2
Thihnak Pen Nunnakah
1 Ni dang laihin, na phat uh ngawlnak le na sualnak uh i hangin hawvang lam pen mithi hi uh ci.Ref 2:1-5 Kol 2:13;
2 Mah hun laihin leihum daan pha ngawl zui uh ci; Van le lei laklawh a hawvang huham neitu, Pathian thu a zui nuam ngawlte uktu i thu khi zui uh ci.
3 Thungai in, a ti uh tale, a venghawng uhin amuhte bangbok leleng hung hi; nuammi poh zui in, a lungmu uh le a taksa uh i nuam babangin bawl hung hi. Eimu hihnak bangkekin, a ti uh tale ohte vang, midangte bang bokin Pathian i thinuknak a thuaktu tukte hung hi.
4 Mahnaven Pathian i ohte a hehpihnak cu cangkim ngangai in, a itnak vang cu a ngeng leita hangin,
5 eimu sualnak sungah hawvang lam pen a thisa hi nave hungin, Khrih tuah nunnakah tholehtik zo hi. Pathian i hehpihnak thawmin patmi hi uh ci.
6 Khrih Jesuh tuah a pehzopnak uh thawmin Pathian in Khrih tuah vanngam pen uk langkhat tukin amah tuah tholehtik zo hi.
7 Hitih bangin a bawlnak cu thudang hi ngawlin, Khrih Jesuh pen oh ten a itnak ngeng dan khi kumkhua phatin langtik a nuamnak hangin hi.
8-9 Itahim titale nohte cu Pathian i hehpihnakin nunpatmi hi uh ci a, mah nunpatnak cu amah na upnak uh i hangin na ngah uhmi hi. Hi nunpatnak na ngahnak uh i hangin kuamah tuangkhawng tukmi hi ma hi, itahim titale a deh a bawl theihnak haw hangin ngahmi kha ma hi, Pathian i laksawng hi.
10 Ohte cu Pathian i bawlmite hung a, eimu ca in, a tuptahsami thilpha cu bawlsak tukin Khrih Jesuh tuah a pehzopnak uh i hangin semsuah thakmi hi zo hung hi.
Khrih Sungah Pumkhat
11 Na suahkehnak uh pen Gentail mi nohte cu Judah miten, “Vunceptan ngawl phun,” tin sammi hi uh ci; amuh le amuh cu, “Vunceptan,” tin tidun haw hi. (Mahmi cu amu taksa lelengah a langtik haw mi khi hi.) Noh Gentail mite ni dang laihin iti bangmi uh cim, tih khi phawkngil pahsuh un.
12 Mahlai in Khrih tuah pehdunnak nei ma uh ci. Miphun dang hi uh ci a, Pathian in, a tenmi a miphun tei lakah nohte tel kha ma uh ci. Pathian in, a thutepnak bulpi a mitei lakah um kha ma uh ci. Hi leihumah muansan tuk le Pathian nei ngawlin a um thongte hi uh ci.
13 Mahnaven vei khat laih a kangdun zetmi nohte cu atu-in Khrih thisan hangin naidunzetleh zo uh ci.
14 Itahim titale Judah mi le Gentail mi cu pumkhatin, a bawl zo hangin Khrih amah loli cu ohtei lemdaihnak hi. Judah mi le Gentail mite a khentiktu le ngalin, a bawltu cu ama pumpi loli in phialet khawng zo hi.
15 Judah tei daan cu thukham le thupiakmite tuah phiat khawng hi. Mahti bangin a bawlnak cu amah Khrih tuah a pehzop dunnak hangin miphun pa nih cu miphun a thak pa khatin, a cantiknak tukin hi. Mahtin a bawl hangin lemnak umtik hi.Ref 2:15 Kol 2:13;
16 Ama thihnak sung pen Khrih in, a ngaldunnak haw khi botikin, ama thinglamtehah miphun pa nih cu phun khatah khawmin, Pathian nelah hunpihleh hi.Ref 2:16 Kol 1:20
17 Jesuh Khrih cu hungin lemnak Thuthangpha cu mi hempoh lakah hilh hi. Pathian tuah a kangdun zetmi noh Gentail mitei lakah hihen, Pathian tuah a naidun zetmi Judah mitei lakah hei hihen hilh hi.Ref 2:17 Isa 57:19;
18 Khrih i hangin Judah mi hihen, Gentail mi hihen, a venghawng uhin Pa Pathian mai ah Hawvang pa khat i hangin zuan thei hung hi.
19 Mahti bang a hih hangin noh Gentail mite vang mikhual le ngamdangmi hi lehma toh uh ci; Pathian i miphunte tuah a bang tenmi hi uh ci a, Pathian i innkua ah sungtel hi zo uh ci.
20 Nohte vang nungzuitu le profet tei a bul a phut ngah suakmi hum a, sakmi inn hi bok zo uh ci, a kil tawphah suang cu amah Khrih Jesuh hi.
21 Amah cu inn pumpi a kaikhawmtu hi a, Topa biakinn thiang cang suak tian, a khangtotiktu cu amah hi.
22 Amah tuah na pehdunnak uh thawmin nangmuh vang amah umtu midangte tuah Hawvangin Pathian i umnak inn tukin sakcihmi hi zo toh uh ci.