6
Naupangte le Nu le Pate
1 Naupangte aw, na nu le pa uh upat un. Nu le Pa upat cu Khristian tei nadeh phu hi a thilpha hi.
2 “Na nu le pa uhte upat un,” tih thukhamin,
3 “Na lam uh tuangtik tuk a, na nun khua uh vang sau tuk hi,” thutiam nei thukham masabel hi.
4 Nu le Pate aw, na ca uhte khi a thinuk tukin bawl pahsuh un. Mah sangin Khristian nundan ziaza le zilhdunnak tuah cawmdun saw un.Ref 6:4 Kol 4:21;
Bawite le Silate
5 Silate aw, na bawipa uh khi kihca in upat un. A na haw nadeh uhten Khrih i na hi tih bangin lungmu tak tuah dek un hi.Ref 6:5-8 Kol 3:22-25;
6 Mahtin nadeh uhten a mitmuh sung bekah mitmai pha ngah nuamnak tuah dek pahsuh un. Khrih i sila bangin Pathian i deihmi cu na lungmu hempoh uh tuah dek un hi.
7 Na nadeh uhten mihing tei ca bek poh tin ngaisung ngawlin Topa i ca in dek ing hi tin ngaisungin thatuizetno in dek un hi.
8 Topa in sila hihen, mi luat hei hihen, a kuakua hei hihen thilpha a bawlmi hangin laksawng pia tuk hi, tih khi cing leleng un hi.
9 Noh bawite, mahtih bangbok lengin, na sila tei lakah bawlbok unna, thum pahsuh un. Nangmuhte hihen, silate hei hihen vancungah Topa pa khat na neih uh khi cing leng un hi. Mahmi Topa in kuamah deidat nei ngawlin thuson hi tih khi cing leleng un hi.Ref 6:9 Daan 10:17; Kol 3:25; 4:1;
Pathian Ngalthuam Kim
10 A dawlbelin, Topa tuah na pehzopnak uh le ama ngilnak thawmin, na thazaang uh cu ngil dedeuhtik un.
11 Satan zolnak do thei tukin Pathian piakmi ngalthuam khi silh un.
12 Itahim titale a do uhmite cu mihing hi kha haw ma hi, van a ummi hawvang sia tei huhamte, uktu, thuneitute le a thimmi leihum pumpi uktute haw hi.
13 Mah hangin tu pepan Pathian i ngalthuam khi silh unna, hun sia a hen ten na ngal uhte cu do thei in, a tawp tian na do nung uhten na dinmun uh cu hum ngah tuk uh ci.
14 Mah hangin ngallingsa in um un hi; taikhap ai-in thutak khi na tai uhah khap un; lumphaw ai-in dikcangnak khi na awm uhah tuam un;Ref 6:14 Isa 52:7;
15 Kedam ai-in lemdaihnak Thuthangpha phuan nuamnak khi bun un.
16 A catngawlin thik lumphaw ai-in upnak khi keng leleng un; itahim titale khawhuai ten meiling bangmi thalcang tuah a kap ten mah lumphaw in mittik thei tuk hi.
17 Mahten lukhu ai-in nunpatnak khi la unna, Hawvang i piakmi ngalnam ai-in Pathian i awnkam khi keng un. Ref 6:17 Isa 59:17;
18 Hitih bangte na bawl uhten thungen thahin bawl unna, Pathian nelah Hawvang Thiangtho i lampuinak bangin bopnak ngen un. Iti bang hun hei ten thasia pahsuh un. Pathian i mihing tei ca tukin catngawlin thungen un.
19 Mahten keimah vang cu thuhilh tukin ka ngallin ten Pathian in ka hilh tukmi thu a piak tukin le ngalpha zetin hilhin, Thuthangpha i thu-ip khi ka phuan theihnak tukin thungetsak bok un hi.
20 Atu-in thawng sungah um naveng, Thuthangpha phuangtu palai ing. Thuthangpha cu ka phuan tuk a hih bangin ngalhang zetin ka phuan theihnak tukin thungetsak un hi.
Thukhupnak le Nuksatnak
21 Taikhikas cu a unau uh le Topa i nadehnakah mi muantakzet pa in, ka thu le la cu cangkim zetin hilh tuk a, ka umdan cu thei tuk uh ci. Ref 6:21-22 Kal 4:7-8;
22 Mah hangin nangmu lakah ka hahnak hi. Ka umdan uh le ka khuasakdan uh hilh tuk a, zaangtha cahnakin mang tuk uh ci.
23 Pa Pathian le Topa Jesuh Khrih in Khristian unaupih na venghawng uh lakah lemdaihnak le itdunnak cu upnak tuah pia zal tahen.
24 A catngawlmi itnak tuah a Topa uh Jesuh a ittu na venghawng uh lakah Pathian hehpihnak cu kho zal tahen.