48
Ngam Semdun Haw
1-7 Saklam ngamngi cu Mediterranean Tuipi pen nisuahnak lamah hawhin, Hethlon khua pen Hamath Mual kawnah, Enon khua pen Damaskas ngam le Hamath ngam a ngamngi tian hi tuk hi. Nisuahnak lam ngamngi pen nitumnak lam ngamngi Mediterranean Tuipi tian ngam khenmi cu Israel hinnam pa khatin khenkhat ten co haw tuk a, a nuailam hinnam ten ngam khen cu saklam pen hanglamah zomdunin co haw tuk hi.
Dan hinnam,
Asher hinnam,
Naftali hinnam,
Manasseh hinnam,
Efraim hinnam,
Reuben hinnam,
Judah hinnam.
A Cuangcungin Koihmi Ngamkhen
8 Judah hinnam tei ngam a zomtu ngamkhen cu a cuangcungno man tukin a dangno in koih hi tuk hi. Mah ngamkhen cu saklam pen hanglamah peng sawm hi tuk, a zallam cu amu hinnam tei semmi nisuahnak lam pen nitumnak lam ngam tia hi leng tuk hi. Hi ngamkhen sungah Biakinnpi um tuk hi.
9 Hi ngamkhen laizangah ngamkhen a dangno in peng sawm sau le peng liat zal cu Topa i ca tukin piakmi ngam hi tuk hi.
10 Hi ngamkhen thiangtho sungah thiampi tei comi ngam um tuk hi. Mah a ngam haw cu nisuahnak lam pen nitumnak lamah peng sawm zal hi tuk a, saklam pen hanglamah peng li sau tuk hi. Hi ngamkhen laizangah Topa i Biakinn um tuk hi.
11 Hi ngam thiangtho cu Zadok i casuan thiampi tei ca tuk hi. Amuhte cu muantak zetin ka nadek haw; Israel miten thil sual a bawl haw ten Levi hinnamte cu tel bok haw naven Zadok hinnam thiampite cu tel bok haw ma hi.
12 Mah hangin Levi hinnam tei ngam zomtu ah ngam nei haw tuk a, a thiangthobelmi ngam hi tuk hi.
13 Levi hinnamte vangin a dangno in ngam nei bok haw tuk a, thiampi tei ngam pen hanglamah hi tuk hi. Nisuahnak lam pen nitumnak lamah peng sawm zal tuk a, saklam pen hanglamah peng li sau tuk hi.
14 Topa i lakah a piakmi ngam cu ngamkhen dang tei lakah a phabel ngam hi a, zuak theih, thek theih le khin theih tukma hi. Ngam thiangtho Topa ta tuk hi.
15 Mah ngamkhen sung pen a tang laihmi a cuangcungmi ngam, peng sawm zal le peng nih a saumi cu ngam thiangtho kha ma hi; mahnaven mipi ca in, a kulnak bangin man tukmi ngam hi. Mah ngamkhen sungah um theih le man theih tuk hi. Mah ngamkhen laizangah khuapi um tuk hi.
16 A tung le a vang canve tuk a, mawk khatah tong thawng li le za nga hi tuk hi.
17 Hi khuapi mawkah a kimkotin, tong za nih le sawm nga zal munlawng um tuk hi.
18 Khuapi a tundin ceng haw ten a tang laihmi ngam, mun thiangtho tihmi i hanglam nisuahnak lamah peng li sau le peng nih a zalmi ngam, nitumnak lamah peng li sau le peng nih a zalmi ngam cu khuapi sung a um mipi tei bun tukmi lo ngam hi.
19 Khuasung a um hempoh ten a kuakua hinnam ahi haw hei in hi ngam cu bung thei haw tuk hi.
20 Mah hangin ngamkhen laizangah a cuangcung a koihmi ngam cu a tung le a vang canve hi tuk, mawk khatah peng sawm veve tuk a, hih sungah khuapi dinnakte vang telcih tuk hi.
21-22 Hi ngamkhen, Biakinn le thiampi tei ngam le Levi mitei ngam le khuapi dinnak mun tei umnak ngam humah nisuahnak lam le nitumnak lam a um ngamte cu ngam uk bawi ta hi. A ngam cu nisuahnak lamah nisuahnak lam ngamngi tian, nitumnak lamah Mediterranean tuipi tian hi a, saklam pen Judah comi ngam tuah ngamngidunin, hanglamah Benjamin comi ngam tuah ngamngidun haw tuk hi.
Hinnam Dang Ca Ngamkhen
23-27 A cuangcungin koihmi ngam i hanglam ngam cu a tanglaihmi Israel hinnam dang tei co tukmi hi; nisuahnak lam ngamngi pen nitumnak lamah Mediterranean Tuipi tian ngam cu saklam pen hanglamah a nuailam a, hinnam ten a sasangin co haw tuk hi.
Benjamin hinnam,
Simeon hinnam,
Isskhar hinnam,
Zebulun hinnam,
Gad hinnam.
28 Gad hinnam tei comi ngamkhen hanglamah hanglam ngamngi cu hanglam nitumnak lamah hawhin, Tamar pen Kadesh ngam a, ngamko tuiput tian, mahten saklam nitumnak lamah hawhin, Izipt ngamngi pen Mediterranean Tuipi tian hi.
29 Cungnungbel Topa in, “Hiti bangin ngam cu Israel hinnam tei co tukin khen unna, sem un,” ti hi.
Jerusalem Kongkhahte
30 Jerusalem khuapi sung tumnak tukin kongkhah sawm le pa nih um hi. Khuapi cu a kil li in, kulhtian tuah upmi hi, kil khatah tong thawng li le za nga ten sau hi.Ref 48:30-34 Mang 21:12-13;
31 Kil khatah kongkhah pa thum ten umin, kongkhah pa khatin Israel hinnam khat minpu tek haw hi. Saklam kongkhah pa thumte cu Reuben, Judah le Levi min suangin sakmi hi.
32 Nisuahnak lam kongkhahte cu Josef, Benjamin le Dan min suangin sa haw hi.
33 Hanglam kongkhahte cu Simeon, Isskhar le Zebulun min suangin sa haw hi.
34 nitumnak lam kongkhahte cu Gad, Asher le Naftali min suangin sakmi hi.
35 Khuapi kimkot kulhtian pa li cu a venghawngin tong thawng sawm le thawng liat sau hi. Mah hun pepan hi khuapi min cu “Hilai ah khin Topa Um Hi!”note 48:35 Hilai khin Topa Um Hi tih cu Yahweh-Shammah tin ti haw hi. tih hi tuk toh hi.