44
Nisuahnak Kongkhah Mannak
1 Mahpa in, Biakinn pen nisuahnak lam mawk a, um a pualam kongkhahah hawhpih hi. Mah kongkhah cu khahmi hi.
2 Topa in ka lakah, “Hi kongkhah cu khah leleng hi tuk a, ituk mahten hon hi awng tukma toh hi. Akua na bangin mangleh haw tukma toh hi, itahim titale Israel Pathian Topa keimah cu a sungah hawh zo ing. Khah hi leleng tuk hi.
3 Ngamuk bawi bebek umnak munah an thiangtho ei tukin hawh thei tuk hi. Mah kongkhah pen tum tuk a, sunglam a khan ngengpi pen tulleh tuk,” ti hi.
Biakinn Sung Tum Dan Tuk
4 Mahten mahpa in, Biakinn mailam a um saklam kongkhah lamah hawhpih hi. Ka zo le Topa i Biakinn cu a nase zetmi Topa i sunloihnak tuah dim hi tih cu mu ing. Lei ah bokkhupin lum ing;
5 mahten Topa cu ka lakah, “Mihing pa, Ezekiel aw, na muhmi le na zakmi hempoh hi phano sialsiahin hi. Biakinn cungcang daan le zui tuknote na hilh khawng tung hi. Biakinn sungah tum tukin a thiangte le a thiang ngawlte cu kom zetin sialsiahin hi.
6 “Ngaltho phun Israel cu hilhin; ningdelhhuai na a bawl lelengtu haw hi. Cungnungbel Topa keimah in, nem theileh thong tukma toh ing.
7 Ka lak a, biakpiaknak cik i thi le a thaute piak a hih laihin, vunceptan ngawl ngamdangmi, ka thu a ngai nuam ngawlte cu Israel miten Biakinn sungah a tumtik haw hangin ka Biakinn nawngkaitik zo haw hi. Ka mihing ten ningdelhhuai nate bawlin ka thutiam siatsuah zo haw hi.
8 Ka Biakinn sung a biaknak na thiangtho bawlte cu amu dehvo in koih nuam ngawlin, ngamdangmi tei dehvo saw in bawl haw hi.
9 “Cungnungbel Topa keimah in hilh ing: vunceptan ngawl ngamdangmi le ka thu a ngai nuam ngawlte cu Israel tei lak a, um ngamdangmi ahi haw hei in ka Biakinn sungah tum thei haw tukma,” ti hi.
Levi Mite Thiampi Dek Thei Ma
10 Topa in ka lakah, “Levi mite cu Israel mipite tuah keimah taisanin, milim a biak haw hangin bawlsia tung.
11 Biakinn kongkhah cingin le Biakinn sung nadehte dekin ka nadek thei haw tuk hi. Mipi in halkang biakpiaknak tukin le biakpiaknak dang bawlnak tukin ngan ngotu in le mipi tei ca nadektu tuk dehvo nei haw tuk hi.
12 Mahnaven milim biaknak bawlin Israel mite a pui sual haw hangin Cungnungbel Topa keimah in, tiamdunin hilh ing, dantat loli tung hi.
13 Ka thiampi nadek haw tukma hi; keima na thiangtho tei elah hawh thei haw tukma. Mun Thiangthobel sung hei ah tum haw tukma hi. Thil nawngkai a bawl haw hangin hi bangin dantatnak thuak haw hi.
14 Biakinn sung a, nadeh tuk dangte dek tukin dehvo pia ing,” ti hi.
Thiampite
15 Cungnungbel Topa in, “Zadok casuan Levi mi thiampite cu Israel mipi ten nung a hek haw laih hei in, muantak zetin Biakinn sungah ka nadek haw hi. Mah hangin tu hei in, amuhte cu ka umnakah a hungmi le keima nadektu hi haw tuk a, biakpiaknak sathau le sathite ka lakah a piatu hi haw tuk hi.
16 Amuh bek ka Biakinn sungah tum thei in le ka biaklandawhah nadek thei haw tuk a, Biakinn sung biaknak tuk nate cu hoha thei haw tuk hi.
17 Biakinn laizang inntualah kongkhah pen a tum haw ten nimzang ma neuno tuah tahmi puan silh haw tuk hi. Biakinn inntual le Biakinn sungah hei hihen, dehvo nei in, na a deh haw ten tuumul tuah tahmi puan silh viang haw tukma hi.Ref 44:17-18 Suah 28:39-43; Thiam 16:4;
18 khuasa ngawl le khua-um tul ngawlin um haw tuk hi, nim tuah tahmi lupawng le bawngbi mang haw tuk naven el kilh taikhap khap haw tukma hi.
19 Mipi umnak a pualam inntualah a tul haw laih ngawlin Biakinn sung nadehnak a silh haw mi puan cu dukta in, khan thiangtho sungah koih haw tuk hi. A zehsah haw puante cu mipi siatsuahtu a hih ngawlnak tukin puan dang silh haw tuk hi.Ref 44:19 Thiam 16:23;
20 “Thiampite cu a sam met kolh haw ma henna, a saupi in vang khawih haw pahsuh hen. A khawthuno tukin a sam haw cu khawih haw hen.Ref 44:20 Thiam 21:5;
21 Thiampi ten a sunglam inntualah a tum haw laih ngawlin sabittui in viang haw ma hen.Ref 44:21 Thiam 10:9;
22 Midang tei maakmi numei cu thiampi ten huai haw pahsuh hen. Thiampite cu Israel mi khanglai him ahimata thiampi dang i thihsanmi meivongte bek huai haw hen hi.Ref 44:22 Thiam 21:7,13-14;
23 Thiampite cu a thiangtho le thiangtho ngawlmi thu ah hei hihen, a thiang le thiang ngawl na hei hihen ka mihingte a zilhtu hi haw tuk hi.Ref 44:23 Thiam 10:10;
24 Thu eldunnak le thuneitu a um haw ten ka daan bawlmi bangin thiampi ten soncat haw hen. Ka thupiakmi le ka daan bangin biaknak puaite cu cang haw tuk a, Sabbath nite vang thiangthono in cang haw tuk hi.
25 “Thiampi in miluang zenin, mi thiangtho ngawlin bawlduncop pahsuh hen; a nu le pa i luang, a cano luang, a unau ahimata pasal nei ngawl a celnu i luang tih ngawl miluang dang cu zen hihim pahsuh hen.Ref 44:25 Thiam 21:1-4;
26 Mithiang a hih nungten ni salih sung ngak hih tuk a,
27 Mah nungten a thianthoh theihnak tukin Biakinn sunglam inntualah hawhin, biakpiaknak bawl henna, Biakinn sungah nadekleh thei tuk hi. Cungnungbel Topa keimah in hilh zo ing.
28 “Thiampi ten thiampi a hihnak haw cu Israel tei lakah ka piakmi lak pen a covo haw hi tuk a, khang tawn tungin zam pepel haw tuk hi. Israel ngam sungah imah covo dang nei haw tukma hi. Keimah hi a kul haw mi a covo haw ing.Ref 44:28 Mipum 18:20;
29 Canghovam biakpiaknak, sualhah biakpiaknak a man mite cu thiampi tei an hi tuk a, Israel ngamsung a, keima tatuk a cuangin, a koih haw mi hempoh vang amuh ten ngah khawng haw tuk hi.Ref 44:29-30 Mipum 18:8-19;
30 Thiampi ten anthak piakmi a phabel le ka lakah a piak haw mi hempoh cu co haw tuk hi. Mipi ten cangho a bawl haw sialin, a bawl masabel haw mi cangho cu thiampi lakah pia haw tuk a, mahten a inn sang hawah ka muicu heng tuk hi.
31 Thiampi ten vano le ngamsate amuhno in, a thi cawmmi hihen, ngamsa dang i matmi cik hihen ei haw pahsuh hen, tin,” ti hi.Ref 44:31 Thiam 22:8;