DANIEL
Laibu
(The Book of Daniel)
Thulamsial
Daniel laibu hi Judah mite Pathian thei ngawl kumpi khutnuai ah haksatnak le bawlsiatnak a tawh haw laihin ngatmi hi. Laingantu in tangthu le muhnak mangin a miphun tei lakah amuh bawlsiatu cu Pathian in neh tuk a Pathian mihingte cu luatnak ngahleh haw tuk tihmi muansannak tuah tha pia hi.
Hi laibu cu khen nihin khen theih hi.
(1) Daniel le a saltan pih ten Pathian umin, a thu a ngaih haw hangin ngal neh haw hi. Hi thu le la hi Babilon le Persia uk hun sungah hi.
(2) Daniel i muhnak a sasangin, amuh mite cu sialsiahnak bebek hi, Babilon kumpi pepanin uknak tampi a khantohnak haw le a cahnak thu haw khi hi. Pathian miphun ten neh haw tuk a Pathian thei ngawl mi bawlsiatu uktu pa cu siatlal tuk hi tih thu hilh ham hi.
1
Daniel le A Ngualcam Tei Thu
Nebuchadnezzar Inn Um Tangvalte
1 Jehoiakim in, Judah kumpi a deh kum thumnakin, Babilon kumpi Nebuchadnezzar in Jerusalem khuapi cu do in, kim khawng hi.Ref 1:1 2Kum 24:1; 2Khang 36:5-7;
2 Topa in, Kumpi Jehoiakim cu mantikin, Biakinn na le na manpha khenkhatte cu latik hi. A matmi le nate cu Babilon ngam, a pathian dang tei biakinn na koihnak khanah koih hi.Ref 1:2-4 2Kum 20:17-18; 24:10-16; 2Khang 36:10; Isa 39:7-8;
3 Kumpi Nebuchadnezzar in, a khutnuai bawi upabel pa khat Ashpenaz cu ngalmatmi le thawng khiakmi Israel tei lak pen kumpi innkua le bawi phun, khangno deuhte teng tukin thupia hi.
4 Midiang, micip, zilnak a nei sa, mi pilvang le khut le ke himmi hi haw tuk a, kumpi innah nadek tuk a takmi hi haw tuk ti hi. Babilon awn, lai sial le ngan thiam a hihnak tukin Ashpenaz in zilh tuk hi.
5 Nisial a in le eihmi cu kumpi inn a, zu le an hi bok tuk hi. Mahti bangin kum thum zilnak a neih ceng haw ten kumpi mai ah hung haw tuk tin thupia hi.
6 Mahti bangin tenmi lak pen Daniel, Hananiah, Mishael le Azariah tel bok haw hi. A pa li in Judah hinnam ngeh haw hi.
7 A bawi upabelin, Belteshazzar, Shadrak, Meshak le Abednego tin min thak pia hi.
8 Daniel in kumpi inn a, an ei in le zu in thahin a thiang ngawlmi hi tuk ngawlin a lungmu sungno ah khenkhuai hi; mah hangin Ashpenaz cu amah bawm tukin hehpih ngen hi.
9 Ashpenaz cu Pathian in Daniel humah hehpihnak lungmu neitik hi;
10 mahnaven Ashpenaz in kumpipa a lau hangin Daniel lakah, “Na in le eih tuk uhmi cu kumpi amah loli i soncat sa hi. Mah hangin tangval dangte bangin na pilvang ngawl kha sual tale keimah lehlam that kha tuk,” ti hi.
11 Daniel cu Ashpenaz in micingtu tukin a koihmi pa i lakah a ngualcam pa thumte zotu tukin hawh a,
12 “ni sawm sung khingkhai in,” ti hi. “Eih tukin anceh sawlbawk le in tukin tui bek pia in hi.
13 tangval dang kumpi inn a, tui le an a eitute tuah zo langkhat inna, mah hum pen thu cu khenkhuai lehin,” ti hi.
14 Amuh cingtu pa cu ni sawm sung khingkhai tukin a lungkim hi.
15 Ni sawm kimin, a zoh haw ten kumpi inn a tui le an a eitute sangin dam le ngil saw haw hi.
16 Mah ni pepan amuh cingtu pa in, kumpi i piakmi an hi ngawlin, anceh sawlbawk bek ei vanglaktik hi.
17 Pathian in, hi tangval pa lite cu cihnak, lai thiam theihnak le ngaihsut thiamnak pia hi. Mah hum pen Pathian in Daniel cu muhnak le mang hilhciang theihnak pia hi.
18 Kumpi in, a hun tekmi kum thum a kim ten Ashpenaz in tangvalte cu Nebuchadnezzar lakah hawhpih hi.
19 Kumpi tuah otpihdunin, midang hempoh sangin Daniel, Hananiah, Mishael le Azariah ten a lungluttik saw haw hangin kumpi innah nadektu in suak haw hi.
20 Kumpi in iti bang thu haksa a suahpihin, a dong hei in, hi tangval pa li ten a ukmi ngam sung a, khutlam zothiam le mitzial thiamte sangin a let sawm bang thei saw haw hi.
21 Persia kumpi Sairas in, Babilon a neh tian Daniel cu kumpi nadektu in umcih nom hi.