3
Gentail Tei Ca Paul i Nadehnak
1 Mahti bang a hih hangin Jesuh Khrih ca in thawng a tami keimah Paul in, Gentail mi nangmuh tei ca in, Pathian nelah thungen li ing.
2 Pathian in nangmu phatnak tukin hi nadeh hi a hehpihnakin pia zo tih cu thei khawng zo tuktoh uh ci.
3 Pathian in, a thukuh cu phuangin, ka lakah langtik zo hi. (Hi thu hi a com zawngin ngan zo ing a,
4 mah ka ngatmi na sial uh tale Khrih i thu-ip keima theih dan cu theithei tuk poh uh ci.)Ref 3:4-6 Kol 1:26-27;
5 Ni dang laihin mahmi thu-ip cu kuamah i lakah phuan hi awng ma hi; mahnaven atu cu Pathian in, a thiangmi a kamtai le a profet tei lakah a Hawvang tuah phuang zo hi.
6 Mah a thu-ip cu hitih bangin hi. Thuthangpha a umnak hangin Gentail mite vang Judah mite tuah Pathian thupha cotu hileh bok haw zo hi; Pumkhat sungah a telmi hileh bok zo haw toh a, Khrih Jesuh i thawmin Pathian i thutiamnak sungah covo nei bok haw hi.
7 Mah Thuthangpha nadektu ka hihnak hi Pathian i piakmi a laksawng hi. Mahmi laksawng cu a cahnak huham i thil a bawlmi hi.
8 Kei cu Pathian i mihing tei lakah mi nautabel sangin nauta saw laih ing. Mahnaven son theih ngawl tianin, a ngengmi Khrih Thuthangpha cu Gentail mitei lakah henpih tukin le,
9 Pathian i tuptahmi a thu-ip cu iti bangin lang zo him tih khi mi hempoh tei muh theih tukin a mit haw vaktik tukin Pathian in dehvo pia hi. Ihempoh a bawltu Pathian in nunglam hun khan sung hempoh a, thu-ip cu sel lo hi.
10 Ita mah tin sel hum ti ahin a pawlpi i hangin vancung a vancungmi uktu le thuneitu ten Pathian i cihnak cu a phunkimin, tu khang hunah a theihkim theihnak haw tukin hi.
11 Mahmi cu a kumkhua in tuptahnak a neih bang bokin Pathian in bawlin a Topa uh Khrih Jesuh sung pen bawlsuak hi.
12 Khrih tuah a pehzop dunnak uh i hangin le Amah a upnak uh i hangin Pathian umnak munah lungmuang zetin tum theihnak nei hung hi.
13 Mah hangin nangmu ca nuncimnak ka tawh ten na thasia pahsuh un, tin kun ing hi, Nangmu ca in, a phami ngihngeh poh hi.
Khrih i Itnak
14 Mah hangin a Pa uh i mai ah khukdinin thungen ing.
15 Amah cu innkua hempoh uhah a ummi le lei le van laklawh a ummi hempoh ten minpha a co theihnak haw bulpi hi.
16 A sunloihnak soncelh ngawlmi pen a hawvangin, na sunglam uh a mihing na hihnak uh khi cahnak huham pia tukin Pathian nelah ngen ing a,
17 nangmu upnak thawmin, na lungmu uh cu Khrih in ama innah bawl zal tahen, tin thungen ing. Thu ka nget bet uhmi cu na zung uh cu itnak sungah mantik unna,
18 mahten Pathian i mihingte tuah lungmu khatin, Khrih i itnak hi, itihzah thukin, sang a, itihzah sau in, zal him tih khi theih zawhnak nei tuk uh ci ti hi.
19 A itnak cu cangkim zetin theih khawng cu um awng tukma naven theileh leng tuk poh uh ci. Mahten a cangkimmi Pathian a hihnak tuah na nunnak uh cu dim zal tahen.
20 Eimu sungah a huham tuah nadektu in, a nget theih uhmi le a ngaihsut theih uhmite sangin a let tampi in dek thei hi.
21 Pawlpi sung le Khrih Jesuh sung pen Pathian ama lakah thangphatnak a kumkhua in um leng tahen! Amen.