8
Saltannak Pen A Kikmite
1 Artakzaksis kumpi a hih laihin Babilon saltannak pen Ezra tuah Jerusalem ah a kikmite, a hinnam haw lubel tei cazin cu a nuailam bangin hi.
2-14 Finehas hinnam pen Gershom.
Ithamar hinnam pen Daniel.
David hinnam pen Shekaniah i capa Hattush.
Parosh hinnam pen Zekhariah le a hinpih mihing za le sawm nga tuah a piannak haw sialsiahnak cazin um tek hi.
Pahath Moab hinnam pen Zerahiah capa Eliehoenai, mihing za nih tuah hi.
Zattu hinnam pen Jehaziel capa Shekaniah, mihing za thum tuah hi.
Adin hinnam pen Jonathan capa Ebed, mihing sawm nga tuah hi.
Elam hinnam pen Athaliah capa Jeshaiah, mihing sawm salih tuah hi.
Shefatiah hinnam pen Mikhael capa Zebadiah, mihing sawm liat tuah hi.
Joab hinnam pen Jehiel capa Obadiah, mihing za nih le sawm le liat tuah hi.
Bani hinnam pen Josifiah capa Shelomith, mihing za le sawm luk tuah hi.
Bebai hinnam pen Bebai capa Zekhariah, mihing sawm nih le liat tuah hi.
Azgad hinnam pen Hakkatan capa Johanan, mihing za le sawm tuah hi.
Adonikam hinnam pen Elifelet, Jeuel le Shemaiah, mihing sawm luk tuah hi.
Dawllam deuhin, a kik mite haw hi.
Bigvai hinnam pen Uthai le Zakkur, mihing sawm salih tuah Jerusalem ah kik haw hi.
Ezra In Levi Mi Zei
15 Ahava khua ah a luangmi ngun mawkah mipite cu sam khawm ing, mah laih munah ni thum sung cam ung. Mipi lakah thiampi um haw naven Levi mi pa khat hei um haw ma.
16 Puitu mi kuahte: Eliezer, Ariel, Shemaiah, Elnathan, Jarib, Elnathan, Nathan, Zekhariah le Meshullam le zilhtu pa nih: Joiarib le Elnathan sam ing.
17 Kasifia khua a lupibel Iddo lakah, amah le a bawmtute, biakinn satute tawk tukin le Biakinn sung a, Pathian nadektu mihing kuat tukin a hum a, upate hah ing.
18 Pathian hehpihnakin, Mahli hinnam Levi mi, thil tithei zetmi Sherebiah kuat haw in, a capa le a unau sung pen mihing sawm le liat tuah hung haw hi.
19 Merari hinnam Hashabiah le Jeshaiah vang a unaupih mihing sawm nih tuah kuat haw hi.
20 Mah hum pen Levi mite bawmtu tukin kumpi David in, a pu tei nadeh a piakmi Biakinn nadektu mihing za nih le sawm nihte tel haw hi. A venghawng haw in, cazin sungah a min haw khum khawng hi.
Thungen In, Ancang Haw
21 Ahava Ngun elah ka venghawng uhin Pathian mai ah ancang tukin le ka lungmu uh nemtik tukin sosuah ing. Ka lampi uhah keimuh le ka canau uhte, ka thil neih uhmite himdam tukin Pathian lakah ngen ung.
22 Ka hawhnak uh lampi ah ngal tei khut pen cingtu tukin kumpi lak pen cipuh ngalkapte ngen tukin zakca sih ing, itahim titale ka Pathian uhin amah a muangtute cu muicu pia in amah a nunghektu tei humah a lungdam ma hi, tin kumpi lakah hilh zo ing.
23 Mah hangin kohte hup tukin Pathian nelah thungenin ancang ung; mahten ka thungetnak uh bangin pia hi.
Biakinn Ca Laksawng
24 Thiampi upa tei sung pen Sherebiah, Hashabiak le adang sawm khat teng ing.
25 Kumpi bawipa ngaihsutnak piatute, a khutnuai bawi dangte le Israel miten Biakinn a man tukin a piak haw mi sui le ngun, beel le kuangte cu cuai khai in, thiampi tei lakah pia ing.
26-27 Ka piakmi cu a nuailamte haw hi.
Ngun cuai thawng sawm le thawng luk za nih le sawm nga,
Ngun kuang za khat, ngun cuai sawm nga man;
Sui cuai thawng nih le za nga;
Sui kuang kum sawm nih, sui cuai li man;
Daal kuang phazet pa nih, sui kuang zahin, a manpha mite hi.
28 A lak hawah, “Noh cu na pu le pa tei Pathian Topa i lakah mi thiangtho uh ci, a lakah lungtho zetin, a piak haw mi sui le ngun kuangte hi a thiangtho mite hi.
29 Biakinn na henpih laklawh uh tian ngalling zetin cing un. Mahlai munah thiampi tei khan pen cuai khai unna, Jerusalem khua a, um Israel mi hotu upate, thiampi upate le Levi mi upa tei lakah pia un,” ti ing.
30 Mah hangin sui le ngun, beel le kuangte cu Jerusalem Biakinn ah koih tukin thiampite le Levi miten la haw hi.
Jerusalem Ah Kik Haw
31 Jerusalem cu ha khat ha, ni sawm le ni nih ni-in, hawh tukin Ahava ngun pen tul ung. Ka lam tuan uhah Topa cu ka lak uhah umin, ngal tei sim le damiah tei pan kuhnak tawk ngawlno in, kohte cu hup hi.
32 Jerusalem ka hen uhten ni thum sung cawl ung.
33 Ni linak ten Biakinn ah hawhin, sui le ngun, beel le kuangte cu cuaikhai ung a, ka khai celh uhten Uriah capa thiampi Meremoth lakah pia ung. Meremoth tuah mahlai ah Finehas capa Noadiahte vang um haw hi.
34 Cuaikhai in, a sial khawng ceng haw ten a kimno in cazin sungah khum haw hi.
35 Babilon saltannak pen a kikmi hempoh ten Israel Pathian nelah halkang biakpiaknak bawl haw hi. A piak haw mite cu Israel mi venghawng ca in khuicang sawm le pa nih, tuucang sawm kuah le pa luk, tuuno sawm salih le salih, sualhah biakpiaknak tukin keelcang sawm le pa nihte hi. Hi nganhingte cu halkang biakpiaknakin Topa i lakah pia haw hi.
36 Kumpipa i laingat a ken haw mite cu Eufrates Nitumnak lam peng a, ngamuktu bawi le bawi dang tei lakah pia in, amuh vangin mipi tei lakah le Biakinn sung Pathian biaknak tukin bopnak pia haw hi.