43
Topa Biakinn ah Hungleh
1 Mahpa in, nisuahnak lam hek kongka ah pui in,
2 mahlai ah nisuahnak lam pen hungin, nase zetin, a almi Topa i sunloihnak cu mu ing. Pathian i aw cu tuipi cawk thawm bang hi a, lei cu a nase zetmi vaknakin det khawng hi.Ref 43:2 Ezk 10:3-4, 18-19; 11:22-23; Mang 1:15
3 Hi muhnak cu Jerusalem siatsuah tukin Pathian a hun laihin, ka muhmi le Khebar Ngunpi el a, ka muhmi bang leng hi. Mahten lei ah sepdun pokin bok ing.
4 mNase zetin, a almi vaknak cu nisuahnak lam kongkhah sungah palvawkin, Biakinn sungah tum hi.
5 Topa i hawvangin, keimah cu cawi in, a laizang inntualah hawhpih a, mahlai pen Biakinn cu Topa i sunloihnak tuah dim hi tih cu mu ing.
6 Mahlai in ka elah mi pa khat dingin Biakinn sung pen Topa ka lak a otmi cu thei ing:
7 “Mihing pa, Ezekiel aw, hilai ah ka kumpi khunnak um hi. Hilai Israel miten hihen, a kumpi haw ten hihen pathian dang dadang bia in, a kumpi tei luang cu hi munah koih haw a, ka min thiangtho cu thangnautik haw tukma toh hi.
8 Kumpi ten a inn sung tumnak kongka le a kongka khuamte cu ka Biakinn sung tumnak kongka le kongka khuam elah bawl haw in, a laklawhah kulhtian pa khat bek um hi. Ningdelhhuai na tampi bawlin, ka min thiangtho a thangnautik haw hangin ka thinukin siatsuah ing.
9 Atu-in, pathian dang biak cu tawpsanin, a kumpi tei luangte cu a vawk hih haw kul tuk hi. Mahti bangin a bawl haw tale, a lak hawah kumkhua in um tung tin,” ti hi.
10 Mah hum pen Topa in, “Mihing pa, Ezekiel aw, Israel tei lakah hi Biakinn thu le la hi hilh inna, a sak daante thei bok haw hen. A thil bawl sual haw mi hangin zakcatikin hi.
11 A thil bawl sual haw mi hangin zahcaknak a thei tum haw tale, a lak hawah Biakinn sak daan tukte cu hilh ciangin hi. A luangzing haw mi, a sung tumnak le a pualeu tulnak khante, iti bang tuk him tihmi le iti bangin na hempoh koih dan tuk hei hihen, a daan hempoh cu hilhcian khawngin hi. Amu ca in ngetsak khawng inna, iti bang him tih thei haw tuk a, daan hempoh zui khawng thei haw tuk hi.
12 Biakinn daan cu hi bangin hi: Biakinn umnak mualhum le a elkim hempoh cu mun thiangtho,” ti hi.
Biaklandawh
13 Biakinn i biaklandawh ngeng dan cu a nuailam bang hi. A bulah a kimsuakin khuk umin, tong khat thuk le tong khat zal hi. Biaklandawh mawkah a mawk khupnak umin khap khat sang hi.Ref 43:13-17 Suah 27:1-2; 2Khang 4:1
14 Biaklandawh a niamnakbel cu a bul a sannakbel pen tong nih sang hi. Biaklandawh kimsuakin, tong khat awn bawl haw in, a sannak zawn cu tong li sang hi. Mahnung ten a kimsuakin tong khat awn bawl leleu haw in, a laizang cu sangbel hi.
15 Hi a sangbelnak zawn, biakpiaknak a halnak haw zawn cu tong li sang hi. Hi hum pen a killi ah ki pa li um.
16 Biaklandawh lu a sannakbel cu tong sawm le tong nih sau in, tong sawm le tong nih zal veve haw hi.
17 A laizang vang cu a tung le a vang canve in tong sawm le tong li veve kim hi. A mawkah a mawk zial umin, khap khat sang hi. A bulah khuk ummi cu tong khat zal hi. Biaklandawh hawhnak kailawn cu nisuahnak lamah um hi. Ref 43:17 Suah 27:1-2; 2Khang 4:1
Biaklandawh Apnak
18 Cungnungbel Topa in, “Mihing pa, Ezekiel aw, ka hilhmi hi phano ngai in hi. Biaklandawh hi tian khawng ceng ten biakpiaknak cik cu a humah halin le sathi a humah thehin, apnak bawlin hi.Ref 43:18-27 Suah 29:35-37
19 Levi hinnam thiampi Zadok casuante bek ka nadektu tukin ka umnak munah tum thei haw tuk hi. Hi thu cu Cungnungbel Topa keima thupiakmi hi. Sualhah biakpiaknak tukin khui cangno pia in hi.
20 Khuicang thisan demno la inna, biaklandawh lu a ki pa li humah noihin hi. Biaklandawh laizang zawn a kilte vang noih inna, a mawk tuan vang noih khawngin hi. Biaklandawh cu thiangtik inna, apin hi.
21 Sualhah biakpiaknak tukin piakmi khuicang cu la inna, biakinn pualam mun khat pen halin hi.
22 A zingten keelcang him pa khat la inna, sualhah biakpiaknak bawlin hi. Biaklandawh thianthohnak tukin khuicang thi tuah na bawl bang lengin keelcang thi tuah vangin bawlin hi.
23 Mahmi na bawl ceng ten khui cangno him le tuu cangno him la inna,
24 ka lakah hunpihin hi. Thiampi ten a humah ci sawh haw tuk a, ka lakah halkang biakpiaknakin mang haw tuk hi.
25 Nisialin ni salih sung, keelcang pa khat, khuicang pa khat le tuucang pa khat sualhah biakpiaknakin mang un hi. A venghawngin, a himmi hi haw tuk hi.
26 Ni salih sung thiampi ten biaklandawh cu thiangtik haw tuk a, man theih sa hialin bawl haw tuk hi.
27 Nipi khat nungten biaklandawh humah thiampi ten biakpiaknak bawl pan haw tuk hi; mipi tei halkang biakpiaknak le pawlkomnak biakpiaknakte bawl haw tuk hi. Na venghawng uh humah ka lungdam tung hi. Cungnungbel Topa keimah in hilh zo ing,” ti hi.