46
Ngamuk Bawi le Puaite
1 Cungnungbel Topa in, “A sunglam inntual tumnak nisuahnak lam kongkhah cu nadeh ni luk sung khah hi tuk a, Sabbath ni le Ha Thak Puai ni-in hon hi tuk hi.
2 Ngamuk bawi cu a pualam inntual pen khan ngengpi sungah tumin, kongkhah a hen ten kongkhah khuam elah ding tuk hi. Mahlai ah thiampi ten halkang biakpiaknak le pawlkom biakpiaknak bawl haw tuk hi. Mah kongkhahah Pathian bia tuk a, mah nungten tulleh tuk hi. Kongkhah cu taklam bek ten khah hi tuk hi.
3 Sabbath sial le Ha Thak Puai sialin kongkhah mai ah mipite cu a lu haw kunin, Topa bia haw tuk hi.
4 Sabbath ni-in, ngam uk bawi in halkang biakpiaknak tukin sonbang ngawl tuuno pa luk le tuucang pa khat cu Topa i lakah hunpih tuk hi.
5 Tuucang pa khat tuah munkhatin vainim bung khat cu pia tuk a, tuuno pa khat tuah a piak nuammi pawpoh pia tuk hi. Mahtibang canghovam biakpiaknak tukin olif thau pawng thum pia tuk hi.
6 Ha Thak Puai ah khui cangno pa khat, tuuno pa luk le tuucang pa khat, a venghawngin sonbang ngawlmi pia tuk hi.
7 Khuicang pa khat le tuucang pa khat ca tukin biakpiaknak an cu seu lang ten hi tuk a, tuuno pa khat ca in ngam uk bawi in, a piak nuammi pia tuk hi. Mahti bangin an biakpiaknak tukin seu lang piak a hih ten olif thau pawng thum piak hi bok tuk hi.
8 Ngamuk bawi khan ngengpi sungah a tum laihin, kongkhah lampi a zui bangin a tul hei ten mah kongkhah lampi leleng tawn tuk hi.
9 “Mipi ten puai hunin, Topa a biak haw ten saklam kongkhah pen a tumtute cu Pathian a biak nung haw ten hanglam kongkhah pen tul haw tuk hi; mahten hanglam kongkhah pen a tumtute cu saklam kongkhah pen tul haw tuk hi. Kuamah in, a tumnak haw kongkhah pen tulleh ngawlin, langkhat lam kongkhah pen tulleh haw hen hi.
10 Mipi a tum haw ten ngam uk bawi cu tum bok tuk a, a tul haw ten tulleh bok hen hi.
11 An eih puai le biaknak puai hunin, khuicang pa khat ahimata tuucang pa khat ca in, ancang piakmi seu lang hi tuk a, tuuno pa khat ca in Pathian biatu in, a piak nuamzah hi tuk hi. Mahtibang anthak biakpiaknak piak ten olif thau pawng thum piakcih hi tuk hi.
12 “Ngamuk bawi in Topa i lakah mai thinthawhin piak tuk a nuam tale, halkang biakpiaknak le pawlkom biakpiaknak cu inntual tumnak sunglam nisuahnak lam kongkhah cu ama ca in hon hi tuk hi. Sabbath ni-in biakpiaknak a bawl bangin biakpiaknak cu pia in, a tulleh nungten kongkhah cu khah hi tuk,” ti hi.
Nisial Biakpiaknak
13 Topa in, “Zingsialin, kum khat kim, sonbang ngawl tuuno cu Topa i lakah biakpiaknak bawl ten a pumin mei tuah halkang hi tuk hi. Hi biakpiaknak cu nisial piak tukmi hi.
14 Mah hum pen zingsialin, sangvut pawng li le lang, a loih tukmi olif thau pawng khat tuah piak hi tuk hi. Topa i lakah piakmi hi biakpiaknak tukin daante cu kum tuanin, zuimi daan hi tuk hi.
15 Tuuno le anthak biakpiaknak le olif thaute cu zingsialin, Topa i lakah piak leleng hi tuk,” tin ti hi.
Ngamuk Bawi le Ngam
16 Cungnungbel Topa in hi bangin thupia hi. “Ngamuk bawi in, a capa pa kha khat lakah a co tukmi ngam cu laksawngin, a pia tale mah ngam cu a capa innkua tei ngamin suak tuk hi.
17 Mahnaven ngam uk bawi in, a ngam pa kha khat a nadektu lakah a pia tale Jubilee kum a kim ten ama ngam hileh tuk hi. Ngam cu amata hi in, amah le a capate bekin kumkhua in nei thei haw tuk hi.Ref 46:17 Thiam 25:10;
18 Ngamuk bawi in, mipi tei na iti bang hei hi tahen lonsak pahsuh hen. A ngam pa kha khat a capate a piak ten ama ngam sungta bebek pia tuk a, ka mihingte nemsukin, a ngam haw lonsak thei tukma,” ti hi.
Biakinn Anbukte
19 Mahpa in, a sunglam inntual hanglam mawk kongkhah el a um, saklam a hekto khante tumnakah hawhpih hi. Hi khante cu thiampi tei khan thiangtho tihmi hi. Mah khan tei nitumnak lam mun pa khat cu lakin,
20 “Hi munah thiampi ten sualhah biakpiaknak le lohleh biakpiaknak cikte huanin, canghovam biakpiaknakte vang em haw tuk a, na thiangtho cu mipi liamsuahtu in, a suah ngawlnak tukin, a pualam inntualah tulpih hi tukma,” ti hi.
21-22 Mahten mahpa in, a pualam inntualah hawhpihin, a killi ah tong sawm li a saumi le tong sawm thum a zalmi inntual neuno um pepel cu lak hi.
23 Mah inntualte cu a kimsuakin, suang tuah tianmi pang nei tek haw in, pial cu pang tuah pehzomin bawl haw hi.
24 Mahpa in, “Hi anbukte hi biakinn nadektu ten mipi tei biakpiaknak a piakmi cik a huannak haw mun hi tuk,” ti hi.