9
Miphun Dang Zi Neih Thu Ezra In Thei
1 Hih nate a bawl ceng haw ten, Israel hotu upa khenkhatte ka lakah hung haw in, “Mipi hihen, thiampi le Levi mite hihen cangpakin um haw ma hi. Ka elkim ngam uh a, um Kanaan mi Ammon mi, Moab mi le Izipt mite tuah um langkhatin, Hit mi, Periz mi, Jebus mi le Amor mite tuah cokheldun khawng haw hi. Hi miphun tei a bawl haw mi ningdelhhuai thilte vang bawlbok haw hi.
2 Judah pano ten miphun dang numei huai in, Pathian miphun thiangtho cu kahpia le miphun nawngkai in suak zo hi. A nase deuh cu hotu le bawite hi,” tin ti haw hi.
3 Mah thu ka zak ten khawngai lungsia in ka puan botkek ing, ka sam le ka khamul botin, lungbing amthongin khung ing.
4 Taklam biakpiaknak bawl hun tian lungsia in khung ing, mi khenkhat ka elah hung haw hi. Saltannak pen a kikmi tei sualnak thu Israel Pathian in, a phuan hangin thinsu mite hung haw hi.
5 Taklam biakpiaknak bawl hun a hen ten khawngai in, ka khunnak pen thoto in, ka puan balpi tuah baanzak le khukdinin, Topa ka Pathian nelah thungen ing.
6 “Maw Pathian aw, zakca zetin, na mai hei zo ngam mang. Ka sualnak uh hi ka lu uh sangin sang saw in van khong hi.
7 Ka pu le pa tei san pen tutian na mihingte hi sual ngangai ung. Mah ka sual uh hangin kei muh le ka kumpite uh, ka thiampi uhte tian ngamdang kumpi tei khut sungah heng ung. Amu nuam bang that haw, ka na uhte sut haw a, thawngah khia in tuni tian zakca le mitmai sia in bawl haw hi.
8 Atu-in, hun comno sung, Topa ka Pathian uh, nangmah in hehpihin, mi khenkhatte cu nungdamin luattik ci, mahten hi mun thiangtho ah himdamno in um ung. Saltannak pen kohte cu suahtulin, nunnak thak pia ci.
9 Sal hi nave ung, saltannakah zamthong ma ci. Persia kumpite cu ka hum uhah a mitmai haw phatikin, Judah le Jerusalem ah himdamno in umleh tukin le a sia khawng zo mi na Biakinn saleh tukin hah ci.
10 “Mahnaven atu-in, maw ka Pathian, hitih bang thu le la a um nungten ikaw ka hilh ngam tuk uh toh? Na sila profet tei lak pen,
11 na piakmi thukham hempoh siat suah khawng ung. Na profet ten ka luah tuk uhmi ngam cu ngamsung mihing ten nintikin, ngam buppi ah ningdelhhuai thil le thilpha ngawl tuah a dimtik haw hangin ngam thiang ngawl hi, tin hilh haw hi.
12 Ka luah tuk uhmi ngam cu ngamnop hi tukin le a casuan tei lakah a co haw tukin a deih ngangai uh ahi tale hi ngamah a umsa mite tuah huaidunnak bawl hihim tuk ngawlin le a lawhtin hawnak tuk bawm hihim tuk ngawlin tiam hi.Ref 9.12 Suah 34:11-16; Daan 7:1-5
13 Ka sual uh hangin le ka phat ngawl uh hangin hi tizah bawlsiatnak ka thuak nung uhten, maw ka Pathian uh, nangin ka thuak tuk uhmi sangin dem deuh bawlsia in, atu bangin nungca in umtik ci, tih thei ung.
14 Mahti bang nungten itin kaw hi mipha ngawlte tuah huaidunnak bawlin na thukhamte cu ka nunghek thei tuk uh? Mahti bangin ka bawl uh tale na thinuktik leita tuk ung, pa khat hei luat ngawlin ka ci uh mittik khawng tukma cim?
15 Topa aw, Israel Pathian, nang cu midikcang hi ci, tu hei in, na luattikmi a tang calam ung hi. Na mitmuhin, ka sualnak uh tuah um ung, na mai ah a hung ngam tuk hei hi ma ung,” tin ti ing.