47
Biakinn Pen Tui Luang
1 Mahpa in, Biakinn tumnak kongka ah kihpihleh hi. Mah kongka nuai zawn pen tui put tulin, Biakinn heknak, nisuahnak lamah luang hi. Biakinn hanglam mawk nuailam pen luangin, biaklandawh hanglam mawk a kal tianin luang hi.Ref 47:1 Zek 14:8; Jn 7:38; Mang 22:1;
2 Mahpa in, saklam kongkhah lam zui in, Biakinn pen puitulin nisuahnak lam a hekmi kongkhah lamah hawhpih hi. Mah kongkhah i hanglam mawkah luino pa khat luang cu mu ing.
3 Mahpa in, a na tehnak ngolh tuah nisuahnak lam lui i luannak lamah tong thawng khat tehin, mahlai pen tui cu tantik hi. Tui cu ka ke mit tian bek hi.
4 tong thawng khat teh lehleu in, tui cu ka khuk tian hi. Tong thawng khat leng teh lehin, tui cu ka tai tian hi.
5 Adang tong thawng khat teh lehin, tui cu thuk leita zo in, tan zo lehma toh ing. A vat a, vat tih ngawl cu tan zawh tuk kha lehma toh hi.
6 Amah in, “Mihing capa, hih na muh le na tawhmite hi phano cingin,” ti hi.
Mahten mahpa in, tuimawkah kik pihlehin,
7 mahlai ka hen ten langkhat lam veve ah thingkung tampi um tek haw tih cu mu ing.
8 Mahpa in, ka lakah, “Hi lui cu ngamsung pen nisuahnak lamah luangin, Jordan tui luannak luam pen Tuipi Thi ah heng hi. Tuipi Thi sungah a luan ten a almi tui hempoh cu tuithiangin thek khawng tuk hi.
9 Tui luannak mun tihkimah tuisung um ngamsa le ngamsa a phunkim um haw tuk hi. Mah lui in, Tuipi Thi a tui hempoh cu thaktik khawngin, thiangtik khawng tuk hi. A luannak tihkimah nunnak suaktik tuk hi.
10 Engedi Ciktui pen Eneglaim Ciktui tian tuipi mawkah ngasa mantute um pepel haw tuk a, mahlai ah a sukte pho haw tuk hi. Mediterranean Tuipi ah ngasa namkim a um haw bangin mahlai hei ah ngasa namkim um bok tuk hi.
11 Mahnaven tuipi mawk a, cikdup le tuitingte cu thiangtho tukma hi. Mahlai ah Ciktui tulnak um leleng tuk hi.
12 Tui mawk mawknihah thingkung a phunkim po in, eih pha mi ngah, ngah haw tuk hi. A ceh haw thim ngawlin a ngah vang cawl awng tukma hi. Biakinn pen a luangmi tui in, a cawm hangin ha sialin ngah thak ngah leleng tuk hi. Mah thingngahte cu an in mang haw tuk a, thingcehte vang mi tampi tei damnak hi tuk,” ti hi.Ref 47:12 Mang 22:2;
Ngamngi le Leingam
13 Cungnungbel Topa in Israel lakah, “Na hin uh hinnam sawm le hin nih i semdun tukmi na ngamngi uh cu hi bangin hituk hi. Josef hinnamin ngamkhen khen nih co haw tuk hi.
14 Na pu le pa tei lakah hi ngam cu amu ca tukin pia tung tin thutiam zo ka hih hangin a teve tenno in semdun un hi.”
15 “Saklam ngamngi cu Mediterranean Tuipi pen nisuahnak lamah hawhin Hethlon khua pen Hamath Mualkawn Zedad khua tian,
16 Zedad khua pen (Damaskas ukmi ngam le Hamath ukmi ngam laklawh a ummi) Berothah khua le Sibraim khua pen (Hauran ngam ukmi ngamngi el a ummi) Tikon khua tian hi tuk hi.”
17 Mah hangin saklam ngamngi cu Mediterranean Tuipi pen nisuahnak lamah Enon khua tian hi tuk hi. Saklam ngamngi cu Damaskas le Hamath ngamte hi tuk hi.
18 “Nisuahnak lam ngamngi cu Damaskas le Hauran ngamngi pepanin, hanglamah Jordan Ngun cu ngamngi in suak hi. Jordan ngun pen nitumnak lam cu Israel ngam hi tuk a, nisuahnak lam cu Gilead ngam hi; Tuipi Thi mawk a, Tamar tian heng hi.”
19 “Hanglam ngamngi cu Tarmar pepanin nitumnak lamah Kadesh tuiput tian hawh ngut hi; mahten saklam nitumnak lamah hawhngutin Izipt ngamngi pen Mediterranean Tuipi heng hi.”
20 “Nitumnak lam ngamngi cu Mediterranean Tuipi hi a, saklamah Hamath mualkawn pen nitumnak lam tian hi.”
21 “Hi ngam cu na hin uhin sem un hi.
22 Kumkhua in nangmu ca hi tuk hi. Nangmu lakah a um ngamdang ten hi ngam pen cano a neihmite cu ngam na sem uhten covo nei bok haw tuk hi. Israel mihing lelengin sialcih hi haw tuk a, Israel miphunte tuah ngam na sem uhten kungkhainak ngolh dok bok haw tuk hi.
23 Nangmu lakah a um ngamdangte vangin Israel mi bangin ngam sepmi covo ngah bok haw tuk hi. Keimah Cungnungbel Topa in hilh zo ing,” ti hi.