41
1 Mah ceng ten mahpa in, a laizang khan Mun Thiangtho ah tumpih hi. Mah khan sung tumnak cu tehin, tong luk thukin, tong sawm zal hi, a mawk nih a kulhtiante cu tong nga ten sah khawng hi. A laizang khan cu tong sawm li sau in, tong sawm nih zalmi hi.
2 Tumnak kongka cu tong sawm nih zalin, a mawknihin tong sawm veve sah hi. Mun Thiangtho cu tong sawm liat sau in, tong sawm li zal hi.
3 Mahten a sungtabel khanah tum hi. A tumnak cu tong nih thukin, tong luk zal hi; a mawknih a kulhtiante cu tong salih sah hi.
4 Sungtabel khan cu tong sawm nih zalin, tong sawm nih sau hi. Amah in, “Hilai cu Mun Thiangthobel,” ti hi.
Biakinn Kulh Tiancihmi Khan
5 Mahpa in, Biakinn kulhtian a sunglam pen a sahnak tehin tong luk bang sah hi. Biakinn kulhtian tuah tawngkhadunin sakmi khan tampi Biakinn elkimah umin, khan pa khat cu tong li zal ngeh hi.
6 Hi khante cu thuah thumin bawlmi hi a, thuah khatnakah khan sawm thum ten um hi. Biakinn kulhtian pualeu lam cu a humtabel khanah pa zetin, a nuailam khante cu sah dedeuh hi. Suat dawhnak khan sukte cu kulhtian humah kencih kul ngawlin tang cawm thei hi.
7 Mah hangin Biakinn kulhtian cu a pualam pen zoh ten a taw lam pen a lulam tian a sah dan bang tenmi pang bang hi. Biakinn pang pualam a khan neuno tei pualam pen kailawn kiukawi pa nih bawl haw in, thuah nuaitabel pen thuah humtabel tian kai toh theih hi.
8-11 Hi khan neuno tei pualam kulhtiante cu tong nga sah hi a, khan neunote tumnak tukin Biakinn saklam mawk pen kongka pa khat um hi. Biakinn kimkotin, tong nga zalmi khantian um ngut tih cu mu ing. Mah khantian cu lei pen tong luk sangin, Biakinn kulhtian el a khan neuno tei suat tuah zawndun haw hi. Mah khantian le thiampi tei manmi inn tei laklawh, Biakinn siklam tuanah tong sawm nih a zalmi munlawng um hi.
12 Ma munlawng a tawpnak, Biakinn i nitumnak lamah inn pa khat umin, tong sawm kuah sau le tong sawm salih zalmi hi. Kulhtian cu a kimkotin, tong nga sah hi.
Biakinn Teh Haw
13 Mahpa in, Biakinn pualeu lam cu tehin, tong za khat sau hi. Biakinn nunglam pen muntong cu zamin, nitumnak lam a um, inn a tawpnak tian tong za khat bang kim leng hi.
14 Biakinn mailamah taklam le veilam a um, muntong sialcihin tong za khat kim leng hi.
15 Inn a sau lam cu nitumnak lamah tehin, a mawknih hawhnak lampi tuah tong za khat kim hi.
Biakinn sung tumnak, Mun Thiangtho le Mun Thiangthobel cu,
16 a suat pen tukvelh tian thing tuah khuhmi hi. Hi tukvelhte cu khuh theihmi haw hi.
17 Biakinn sunglam kulhtian cu kongka hum tian, tuumkung le Cherubim tihmi ha nei ngamsa zuk tuah
18 dim hi. Tuumkung le Cherubim in zukte cu mah khan elkim kulhtian humah a kalhin zuksuai haw hi. Cherubim ten mai pa nih ten nei haw hi.
19 Mai pa khat cu mihing mai hi a, langkhat lam a um tuumkung lam hek hi, mai dang pa khat cu kiosa mai hi a, langkhat lam a tuumkung lam hek bok hi. Pang humah a tuanpi in,
20 suat pen kongka hum tian dim khawng haw hi.
21 Mun Thiangtho a, kongka khuamte cu a zallam le a sahlam tiadun khawng haw hi.
Thing Biaklandawh
Mun Thiangthobel sung tumnak kongka mai ah thingtuah bawlmi biaklandawh bang,
22 pa khat um hi. Mahmi cu tong thum sangin tong nih zal hi. A kil a khuamte, a tawdapmi le a mawkte vang thing tuah bawl khawngmi hi. Mahpa in ka lakah, “Hihi Topa i umnak mun a dingmi cabuai,” ti hi.
Kongkate
23 Mun Thiangtho sung tumnak a tawpnakah kongka pa khat umin, Mun Thiangthobel luhtumnak a tawpnak lamah kongka pa khat um bok hi.
24 Hi kongkate cu khah ton theih tuk bawlmi hi in, a laizang awngmi kongkate haw hi.
25 Biakinn pang hum bang lengin, Mun Thiangtho kongka humah tuumkung le Cherubim zuk um hi. Biakinn sung tumnak tuk kongka ah a pualeu lam pen thing tuah bawlmi kongka khuh khaih haw hi.
26 Hi khan i siklam mawknihah tukvelh umin, tuumkung zuk tuah mawitik haw hi.