4
Pumkhat Hihnak
1 Topa i nadehnak hangin thawngta mi keimah in; Pathian sapmi na hih uh bangin na nunnak uhah Pathian sammi na hihnak uh langtik un, tin so ing.
2 Thinnemnak nei un; niamkhiat le thinsau in um unna, itnak na neih uhmi khi pa khat le pa khat na thinsaunak uh langtik un.Ref 4:2 Kol 3:12-13;
3 Hawvang i piakmi pumkhat hih khawmnak khi a kho leng tukin munkhatah a ken kawmtu lemdaihnakin khotik un.
4 Pathian in, a samnak sanbel a muansan uhmi cu pa khat a hih bangin pumpi pa khat um a, Hawvang pa khat um bok hi.
5 Topa khat um a, upnak pa khat um, tuiphumnak pa khat um hi.
6 Pathian pa khat umin mi hempoh i Pa hi. Amah cu ihempoh i humah Topa hi; ihempoh i sung pen nadekin ihempoh i sungah um hi.
7 A venghawng uh bulpak tekin, covo laksawng nei ten hung a, mahmi cu Khrih i a piak tekmi bangin hi.
8 Lai Thiangtho in;
“A sannakbel mun a hen ten,
ngalmatmi tampi hawhpih;
mihing tei lakah laksawng pia,”
a tihmi khi kim hi.Ref 4:8 Saam 68:18;
9 Mahten “Heng” tih cu a sullam ikaw? A sullam cu a masabelin leihum a niamnakbel munah heng tihnak hi.
10 Mahten a tolhsukmi cu a hengmi leleng hi a, vancung le van pualamah vang heng tihnak cu van le leihum hempoh ah amah cu kim khawng tih langtiknak hi.
11 “Mihing tei lakah laksawng a piatu,” hei cu amah hi. Laksawng a piakmi a khenkhat cu tiikmite, khenkhat cu profette, khenkhat cu Thuthangpha phuangtute, a khente cu pastor le zilhtu haw hi.
12 Hitih bangin laksawng a piaknak cu; Pathian i mite Khristian nadeh dek thei in, Khrih i pumpi a khantohtik theihnak tukin hi.
13 Mahten a upnak uh le Pathian Capa a theihnak uh pa khat sungah khawm khawng tuk hung; pasal piting hi tuk hung a, Khrih i pasal piting a hihnak a sannakbel munah heng bok tuk hung hi.
14 Mahti bangten mizoltu tei thuzilhnak le lampeng tawn haw hen tin, a bawlcawm haw zolthu, tui cawkpi le huihsia in ilai banglai ah a soih vawkmi naupang bangleh tukma toh hung.
15 Itdunnak lungmu pua in, thutak hilh saw in, a lu uh ahi mi Khrih sungah a phunkimin khangto tuk mite hung hi.
16 Ama uknak nuai ah pumpi hum a, khen dangte cu lemzetno in pehdun khawng haw hi. Nguh pehdunnak nguh cangno ten taksa pumpi cu munkhatah lendun khawm khawng hi. Mah hangin taksa pum i khen dangte cu amu nadeh tuk tek a deh haw ten taksa pumpi cu a venghawngin itdunnakin khangto hi.Ref 4:16 Kol 2:19;
Khrih Sungah Nunnak Thak
17 Topa i minin nohtei lakah ngallinnak hilh nuam ing; Gentail mite bangin nung toh pahsuh un. Amuh tei ngaihsutnak cu phukthong hi in,
18 a lungmu haw cu thim hi. Pathian i piakmi nunnak sungah covo i mamah nei haw ma hi, itahim titale theihmi imah nei ngawlin a lungmu haw ngeng belbul hi.
19 Zahcak hei theileh haw ma toh hi. Sualnakah paihdunin supnak imah nei ngawlin zoh mawi ngawlmi thil a phunkim bawl haw hi.
20 Khrih i thu na theih uhmi cu mahtih bang kha ma hi. Khrih thu cu thei ngah zo uh ci;
21 Amah zuitu na hih uh bangin Jesuh sungah thutak cu zilh zo tohmi hi uh ci.
22 Ni dang a na nundan uh bang lengin, a nungtiktu na nunlun uh cu vawk toh un, mahmi na nunlun uh cu mizoltu tisa deihnak i thih susuktik lihmi khi hi.Ref 4:22 Kol 3:9;
23 Na thin sung uh le na ngaihsutnak uh a venghawngin siamthakmi hi khawng tukmi hi.
24 Pathian mel bangin bawlmi, a dik le a thiangtho in, a langmi nunnak dik, na nunnak thak uh tuah nung un hi.Ref 4:24 Pian 1:26; Kol 3:10;
25 Zolthu son toh pahsuh un. Pathian umtu pa khat le pa khat thutak hilhdun leleng tuk hung: itahim titale Khrih pumpi sungah a venghawng uhin sungtel khawng hung hi.Ref 4:25 Zek 8:16;
26 Na thinuk ahi tale sualnak sungah na thinuknak ni tumpih ma hen; nilui in thinuk pahsuh un.Ref 4:26 Saam 4:4;
27 Satan khi hunpha pia pahsuh un.
28 Nguca li mekmi pa vangin ngu lehma toh hen; ama nunnak ca in thiangthono in pumcawmtu hi tukin le mi ca-ngah a bawmtu hi tukin nadek tahen!
29 Na otpihdun uhten awnkam hang mang pahsuh un, na awn uh a zatu ten nemcuamnak a ngah theihnak tukin awnkam pha le awnhum mang un hi.
30 Pathian i Hawvang Thiangtho khi khaw-ngaitik pahsuh un; itahim titale Hawvang cu Pathian ta hi uh ci, tih sialsiahnak a hih hangin Pathian i luattiknak Ni heng tuk hi tih theihnak tuk na hi.
31 Lungmu sungin mihuatnak le ngaldunnak, tisa nopnak le thinuknakte khi botik un hi. Pa khat le pa khat hauhdunnak, zotsaknak le huatnak lungmu neuno hei nei toh pahsuh un.
32 Mahte sangin pa khat le pa khat hehpihdun unna, Khrih i hangin Pathian in, a ngaihthiam bangin pa khat le pa khat ngaithiamdun un hi.Ref 4:32 Kol 3:13;