13
Ngamdangmi Tuah Khendun Haw
1 Mah hunin, Moses Daan cu nging zetin, mipi tei lakah sialin, a sial haw mi sung pen, Ammon mi le Moab mite cu ituk hei ten Pathian i mihing tei lakah tel thei haw tukma hi, tihmi haw hi.Ref 13:1-2 Daan 23:3-5;
2 Ita mah bangin um him titale Israel mite Izipt ngam pen a tul haw laihin, Ammon mi le Moab miten a in le eih tuk a piak haw ngawl hangin hi. In le eih tuk tui le an a piak haw ngawl bek sial ngawlin Israel mite tamsia tukin Balaam lak lehlamah sumpai pia haw hi; mahnaven mah tamsiatnak cu Pathian in amu ca muicu in suaktik hi.Ref 13:2 Mipum 22:1-6;
3 Israel mipi in mah Daan sialmi cu a theih haw ten amu sung pen ngamdang mite cu hawlvawk khawng haw hi.
Nehemiah i A Phelphuah Mite
4 Biakinn na koihnak khante uktu thiampi Eliashib le Tobiah cu ngeizet lemdun zetin um haw hi.
5 Mah hangin Tobiah cu khan ngengpi pa khat luahtumtik hi; mah khan cu biakpiaknak tukin aman haw mi cangho vam le namtui; Biakinn a, manmi na; thiampi tei ca biakpiaknak a piak mite, Levi tei lak a piakmi seh sawm seh khat le sabit le olif situite, biakinn lasatu le biakinn cingtu tei ca a piak haw mi hempoh koihnak tuk tihmi hi.
6 Mahtibang a hih laihin, Jerusalem khua ah um mang hi; Artakzaksis in, Babilon kumpi a dehnak kum sawm thum le kum nih kumin, amah tawk tukin le thu le la than tukin hawh ing. Dawmno a ngei nungten ama lungkimnakin,
7 Jerusalem khua ah kik ing. Biakinn na koihnak khan pa khat Eliashib in Tobiah mangtik hi tih ka muh ten ka thinuk ngangai hi.
8 Thinukin Tobiah i na hempoh cu vawk khawng ing.
9 Na koihnak khante cu thianthoh biakpiaknak bawl tukin le a sungah Biakinn na, biakpiaknak cangho vam le namtuite koih tukin thupia ing.
10 Mah hum pen Levi mite le Biakinn lasatute cu mipi ten an khamkhop a piak theih haw ngawl hangin Jerusalem tulsanin, amu lo tekah pinleh khawng haw tih za ing.Ref 13:10 Daan 12:19;
11 Hotu bawite cu ita Topa i Biakinn cu zulzau in, zamthong uh cim? tin mawhsiat ing. Levi mi le lasatute cu sam lehin, a nadeh haw cu dektikleh ing.
12 Israel miten a biaknak an, sabittui le olif thaute cu Biakinn na koihnak khanah hunpihleh haw hi.Ref 13:12 Mal 3:10;
13 A nuailam mite cu na koihnak cingtu in koih ing, thiampi Shelemiah, Daan thiamtu Zadok le Levi mi Pedaiah Zakkur i capa le Mattaniah i tupa Hanan cu amuh bawmtu in koih ing. Hite cu nadektu dang a unau tei lakah tui le an phano in sem haw tuk hi, tin ka muan mite haw hi.
14 Maw ka Pathian, nangmah biaknak le na Biakinn ca in, hi na ka bawlmi hempoh hi phawk ngil zal pahsun.
15 Mahlai in Judah miten Sabbath ni-in, sabit ngah a ngawi lih haw mu ing. Midang vang a cangho vam haw le a sabittui haw, sabit ngah, a theipi ngah haw, le thil dangte a laak tei humah suanto in, Jerusalem ah a puak lih haw mu ing. Sabbath ni-in, imah zuak tuk ngawlin ngallinnak pia ing.Ref 13:15 Suah 20:8-10; Daan 5:12-14; Jer 17:21-22;
16 Taiar khua mi Jerusalem a ummi ten Sabbath ni-in, ka mihing tei lakah zuak tukin ngasa le thildang a phunkim pua haw hi.
17 Judah mi hotute cu liat ing, “Thil pha ngawl na bawl uhmi hi zo hem un! Sabbath ni palcat uh ci.
18 Hiti bang hi na pu le pa uhten a bawl haw hangin ven, Pathian i bawlsiatnak thuakin hi khuapi vang siatsuah khawng a hihnak uh! Sabbath ni cu nawngkaitikin, Israel humah Pathian thinuknak na hentik dedeuh uh,” tin mawhsiat ing.
19 Mah hangin taklam hun hengin Sabbath ninote 13:19 Judah mitei Sabbath ni cu tawngkai ni nga taklam ni tum pen pan, ni luk ni taklam ni tum tian hi. a pat sialin khua kongkate khak tukin le mah Sabbath ni a bo laklawh kongka cu hong tuk ngawlin thupia ing. Sabbath ni-in, khua sungah na imah tumtik tuk ngawlin ka mihing khenkhatte cu kongkate cingtik bok ing.
20 Vei nih, vei khat dawl bawlin, na phunkim zuaktute cu khuapi kulhtian pualeu lamah tawngkai ni nga ni zancam mek haw hi.
21 Mah tei lakah, “Zing tianin ngak nuam pahsuh un, thawnthongin ngak sual tuk uh ci. Na zuak tum leleng uh tale nase zetin bawl tung,” tin ngallinnak pia ing. Mah sawng cu Sabbath ni-in hungleh haw ma toh.
22 Levi mite cu amuh le muh thianthohnak bawl tukin le Sabbath ni thiangthono cang tukin kongka cu phano in cing un hi, tin thupia ing. Maw, ka Pathian, hi ka bawlmi hempoh hi phawkngil zal pahsun, na ihnak a ngeng bangin na hehpihnak cu ka lakah hengtik zalin hi.
23 Mah hunlaihin, Judah mi pano tampi ten miphun dang numei Ashdod mi, Ammon mi le Moab mite huai haw tih za ung.Ref 13:23-25 Suah 34:11-16; Daan 7:1-5
24 A hin haw mi a cano haw a khenkhatte cu Ashdod awn le awn dadang mangin ka awn uh thiam haw ma toh hi.
25 Mah panote cu hupin, tamnek ing. Vat le dengin, a sam haw tianin bawhsak ing. Amuhte hei hihen, a canote hei hihen, miphun dang tei canu huai tuk ngawltohin le a capate pasal tuk ngawltohin, Pathian min salin, tamsiatnak thutiam bawltik ing.
26 A lak hawah, “Kumpi Solomon sualtiktu cu ngamdang numeite hi. Amah cu miphun dang kumpi hempoh sangin ngeng saw hi. Pathian in amah cu it in, Israel mi venghawng humah kumpi dektik hi. Mahnaven mah sualnak sungah cak hi.Ref 13:26 2Sam 12:24-25; 1Kum 11:1-8;
27 Mahti bangin maw na ziaza uh pha ngawlte zui in le miphun dang numei cu huai in, na Pathian uh i thupiakmi cu zui ngawlin ka um bok tuk uh?” tin ti ing.
28 Thiampi Sang Eliashib i capa cu Joiada hi naven Joida capa pa khatin Beth Horon khua mi Sanballat i canu huai hangin Joiada cu Jerusalem pen hawlvawk ing.Ref 13:28 Neh 4:1;
29 Maw, ka Pathian, hi miten thiampi nadeh, thiampi le Levi mite tuah thutepnak na bawlmi a palcat daan haw hi phawk leleng zalin hi.
30 Mipite cu a lak hawah miphun dang teita umkha tuk ngawlin thianthohnak bawltik khawng ing. Thiampi le Levi ten a nadeh haw theiciang tukin daante bawlsak ing.
31 Hun tekmi a kim ten biakpiaknak a piakmite halnak tuk thing le anthak le thingngah thak biakpiaknak a piak tuk mite vang ngaihsutsak ing. Maw ka Pathian, hite hi a pha lamin hu theihsak zalin hi.