5
Vaknak Sungah Nung Un
1 Nohte cu Pathian i canote na hih uh hangin amah bang tukin zuam un hi.
2 Khrih in eimuh it in, a nunnak eimuh ca in Pathian lungdamtiktu namtui piaknak le biakpiaknakah a piakcopnak bangin na nunnak uh cu itnakin uk hen.Ref 5:2 Suah 29:18; Saam 40:6;
3 Pathian i mihingte na hih uh hangin nupa sualnak, zoh mawi ngawlin nunnak le hampumnakte cu noh lakah a son hei son kha toh pahsuh un hi.
4 Awn pha ngawl, awn kha le ngaihnop ngawl awn cu na ot tukin mawi lehma toh hi. Mah sangin Pathian nelah lungdamnak hilh saw un hi.
5 Na theih cangcian tukin a kulmi cu nupa sualnak a bawltu zoh mawi ngawlin a nungtu le hampumte cu (hampum leita cu milim bia tuah bangten hi) Khrih le Pathian uknak sungah covo nei haw tukma hi.
6 Kuamah in thuman ngawl le pomtak ngawlmi thu tuah zol haw ma hen. Mahti bang a hih hangin, Pathian thinuknak cu a thu a ngai ngawltu tei humah heng tuk hi.
7 Mahti bang mite cu a phial hei phial kha pahsuh un hi.
8 Ni dang laihin nohte cu khuathim sung a nungmi hi uh ci; mahnaven Topa i mihing na hih zo uh hangin atu-in vaknak sungah um uh ci; mah hangin khuavak mihingte bangin nung un hi.
9 Itahim titale phatnak phunkim, dikcangnak le thutak a piangtiktu cu vaknak hi.
10 Topa i lungdamnak khi zei un.
11 Mihing tei khalh mekmi muantak ngawl na le khuathim sung a thilte cu a tawng hei tawngkha pahsuh un hi. Mahti bang thilte cu a vaknakah henpih saw un hi.
12 (Khuathim sung a bawlmi thilte cu zahcakhuai) hi; ot hei ot ngam tuk ngawl mite hi.
13 Mahten ihempoh cu khuavaknakah henpih a hih hun ten a hihnak haw tatak tuah langleh khawng tuk hi.
14 Itahim titale ihempoh ciang zetin langtiktu cu vaknak hi. Mah hangin,
“A hihbu mite khanglo toh unna,
thihnak pen tho toh un;
Mahten na hum uhah
Khrih cu vak tuk hi,”
tin, a tihnak haw hi.
15 Mah hangin na nundan uhah ngalling un. Misilte bangin nung pahsuh un; a cipmi bangin nung un hi.
16 Hun pha na neih uhmi hempoh khi, ngeikheizetno in mang un; itahim titale a hun uh hi hun sia hi.Ref 5:16 Kol 4:5;
17 Misil hi pahsuh un, Topa in bawltik a nuammi zei tum saw un.
18 Micipte zukham pahsuh un, zu cu mi siatsuahtu bek hi. Mah sangin Hawvang tuah dim saw un hi.
19 Pa khat le pa khat Saam labu sung a la, apdunnak, thangphatnak la le la thiang tuah otpihdun saw un. Topa cu apdunnak la le thangphatnak la tuah na lungmu tatak uh tuah thangphat un.Ref 5:19-20 Kol 3:16-17;
20 Ihempoh ca in, a Topa uh Jesuh Khrih minin Pa Pathian cu thangphat leleng un hi.
Zite le Pasalte
21 Khrih na upatnak uh hangin pa khat le pa khat i deihnak khi zuidun un hi.
22 Zite aw, Topa i deihnak na zui uh bangin na pasal tei deihnak khi zui un.Ref 5:22 Kol 3:18; 1Pet 3:1;
23 Itahim titale Khrih in pawlpi humah thu a neih bangin pasal vangin a zi humah thunei bok hi. Khrih amah loli cu pawlpi pantu hi a, Pawlpi cu ama pumpi hei hi bok hi.
24 Mah hangin pawlpi in Khrih deihnak a zui bang bokin zite vangin ihempoh ah a pasal tei deihnak zui haw hen.
25 Pasalte aw, Khrih in pawlpi cu it in, a nunnak tian a piak bangin na zi uhte cu it un hi.Ref 5:25 Kol 3:19; 1Pet 3:7;
26 Hitih bangin a bawlnak cu pawlpi hi, tui sungah a somciangnak hangin a thianthohtik nungten a thu in Pathian nelah ap tukin hi.
27 Mahten pawlpi cu a mawinak venghawng ahi mi, a thiang le sualnak nei ngawl, sonsiatnak le cangkim ngawlnak dang um hihim ngawlin ama lak lelengah a hunpih nuamnak hangin hi.
28 Pano ten a zi haw cu amu pumpi a it haw bangin it bok tukmi haw hi. A zi a ittu pa cu amah le mah ittu hi.
29 (Kuamah in amah le mah huadun awng ma hi.) Khrih in pawlpi cu cawmin, a cinkhawi bangin a kuakua hei in ama pumpi cu cawmin, cingkhawidun tek haw hi.
30 Itahim titale ohte cu ama pumpi pen a langkhen hung hi.
31 Lai Thiangtho in, “Pano in, a nu le pa zamin, a zi tuah umkawm haw henna, pumkhatin suak haw tuk hi,” ti hi.Ref 5:31 Pian 2:24
32 Hi Lai Thiangtho i hilhnakah a thukmi thutak langin mah thutak cu Khrih le a pawlpi cu a zomdunmi haw hi, tih cu thei hung hi.
33 Mahnaven nangmuhte tuah vangin pehzomdun leleng hi; pasal hempoh ten a zi haw cu amu pumpi a it haw bangin it haw tuk a, zi hempoh vangin a pasal haw cu upat haw tuk hi.