng hi. Mah a hih taktohin, kumpi lukhu cu Esther khutik a, Vashti ai-in, Esther cu kumpinu in bawlta hi.
18 Kumpipa in Esther upatnakin, an eih puaipi bawlin a khutnuai bawi hempoh le ngamkhen uktu bawite sam khawng hi. A uksung hempoh ah nadeh cawlin zung khak tukin thupia a, kumpipa min tuah a khawthu mi laksawngte cu sem zihziah hi.
Mordekai In Kumpipa Pan Ngah
19 Khanglaite a vei nihnak a khopdun haw ten Mordekai cu kumpipa in nadeh pa khat pia hi.
20 Mordekai i tepsa bangin Esther in, Judah mi a hihnak phuang awng ma hi. Phuang tuk ngawlin Mordekai in tiamin, naupangno a hih laihin, a thu a ngaih bangin atu vangin Mordekai i thu cu ngai hi.
21 Mordekai cu kumpi zungah nadektu pa khat a hih laihin, kumpi inndat kongkate cingtu tilngehmi pa nih, Bigthana le Teresh ten kumpi Xerxes cu a deih haw ngawl hangin suamin, thah tum haw hi.
22 Mah thu cu Mordekai in, a zak ten kumpinu Esther hilh a, Esther in, kumpipa hilh sawlawn hi.
23 A dotkan haw ten thungai hi tih a theih haw ten a pa nih haw in, khai hupnak khuamah khai hum haw hi. Mah thu hempoh cu kumpipa i thupiaknak bangin cangkimno in, Kumpipa Ngam Tangthu Laibu sungah sialsiah haw hi.