FILIPI
Khua Khristian Tei Lakah Paul i Laikuat
(Paul’s Letter to the Philippians)
Thulamsial
Filipi khua Khristian tei lakah Paul i laikuat hi Europe ngam sungah a dinsuah masabelmi Filipi khua a, pawlpi tei lakah a kuatmi hi. Filipi cu Macedonia ngamah a ummi Rom a acozah i ukmi ngam hi. Paul in Filipi pawlpi tei lakah lai a kuat ten amah cu thawnginn sungah um hi. Mah thawnginn sung a umlaihin Khristian nadektu a dang ten dodalin, Filipi pawlpi sungah zilhnak man ngawlte um haw hi. Mah hangin Paul cu a thinkham mahtak hi. Mahnaven a laikuatmi hi, lungdamnak le muansannak tuah dimin, mahmi lungdamnak le muansannakte cu Jesuh Khrih a upnak hangin a ngahmi hi tih khi langtik hi.
Hih laikuat a ngatnakbel cu thawnginn sungah haksa zetin, a um laihtakin Filipi Khristian unau ten bopnak kuat haw a, mah lungdamnak thuhilh lehnak tukin hi laikuat ngan hi. Filipi pawlpi hihen, Paul hei hihen thin haksa in um haw naven Paul in hi hun hi hunpha tin ngaisungin Filipi pawlpite thapiaknak le hehnemnakin mang hi. Tuangkhawnnak le hampumnak i ukmi hi ngawlin Jesuh Khrih bang bokin niamkhiatnak lungmu nei tukin hehpihnak ngen hi. Khrih tuah lungmu pa khatin, a um theihnak haw khi Judah daan a zui theihnak haw hang hi ngawlin upnak i hangin Pathian hehpihnak laksawng hi saw tih khi thei lehtik hi. Jesuh Khrih tuah lungmu pa khatno in, a ummi tei lakah Pathian in lungdamnak le lungnopnak pia hi tih thu vang ngan hi.
Hi laibu sungah lungdamnak, lungnopnak, thin khatnak le Khristian nunnak le upnak sung pen thuak theihnak hi thuk deuhin le melcik taak deuhin langtik hi. Filipi pawlpi a itnak vangin langtik hi.
1
1 Khrih Jesuh i sila Paul le Timote in, Khrih Jesuh tuah a pehzommi Filipi khua a Pathian i mihing tei lakah le nangmu pawlpi sung a lamhuaitu le bawmtu tei lakah laikuat ung hi.
2 A Pa Pathian le a TopaRef 1:2 Nung 16:12; uh Jesuh Khrih in hehpihnak le lemdaihnak thupha pia zal tahen.
Filipi Khristian Tei Ca Paul i Thungetnak
3 Nangmuhte ka ngaihsut sial ten ka Pathian humah lungdamzet ing.
4 Na venghawng ca uhin thu ka nget sial ten lungdamnak tuah thungen ing.
5 Itahim titale thuthangpha nadehnakah a pat pepan, tuni tian nohte cu keimuh bawm lelengtu hi uh ci.
6 Mah hangin nangmu sung a nadeh pha a pantu Pathian in, Khrih Jesuh i Ni a hen laklawh tian nangmuh tei humah dek suak tuk hi tin muang ing.
7 Nangmuh cu ka lungmu sungah caam leleng uh ci. Nangmu humah hiti bang lungmu ka neihmi hi a nei tukin tak ing. Itahim titale atu thawnginn sung ka umah hihen, a pualamah luat zetin Thuthangpha tanpih lo in, khohkhah hen tin ka dehnakah hei hihen, Pathian i hehpihnak hangin ka comi ka dehvo ah na venghawng uhin tel leleng bok uh ci.
8 Khrih Jesuh i lungmu sung pen a hungmi itnak tuah nangmuhte itzet ing ka tihmi hi thutak hi tih a theitu Pathian um hi.
9 Pa khat le pa khat na itdunnak uh cu khangto sesem tahen na, mahmi tuah thuman theih theihnak le thu khenkhuai theihnak tuk cihnak tuah na khantoh theihnak tukin thungen ing.
10 Mahtin na khangto uh tale, a phabelmi khi teng thiam tuk uh ci. Jesuh Khrih i Ni ten nawngkainak le mawhsiatnak hempoh pen thiang tuk uh ci.
11 Jesuh Khrih bek i piak theihmi ngamtat pha ngangai cu na nunnak uhah dim tuk a, mahmi cu Pathian thangphatnak le sunloihnak tukin hi.
Khrih Ca In Nuntuk
12 U le naute aw, keima humah a hengmi thilte hi, Thuthangpha tangzalhtiktu lamin cang saw tihmi na theih tuk uhin deih ing.
13 Hitih bang thilte hangin kumpi inn cingtute le hilai a midangte hei in Khrih i sila ka hihnak hangin thawng a khiaknak haw khi thei khawng haw hi.Ref 1:13 Nung 28:30;
14 Mahten hi thawng ka taknak hin a u naupih uh a tam saw cu Topa a muannak haw khi khotikin, ngalpha sesemin le ngam zetin thu hilh haw hi.
15 Mi khenkhatte cu iksiknak a neite le thu el nuamte a hih haw hangin Khrih i thu cu hilh ngai haw hi; mahnaven mi khenkhatte cu lungmu taituang a hihnak haw in, Pathian i thu cu hilh haw hi.
16 Mah miten itnak a neihnak haw hangin hi, itahim titale Thuthangpha a bawmtu tukin Pathian dehvo a piak khi mu haw hi.
17 Mi khenkhat ten tuangno in Jesuh Khrih thu hilh ngawlin amu hampumnak le ngaihsak dunnak tuah hilh haw hi. Thawnginn sungah a umlaihin haksatnak bet thuah nung tin ngaisung haw hi.
18 Imah poi ma! Ka lungdamzet poh ing. Lungmu phat ngawlnak tuah a hilh haw hei in hihen, lungmu tuangin, a hilh haw hei in hihen, Khrih i thu hilh haw pohleh ka lungdam leleng tuk poh ing.
19 Itahim titale nangmu thungetnak le Jesuh Khrih i Hawvang lak pen a hengmi bopnak i thawmin miluat hi tung tih cu thei ing.
20 Ka nuambelmi le ka ngahhelh zetmi cu deh tuk dehvo ka neihmi hi dek suak zal thei leng, mahten i hun bang hun hei hihen, a cuangin atu hun hihimah ngalphatnak tuah dimin ka nunah hihen, ka thihah hihen ka lungmu le taksa venghawng tuah Khrih hi upat maizahnak nei thei ahin, tihmi hi.
21 Nun tihmi hi i heng? Kei ka ca in nun hi cu Khrih hi. Mah hangin thi vangin pha sesem hi.
22 Mahnaven nungin, thil man nei deuh ka dek thei ahi tale, i saw teng tuk hing ngim tih thei mang hi.
23 Ka lungmu mun nihah hawh hi. Hi nunnak hi zamsanin Khrih tuah um cu nuamzet ing hi; mah tih hi cu pha deuh ngangai hi.
24 Mahnaven ka nun hih tuk cu nangmu ca in kulzet sih hi.
25 Mahmi cu ciang zetin ka theih hangin nung hih tung. Upnak sungah na khantohnak uh le na lungdamnak uh a belh bawmtu tukin nangmu lakah ngei nung tuk laih ing.
26 Mahten nangmu lakah ka henleh ten, Khrih Jesuh tuah na nunnak uh a pehdun hangin uangkho zetin um tuk laih uh ci.
27 Atu-in, a thupimi cu Khrih Thuthangpha i deihnak bangin na nundan uh cu ahi thei ahin, nangmuhte ka tawk vang ka tawk thei ngawl vangin hihen, tuptahmi pa khatah khozet dingin Thuthangpha i ca in munkhatah thinkhatno in ngaldo langkhat uh ci tih cu thei ing.
28 Na ngal uhte khi lau ngawlin ngalpha zetin um unna, amuh cu sung haw tuk a, nohte cu nehtu hi tuk uh ci tih khi langtik tuk hi; itahim titale nehnak a piatu cu Pathian hi.
29 Khrih na upnak uh bekah hi ngawlin ama ca na thuaknak uhah covo sepmi na hih uh hi, mi bawngpha hi uh ci.
30 Mah hangin atu-in ngaldonak sungah keima lakah tel thei bok tuk uh ci. Mah ngal cu nung a ka do lih vang cu mu zo uh ci, tu hei in, na theih uh bangin do li laih ing.Ref 1:30 Nung 16:19-40;