42
Biakinn El Inn Pa Nih
1 Mahpa in, a pualam inntualah hawhpihin, Biakinn pen saklam a ummi innah hawhpih hi. Mah inn cu Biakinn nitumnak lam mawk a, ummi inn pen khawla ma hi.
2 Mah inn cu tong za khat sau in, tong sawm nga zal hi.
3 Mah inn i langkhat lam cu Biakinn a sau lam zawngin, a um, tong sawm nih zalmi muntong lam hek hi. Langkhat lam cu a pualam inntual a suang phahmi lampi lam hek hi. Thuah thumin sakmi inn hi in, a humta thuah cu a nuaita thuah sangin nunglamah com pepel hi.
4 Mah inn saklam tuanah lampi um a, tong sawm zalin, tong za khat sau hi. Saklam mawkah tumnak awng um hi.
5 Hi inn humlam khante cu a nuai a khante sangin cawngcik deuh hi, itahim titale a humlam khante cu nunglamah a com pepel hang hi.
6 Inn thuah thum a, khante cu khantian humah sakmi hi haw in, inntual a sakmi inn dangte bang hi ngawlin khuam dotu pa khat hei umma hi.
7-8 Thuah nuaita a pualam kulhtian cu tong sawm nga sung khan datnak um ngawlin pehdun khawng hi; tong sawm nga cu inn a sau lam i lang hi. Adang sawm nga ah khan tampi um hi. Humtabel thuahah inntual khan bek um hi.
9-10 Hi khan pa nih nuai, nisuahnak lam inn tawpnak kulhtian a patnak haw pen a pualam inntual hawhnak tuk lampi um hi.
Biakinn hanglam mawkah Biakinn nitumnak lam mawk inn tuah a khawla ngawlmi munah inn bangkek pa khat um hi.
11 Inn khan tei mai ah saklam mawk a um bangin lampi pa khat um hi. Mah lampite cu tiave khawngin, a um daan vang bangten khawng haw in, a tumnak tuk kongkate vang bangten khawng haw hi.
12 Mah inn hanglam mawk khan tei nuai, kulhtian a patnak haw nisuahnak lam mawkah kongka pa khat um hi.
13 Mahpa in, ka lakah, “Hi inn pa nih cu thiangtho haw hi. Hi inn sungah Topa i umnak munah a tum theitu thiampi ten Topa i lakah a piakmi biakpiaknak thiangthobel cu ei haw hi. Inn khante cu a thiangmi a hih haw hangin biakpiaknak thiangthobel, cangho vam biakpiaknak, sualhah biakpiaknak ahimata kuan kikleh biakpiaknakte cu thiampi ten mahlai ah koih haw tuk hi.
14 Biakinn sungah thiampite a tum nung haw ten a pualam inntualah a hawh nuam haw tale Topa i na a deh haw ten a silh haw mi puante cu dukin, innkhanah koih haw tuk hi. Mipi khop khawmnak munah a hawh nuam haw tale puan dang silh masa haw hen hi.”
Biakinn Mun Tehnak
15 Mahpa in, Biakinn sung a teh khawng ceng ten nisuahnak lam kongkhah pen tulpihin, Biakinn pualam munte teh hi.
16 A tehnak ngolh cu la in, nisuahnak lam a teh ten tong za nga bang kim hi.
17-19 Mahnung ten saklam cu teh a, hanglam le nitumnak lam vang tehin, a venghawng bangten haw a, tong za nga ten ngeh haw hi.
20 Mah hangin kulhtian tuah upmi mun cu tong za nga zalin, tong za nga sau hi. Mah kulhtian cu a thiangthomi le a thiangtho ngawlmi ngamngi khentu in, na suakta hi.