ESTHER
Laibu
(The Book of Esther)
Esther Laibu sung a ummi thute hi phalbi hun ten Persia kumpi i um meknak inn pen a tulmi tangthu hi. A hilhnuambelmi cu numei ngalpha Esther a tihmi haw i thu hi. Hi nu in, a ngalphatnak le a pumpiaknak hangin a miphun ngal tei khut sung pepan hi tih thu son tambel hi. Hi laibu in Purim tihmi Judah puai a patnak le a sullam le a thu le la hilh ciang hi. Pathian min vei khat hei sal ma hi. Mihing nadeh daan: a suamnak haw le a ngalphatnak haw hilh hi.
1
Vashti In Kumpi Xerxes Thu El
1-2 Xerxesnote 1:1-2 Xexes hi Xexes tin ngan haw naven a awsuah zui in, sialbaihnak tukin Xerxes tin ngan ung hi. cu kumpi dekin Persia ngam khuapi Susa kumpi khunnakah khungin, India pepan Ethiopianote 1:1-2 Ethiopia tihmi hi Ethiopia tih vangin ngan haw hi. Hebru Lai Thiangtho sungah Cush tin um hi. Mahlai a Cush tihmi cu atu-in Ethiopia khi hi. Kumpi a deh hun cu (485-464 BC) tian hi. tian ngam khen za le sawm nih le salih uk hi.Ref 1:1-2 Ezr 4:6;
3 Kumpi a deh kum thumnakin, a khutnuaite le a ngam khen uktu bawi tei ca in an eih puai ngengzet pa khat bawlsak hi. Mah puai ah Persia le Media ngalkapte, ngam khen uktu bawite le mi upa tampi tel haw hi.
4 A neih daan le a hauhdan cu mitei zoh tukin ha luk sung pikpek lak hi.
5 Mah nungten kumpipa in, Susa khuapi sung a, ummi pano hempoh mihau hihen, mi zawng hihen, a venghawng haw in an eih puai bawlsak hi. Kumpi inntualah nipi khat sung puai bawl haw hi.
6 Inntual cu pat puanzak a ngo le mepian tuah mawitikin, mah puante cu nimzang ma neu tuah suang khuam ngo hum a, ngunkualah khih haw hi. Inntual cu suang ngo, suangsan, suangval, suang mepian le suanghingte phahin, mah humah sui le ngun tuah bawlmi khunnak tampi koih haw hi.
7 Sabittui cu sui khuat a phun dadang tuah pia haw hi. Kumpi a hih bangin sabittui cu phal zetin pia hi.
8 A sabittui a in haw tuk cu leiteek haw ma. A deih zah haw ten, in haw hen tin kumpipa in, a nadektute cu thupia hi.
9 Mahlai in, kumpi innah kumpinu Vashti in numei tei ca in, an eih puai bawlbok hi.
10 An eih puai a bawl ni salih ni-in, kumpipa cu sabittui a inmi in, a lungmu sotik hi. Mah hangin tilngehmi a nadektu mihing salih Mehuman, Biztha, Harbona, Bigtha, Abagtha, Zethar le Karkas cu samin,
11 Kumpi bawinu Vashti cu a kumpi lukhuh khu in, a lakah hunpih tukin thupia hi. Kumpi bawinu cu mi mawizet a hih hangin a sawmmi le a khutnuai bawi tei mai ah a zi i mawi daan cu tuangkhawnnak tuah lak nuam hi.
12 Mahnaven kumpinu a hilh haw ten kumpipa i thu cu elin, hawh nuamma. Mah hangin kumpipa cu a thinuk zetin, a thinuk daan cu a so in so tawtok hi.
13 Atu-in, thil thupi le thu haksa a um ten kumpipa in ngaihsutnak piatu tei ngaihsutnak cu dong masa mek hi. Mah hangin amah ngaihsutnak piatute, iti bawl ahin pha tuk him tin dong hi.
14 Ngaihsutnak a dot mek mite cu: Karshena, Shethar, Admatha, Tarshish, Meres, Marsena le Memukan haw hi. Hi bawi salihte cu Persia le Media ngam pen bawi upabelte hi haw a, kumpi tawh theihnak nei haw hi.
15 Kumpipa in, a lak hawah, “Keimah kumpi Xerxes in ka umlawhte hahin, kumpinu hung hen hi tin thupia ing. Mahnaven hung nuam ma hi. Mah hangin a daan bangin ikaw ka bawl tuk?” ti hi.
16 Memukan in, kumpipa le a khutnuai bawi tei lakah, “Kumpinu Vashti in kumpipa zawnsak hi; kumpipa zawnsak bek hei hi ngawlin a khutnuai bawite le a ngamsung a, ummi hempoh vang zawnsak bok hi.
17 Kumpinu i nuncan hi a theih haw ten na ukmi ngamsung a, um numei hempoh ten a pasal haw cu imah sumsialleh haw tukma toh. Numei hempoh ten, ‘Kumpipa Xerxes in, kumpinu Vashti cu sam naven hung nuam ma,’ ti haw tuk toh hi.
18 Persia ngam le Media ngamsung a, um bawi tei zi hempoh ten kumpinu i nuncan cu sun nitum laih ngawlin a pasal tei lakah hilh khawng haw tuk hi. Na thu ngaih ngawlnak le nawngkainak cu ituk mah ten bo thei tukma toh.
19 Kumpipa na lungkim ahi tale, Vashti in kumpipa cu ituk mahten tawkleh thei tukma toh, tin thupia in, ituk mahten khelleh tuk ngawltohin, Persia ngam le Media ngam daan laibu sungah ngantikin hi. Amah sangin a pha saw deuh kumpinu dang zei in hi.
20 Hi tihzah a ngengmi le a zalmi na uknak ngam sungah na thupiakmi a than khawng ten, numei hempohin, a pasal haw cu, mihau ahi haw hei in, mi ca-ngah ahi haw hei in upat ten haw tuk,” ti hi.
21 Kumpipa le a khutnuai bawi ten a zak haw ten a lungkim khawngin, Memukan i hilh bangin kumpipa in bawl hi.
22 A ngam sungah laikuat khawngin, innkua pa khat sungah a pasal haw cu thuneitubel tuk tin, a peng haw le a ngam haw tenah amu awn le lai tek tuah thuthan khawng hi.